कुलुस्सियों 2
2
1आंउ चांहथा कि तुवे ऐ जांणि ल्या कि आंउ तुवाड़ै जां तैन्हांं सभनियां विश्वासिया केरै तेईनी जै लौदीकिया नगरा मझ अत्तै जां तैन्हांं सभनियां विश्वासिया केरै तेईनी जैन्हां सिंउ आंउ ना मिलौरा, आंउ तेन्हैरी मजत कांनेरै तेईनी जै किछ करि सकता, सै सभ-किछ काता। 2आंउ ऐहीं ऐठणीरै तेईनी काता, केईनी कि आंउ तेन्हैरै विश्वासा मजबूत कांना चांहथा जां सै योकिया सिंउ प्रेमा मझ अकजुट भौ-करि रिय्हा। आंउ चांहथा कि तैन्हांं पूरा भरौसा भुईया, केईनी कि तैन्हांं परमेश्वरेरी गुप्त योजनायरी पूरी समझ आ, जै खुद ऐपु मसीह आ। 3परमेश्वरेरै बारै मझ बुद्धी जां ज्ञान एकि छपाउरै खजानै सैयि आ। सिर्फ मसीह ऐ तैस जांणता जां सै तैस सभनियां मैहणुवां केरै सांमणै लुहाता। 4ऐ आंउ ऐठणीरै तेईनी बोलता, कि कोई बि मैहणु तुहां तैन्हेरिया झूठी शिक्षाईया पनि विश्वास कांनेरै तेईनी राजी करि-करि धोखा ना दिया। 5हलाँकि आंउ तुहां सिंउ ना, तां बि आंउ तुवाड़ै बारै मझ सौचता रींहथा, जां आंउ खुश आ कि तुवे तिहियें जींतै अत्तै जिहीं तुहां जींणु चेहिंथु जां मसीह मझ तुवाड़ा विश्वास मजबूत आ।
मसीह मझ जीवनेरी भरपूरी
6ऐठणीरै तेईनी जिहीं तुहैं प्रभु यीशु मसीह प्रभु मनि करि ग्रहण करि लियौरा, तिहियें अबै लगातार तैस सैयि बर्ताव करा। 7जां तेसै मझ मजबूत भूंतै गहा, जिहीं अक बुट धरती मझ जड़ पकड़तु; जां जिहीं अक घर बुनियादी पनि मजबूत रींहथु तिहीं ऐ तुवे बि अपड़ै विश्वासा मझ मजबूत भूंतै गहा, जां परमेश्वरैरा ज्यादा किना ज्यादा धन्यवाद कातै रिय्हा।
8ध्यान रखा, कि तुहां कोई अपड़ै तैस संसारिक ज्ञाना मझ जां फालतु बाई गला मझ ना फसाईया, जै मैहणुवां केरै बंणाउरै रीति रिवाजा जां संसारेरी शिक्षाईया केरै मुताबिक आ। पण मसीहरै अनुसार चला। 9ऐ मैहणु तुहांनि धोखा ना दिया, केईनी कि जेख्णी मसीह मैहणुरै रूपा मझ या, तेख्णी बि सै पूरी तरह सिंउ परमेश्वर थ्या। 10मसीह हर एकि शक्ति जां अधिकारा मझ प्रधान आ, ऐठणीरै तेईनी अगर तुवे मसीह मझ अत्तै ता तुहांनि कोस बि चीजै मझ कमि ना। 11जेख्णी तुहैं मसीह पनि विश्वास केया, ता तुवाड़ा खतना मैहणुवें ना केया (जिहीं यहूदी करींथ्यै), पण तुवाड़ा सै खतना भुआ जै मसीह केया, जेनि ला तुवाड़ा पापी स्वभाव बढि करि दूर कांना आ। 12जेख्णी तुहैं बपतिस्मा लियौरा थ्या, ता तुवे मसीह सेईतै दबै जां नवें स्वभावा सेईतै तुवे जींतैरै। ऐहीं ऐठणीरै तेईनी भूं, केईनी कि तुहैं विश्वास केया कि परमेश्वरै अपड़ि सामर्थी ला मसीह मरना किना बाद दुबारे फिरी जींतैरा। 13जेख्णी तुवे अपड़ै पापा मझ मुड़दा थ्यै जां तुवे अपड़ै पापी स्वभावा मझ पियौरै थ्यै, तेख्णी परमेश्वरै तुवे मसीह सिंउ जींतेरै जां असेड़ै सारै अपराध माफ क्यै। 14ऐ ऐतियु थियु जिहीं कि परमेश्वरै असेड़ै पापा केरा लिखौरा चिट्ठा मिटा दिता, जैस मझ असेड़ै खिलाफ आरोप लिखोरै थ्यै। जेख्णी मसीह क्रूसा पनि चाढ़ा, तेख्णी तेनी सै चिट्ठा जैस मझ असेड़ै पाप थ्यै सै पूरी तराहि सिंउ हठाय दित्ता। 15जां परमेश्वरै मसीहरै क्रूसै ला प्रधान जां अधिकारी हारियांणी दित्तै। जां क्रूसै ला तैन्हांं पनि जीत हासिल करि-करि तेन्हैरा मैहणुवां केरै सांमणै तमाशा बंणा।
16ऐठणीरै तेईनी कोई तुहांनि ऐ बोलिकरी, कि तुहां कितु खांणु पींणु आ, या त्यौव्हार मनांणेरै बारै मझ, या चाँदैरा त्यौव्हार, या आरामेरी धियाड़िरै बारै मझ तुवाड़ा न्याय करि करि तुहांनि धोखा ना दिया। 17केईनी कि ऐ सारै नियम ऐईंणै बाई गला केरै छांउठै सैयि आ, पण मसीह ऐ सच आ। 18-19कलीसिया अक शरीर आ जां यीशु मसीह तैस शरीरेरू मुंडक आ, तेठणिरै जरियै शरीरेरै सारा हिस्सा केरी देखभाल करियूंती जां सैक्यै किठै जोड़ियूंतै ता सैक्यै मोटियूंतै जिहीं परमेश्वर चांहथा कि सै मोटियो। कोसनि बि तुहां अपांणै अपमानित कांननी जां स्वर्गदूता केरी अराधना कांने ला नालायक बणना मेईं देया। ऐतियै मैहणु अपड़ै सुपना केरै बारै मझ शुणांतै रींहथै जै तेन्हैरी मानवीय सौचिरै कारण मूर्खताय बाऐ विचारै ला घंमडै ला भरी दींतै। तैन्हैं मसीह छडि दिता।
मसीह सेईतै जींणु जां मरनु
20जबकि तुवे मसीह सिंउ मरि गियै, जां संसारा पनि राज कांनारी आत्माय किना आजाद भौ ग्यै। ता फिरी तुवे केईनी अबै बि ऐन्हां नियमा केरा पालन कातै कि ऐम्हियां बि तुवे ऐस संसारेरै वशा मझ अत्तै? 21सैक्यै ऐतियै नियम बंणातै जिहीं कि किछ चीजै संभाअनि ना, किछ चीजै चखणी ना, किछ चीजै छूणी ना हालै बि तुहां ऐतिया नियमा केरा पालन कांना थ्या। 22ऐ सभ नियम कोस बि कंमेरै नत्तै, केईनी कि ऐ मैहणुवां केरी आज्ञाईया जां शिक्षाईया केरै अनुसार अत्तै। 23ऐन्हां नियमा मझ अपड़ि ईच्छाईरै मुताबिक बंणाउरी भक्तिरै रिवाज जां झूठी दीनता, जां अपड़ै शरीरा सेईतै कठोर व्यवहार कांना ऐ अक ज्ञानि भूंणैरा ढोंग काता, पण हकीकति मझ ऐक्यै नियम मैहणुवां तेन्हैरी बुरिया ईच्छाईया वशा मझ कांननी मजत ना कातै।
Currently Selected:
कुलुस्सियों 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
