गलातियों 6
6
योकिया केरी मजत करा
1मिंडै विश्वासी भाईयो, अगर कोई विश्वासी कोसक्यै पापेरै वंशा मझ भौ गांहथा, ता तुहां मझ जै आत्मायरै अनुसार चलतै, तुवे तैस प्यार सिंउ सही बत्तै लै ऐईछा जां सतर्क बेशा किहींक्यै तुवे ऐपुवे ना तैस पापा मझ पै गहिया। 2मुसीबतिया मझ योकिया केरी मजत करियां करा। ऐहीं चारै तुवे मसीहरी व्यवस्थायरा पालन कातै।
3अगर तुहां लगतु कि कोसकेरी मजत कांनेरै तेईनी तुवे बड़ै जरूरी अत्तै, ता तुवे सिर्फ अपांणा मूर्ख बंणातै अत्तै। तुवे योउतै बि जरूरी नत्तै। 4पण हरेक मैहणु अपड़ै कम तकाईया कि क्या सै अच्छै अत्तै। अगर तेनी अच्छा कम क्यौरा, ता सै अपड़ै कमां पनि घमण्ड करि सकता। पण तैस अपड़ै कंमेरी तुलना होरनियां मैहणुवां सिंउ ना कांनी चेहिंथी। 5केईनी कि असु मझ सभ मैहणु अपड़ै वर्तावेरै तेईनी ऐपु जिम्मैवार अत्तै। 6ऐ जरूरी आ कि जै मैहणु परमेश्वरैरा वचन शिख्रांतै अत्तै, तेन्हांनि तैन्हांं मैहणुवां किना संसारिक मजत मेईंणी चेहिंथी, जै शिख्रतै अत्तै। 7अपड़ै आपानि धोखा मेईं देया, एकि मैहणु ऐ ना सौचणु चेहिंथु कि सै परमेश्वरानि धोखा दी सकता, केईनी कि मैहणु जै किछ बांता सैहै बढता। 8अगर कोई मैहणु अपड़ि ईच्छाय पूरी काता ता तेसनी अनन्त कालैरी मोउत मेईंणी। अगर सैक्या तैस पूरू काता, जै पवित्र आत्मा चांहथा, ता तेसनी अनन्त जीवन मेईंणा। 9असै भलै कंम कांने ला निराश ना भुईया, केईनी कि अगर असै निराश ना भुईया, ता परमेश्वरैरा अपड़ा टैंम ऐईंणा पन ईनाम मेईंणा। 10ऐठणीरै तेईनी ज्यो-तेईनी असुनि मौका मेईंता, असु सभनियां मैहणुवां सिंउ भलाई कांनी चेहिंथी; खास तौर पन विश्वासी भाई सिंउ।
लाष्ट चेतावनी जां नमस्कार
11ध्यान दिया कि किहीं बडै-बडै अक्षरा मझ मीं तुहांनि अपड़ै हत्थै ला ऐ लिखोरू आ। 12जै मैहणु होरनियां यहूदिया खुश कांना चांहथै, सैहै तुहांनि खतना करांणेरै तेईनी दबाव बातै। सैक्यै ऐ सिर्फ ऐठणीरै तेईनी कातै, ताकि मैहणु तैन्हांं ऐ प्रचार कांनेरै कारण ना सताईया कि मसीह क्रूसा पन मुआ। 13ऐड़ि तेईनी कि सैक्यै खतना क्यौरै यहूदी विश्वासी बि मूसेरी सारी व्यवस्थायरा पालन ना कातै; पण सैक्यै चांहथै कि तुवाड़ा खतना भुईया ताकि सैक्यै होरनियां यहूदिया केरै सांमणै घमण्ड करि-करि ऐ शुणां सकिया कि तुवाड़ा खतना तेन्हैरै कारण भौरा। 14मिंडै तेईनी अगर आंउ घमण्ड काता, ता मूं सिर्फ ऐस गलै पन घमण्ड कांना कि असैड़ा प्रभु यीशु मसीह असेड़ै तेईनी क्रूसा पन मरा। क्रूसा पन मसीहरी मोउतिरै कारण ऐस संसारेरी चीजिया केरा मिंडै तेईनी कोई मतलब ना रिय्हा जां आंउ ऐस संसारेरै तेईनी किछ बि ना। 15कोस्केरा खतना भौरा भुईया या ना, ऐ किछ मायनै ना रखता; पण परमेश्वरेरै जरियै अक नवाँ मैहणु बंणाईयूंणा ऐ मायनै रखता। 16सैक्यै ऐ परमेश्वरेरै जरियै चुणियोरै मैहणु अत्तै।
17ऐस चिट्ठी मुकांतै आंउ तुहां सिंउ विनती काता, कि अबै कोई बि मूंनी हौरा जादा दुख ना दिया; केईनी कि मिंडै शरीरा पन जै जख्म#6:17 पौलुसेरी बड़ै बारी तैन्हांं मैहणुवां किना पिटायि करवाय जां कोड़ै मारवाय जै तेसेरै खिलाफ थ्यै केईनी कि सै मसीहरै बारै मझ शिख्रायिंथ्या। ऐ जख्म ऐस मार खांणेरी वजह थी अत्तै, सैक्यै लुहातै कि आंउ यीशु मसीहरा सेवक आ। 18मिंडै विश्वासी भाईयो, आंउ प्रार्थना काता, कि असेड़ै प्रभु यीशु मसीहरा अनुग्रह तुहां सभनियांं सेईतै भुईया। आमीन।
Currently Selected:
गलातियों 6: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
