कुलुस्सियों 3
3
1ऐ ऐहीं चारै आ जिहीं परमेश्वरै तुवे मौरा मझां जींतै क्यै, जेख्णी मसीह तेनी मौरा मझां जींता केया। ता तेसैरी ईच्छा करा जै परमेश्वरै तुवाड़ै तेईनी स्वर्गा मझ रखौरू आ, जेठि मसीह परमेश्वरा किनि सभनियां किना खास जगाय पनि बेठौरा। 2स्वर्गा मझ परमेश्वरै तुहां मैहणुवां केरै तेईनी जै आशीषि रखोरी अत्ति, तैन्हांं पनि लगातार ध्यान दींतै रिय्हा। तैन्हांं बुरा कंमा मेईं करा जै धरती पनि मैहणु कातै रींहथै। 3केईनी कि तुवाड़ा पाप कांने वा स्वभाव मरि गियौरा जां तुवाड़ा नवाँ जीवन मसीह सेईतै परमेश्वरा मझ छपौरा। 4जेख्णी मसीह जै तुहांनि नवाँ जीवन दींता, जेख्णी तैस संसारा मझ वापस ऐईणु ता तेख्णी तुहां बि ऐईणु जां तेसैरी महिमाय मझ सहभागी भूंणु।
पुरांणा जां नवाँ जीवन
5ऐठणीरै तेईनी तैन्हांं बुरा कंम कांने बंद करा जै तुवाड़ै पाप बाऐ स्वभावा सिंउ जुड़ौरै अत्तै, मतलब व्यभिचार, अशुद्धता, बुरू सौचणु, बुरी ईच्छाय जां लालच जै मूर्तिया केरी पूजा कांने बराबर आ। 6जै मैहणु ऐन्हां बुरा कंमा कातै परमेश्वरा तेन्हांनि भयांकर सजा दींणी। 7तुवे बि पेहिलै ऐतेई ईच्छाईया केरै मुताबिक जींतै थ्यै, जेख्णी तुवे ऐन्हां बुरा कंमा मझ जिन्दगी बिताईंथ्यै। 8पण अबै तुहां ऐकेई सारी गलै मतलब गुस्सा, नाराजगी, बैरभाव, निंदा, गंदी गलै हमेशेरै तेईनी कांनी छडि देया। 9योकिया सिंउ झूठ मेईं बोला, केईनी कि तुहैं अपड़ा पुरांणा पापी स्वभाव जां सारै बुरै कम छडि दितोरै अत्तै। 10अबै तुवे अक नवें मैहणु बंणी गियोरै अत्तै, ऐ नवाँ स्वभाव असेड़ै बणांणै बाऐ परमेश्वरा सैयि जादा किना जादा भूंता गांहथा जां ऐठणीरै तेईनी सै तैस अच्छै तरीकै सिंउ समझैला। 11ऐनि ला कोई फर्क ना पूंता कि तुवे यूनानी या यहूदी अत्तै, या तुवाड़ा खतना भौरा कि ना। तुवे अक परदेशी या क्रूर बि भौ सकतै जां तुवे गुलाम या आजाद बि भौ सकतै। पण मसीह ऐ एकमात्र आ जै मायनै रखता जां अपड़ै सभनियां मैहणुवां मझ रींहथा।
12ऐठणीरै तेईनी जेख्णी परमेश्वरै तुवे अपड़ै पवित्र मैहणु बंणनेरै तेईनी चुणोरै अत्तै जां तुहां सिंउ प्रेम काता, ता तुवे धिरास रखणै बाऐ, दयालु, विनम्र, कोमल, जां सहनशील बंणा। 13जेख्णी तुहां योकिया मझ कोई शिकायत भुई ता योकिया केरी सैहि ल्या जां योकिया केरै अपराध माफ करा जिहीं परमेश्वरै तुवाड़ै पाप माफ क्यौरै अत्तै, तिहियें तुवे बि करा। 14सभनियांं किना खास कम जै तुहां कांना चेहिंथा सै ऐ आ कि योकिया सिंउ प्रेम करा, ऐहीं कांने ला तुवे पूरी तराहि सिंउ अकजुट भौ गांहणै। 15सै शांति जै मसीह दींता तैस अपड़ै दिला पनि राज कांना देया, केईनी कि तुवे सभ एकि ऐ शरीरेरै अंग अत्तै। ऐठणीरै तेईनी तुवे योकिया सिंउ शांति सिंउ बेशणेरै तेईनी शदाउरै अत्तै। जां हमेशा परमेश्वरैरा धन्यवाद कातै रिय्हा। 16हर टैंम मसीहरै संदेशेरै बारै मझ सौचा ताकि ऐ सभ-किछ तैस काबु मझ करिया जै तुवे कातै जां सौचतै; जां पूरै ज्ञानै ला योकिया शिख्रा जां बत्त लुहातै रिय्हा जां अपड़ै मंना मझ धन्यवाद करि-करि परमेश्वरेरै भजन जां स्तुति जां आत्मायरै गीत लांतै रिय्हा। 17जै किछ बि तुवे बोलिया या करिया, सै सभ-किछ सभ प्रभु यीशुरू नाँ लै-करि करा जां प्रभु यीशुरी वजहि ला पिता परमेश्वरैरा धन्यवाद करा।
नवें जीवनेरै परिवारिक नियम
18हे लाड़ियो! अपड़ै-अपड़ै लाड़ा केरै आधीन बेशा केईनी कि मसीह पीछै चलणारानि ऐहै ठीक आ। 19हे लाड़ो! तुवे अपड़ि-अपड़ि लाड़िया सिंउ प्रेम रखा, जां तैन्हांं सिंउ नम्र बेशा। 20हे बच्चो! जै किछ बि तुवाड़ै माँ-बब तुहांनि कांननी बोत्तै, तैस करा, केईनी कि प्रभु ऐनि ला खुश भूंता। 21तुवे जै माँ-बब अत्तै, अपड़ा बच्चा घड़ि-घड़ि झिड़खाय करि चिढ़ाआ मेईं, ऐहीं ना भुईया कि ऐन्हैरा दिल दुखी भौ गहिया। 22हे गुलामो! जै इस संसारा मझ तुवाड़ा मालिक आ, सारिया गला मझ तेन्हैरै हुक्मेरा पालन करा मैहणुवां खुश कांने वा केरै समान लुहानेरै तेईनी ना पण मंनेरी सच्चाई जां परमेश्वरेरै डरा सिंउ करा। 23जां तुवे मैहणु जै बि कम करा पूरा मंन ला करि करा, ऐहीं सौचि करि कि मैहणुवां केरै तेईनी नत्तै कातै पण प्रभुरै तेईनी कातै अत्तै। 24याद रखा कि प्रभु तुहांनि ईनाम दींणा, जै ऐ आ कि तैस तुहांनि तैन्हांं आशीषिया मझां हैसा दींणा, जै ईनाम तेनी अपड़ै सभनियां मैहणुवंनी तियार क्यौरै अत्तै। जैस मालिकैरी तुवे सेवा कातै अत्तै सै मसीह आ। 25जै बि लगातार बुराई काता रैहला, परमेश्वरा तेसनी सजा दींणी, केईनी कि सै न्याय कातै टैंमा कोसेरा बि पक्षपात ना काता।
Currently Selected:
कुलुस्सियों 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
