कुलुस्सियों 4
4
1हे मालको! तुवे ऐ जांणि करि अपड़ै दासा सिंउ न्याय जां अक जेतिया बर्ताव करा, कि स्वर्गा मझ तुवाड़ा बि कोई मालिक आ।
किछ व्यावारिक सलाह
2जेख्णी तुवे लगातार प्रार्थना कातै ता स्तर्क भौ करि बेशा जां हमेशा परमेश्वरैरा धन्यवाद कातै रिय्हा। 3जां ऐस सेईतै असेड़ै तेईनी ऐ बि प्रार्थना कातै रिय्हा, कि परमेश्वर असुनि वचन शुणांणैरा मौका दिया, कि असै मसीहरै तैस भेदैरी घोषणा करि सकिया जेसेरी वजहि ला आंउ केईदी मझ आ। 4ऐठणीरै तेईनी प्रार्थना करा कि आंउ मसीहरा संदेश सही तरीकै सिंउ शुणा सकूँ। 5हर मौकेरा अच्छाई सिंउ इस्तेमाल करा ऐ लुहानेरै तेईनी ना कि तुवे विश्वासी अत्तै। जां जै मैहणु यीशु पनि विश्वास ना कातै तैन्हांं सेईतै बुद्धिमानी सेईतै बर्ताव करा। 6तुवाड़ी गल-बात नम्र जां अच्छी लगणै बाई भूंणी चेहिंथी, कि तुहां हरेक मैहणुनी अपड़ै विश्वासेरै बारै मझ सही-सही जुबाव दींणा ऐईछिया।
लाष्ट नमस्कार
7प्यारे विश्वासी भाई जां ईमानदार साथी सेवक, तुखिकुस, जै मूं सेईतै प्रभुरा कम काता, मिंडी सारी गलै ऐस तुहांनि शुणा दींणी। 8सैक्या मीं तुहां किनि ऐठणीरै तेईनी भेईजा, कि तुहां पता चलिया कि तुवे केतियै अत्तै; जां सै तुहां विश्वासा मझ मजबूत करिया। 9जां तैस सिंउ उनेसिमुस बि भेईजौरा; जै विश्वास कांनेरै काबिल जां प्यारा विश्वासी भाई आ, जां सै तुवाड़ा ग्रांवाल आ। तैस तुहांनि ईठणीरी सारी गलै शुणा दींणी।
10अरिस्तर्खुस जै मूं सिंउ केईदी आ जां बरनबासैरा भांणज मरकुस (जेसेरै बारै मझ तुहांनि पेहिलै शुणाउरू थियु कि सै अगर तुहां किनि या ता तैस सिंउ अच्छै तरीकै सिंउ बर्ताव करै।) 11जां यीशु जैसनि मैहणु यूस्तुस बोलतै, तुहांनि नमस्कार बोलता आ। यहूदी विश्वासी मैहणुवां मझां बस ऐ त्रईयो परमेश्वरेरै राज्यरै तेईनी मूं सिंउ प्रभुरा कम कांनार अत्तै जै मूंनी हिम्मत दींतै रींहथै। 12इपफ्रास जै तुवाड़ै नगरैरा आ जां यीशु मसीहरा सेवक आ, तुहांनि नमस्कार बोलता। सै तुवाड़ै तेईनी लगातार प्रार्थना काता, ताकि परमेश्वर तुहां मजबूत जां सिद्ध बणाईयां जां तुवे पूरै विश्वासै सिंउ परमेश्वरेरी ईच्छाय पूरी कातै रिय्हा। 13आंउ तेसैरा गवाह आ कि सै तुवाड़ै तेईनी जां लौदीकिया जां हियरापुलिस शहरेरै मैहणुवंनी लगातार प्रार्थना काता रीहंथा। 14विश्वासी बेईद भाई लूका जां देमास बि तुहांनि नमस्कार कातै अत्तै। 15लौदीकिया शहरेरै विश्वासी भाईयानि जां नमुफास जां तेसेरै घरेरी कलीसियेरै मैहणुवंनी नमस्कार बोलै।
16जां जेख्णी ऐ चिट्ठी तुवाड़ै ऐड़ि पढ़ि लैई ता ऐहीं करै कि तैस लौदीकिया शहरेरी कलीसियै मझ बि पढ़ै। जां ऐ चिट्ठी जै लौदीकिया शहरेरी कलीसियै किना यैई, तैस तुवे बि पढ़ै। 17जां फिरी अरखिप्पुस सिंउ बोलै कि “जै सेवा प्रभु मझ ताउनि दितोरी आ, तैस अच्छै तरीकै सिंउ पूरी करै।” 18आंउ पौलुस अपड़ै हत्थै ला ऐस चिट्ठी मझ तुहांनि नमस्कार लिखता। याद रखै कि आंउ जैल्ही मझ आ जां मिंडै तेईनी प्रार्थना करा। तुहां पनि परमेश्वरैरा अनुग्रह भूंता रिय्हा। आमीन।
Currently Selected:
कुलुस्सियों 4: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
