2 कुरिन्थियों 8
8
सच्चै दिल सिंउ दान
1हे विश्वासी भाईयो, आंउ तुहां मैहणुवंनी परमेश्वरेरी तैस खुशखबरिरै बारै मझ शुणांणा चांहथा, जै मकिदुनिया शहरा मझियां विश्वासी भाईया केरी कलीसियै मझ शुणाउरी आ। 2जेख्णी बड़ी सारी मुश्किलिया मझ तैन्हांं केरी परीक्षा भुई, ता सैक्यै बड़ै खुश भुवै जां हलाँकि सैक्यै बड़ै गरीब थ्यै, तांबि तैन्हैं यहूदिया प्रदेशेरा विश्वासिया केरी मजत कांनेरै तेईनी सच्चै दिल सिंउ बड़ा पेईंसा दान दित्ता।
3जां तैन्हांं केरै बारै मझ मिंडी ऐ गवाहि आ, कि तैन्हांं किनि ज्योतु बि थियु, तेत किना बि जादा तैन्हैं अपड़ै सच्चै दिल सिंउ दान दितौरा। 4जां ऐस दाना दींतै टैंमा तैन्हैं यरूशलेम शहरा मझियां विश्वासिया केरी मजत कांनेरै तेईनी घड़ि-घड़ि बड़ी विनती की। 5“असै ना थियु सोचौरू, कि सैक्यै ऐहीं चारै दान दी सकतै।” तैन्हैं पेहिलै अपांणा प्रभुनी त्यागी दिता, फिरी तैन्हैं परमेश्वरेरी ईच्छाय सिंउ अपांणा असुनि दी दित्ता। 6ऐठणीरै तेईनी असै तीतुस समझा, कि जिहीं तेनी पेहिलै भलाईरै कंमा केरी शुरूवात क्यौरी थी, तिहियें तुहां मझ बि ऐस दान किट्ठा कांनेरै कंमा पूरा करि लिया। 7पण जिहीं हर गलै मझ मतलब विश्वास, वचन प्रचार कांना मझ या शिक्षा दींणेरी काबलियत, ज्ञान, जां हर प्रकारेरी कोशिशी मझ जां तैस प्रेमा मझ, जै तुवे असु सिंउ रखतै, ऐत मझ बधतै गांहथै; तिहियें ऐन्हां गरीब विश्वासिया केरी मजत कांनेरै तेईनी बि बधतै गहा।
मसीह सैयि बंणनु
8आंउ ऐठणीरै बारै मझ ता कोई आज्ञा ना दींता, पण जिहीं होरै लगन सिंउ कंम कातै, तैन्हांं केरा उदाहरण दी करि, आंउ तुवाड़ै प्रेमैरी सच्चाय परखणा चांहथा। 9तुवे असेड़ै प्रभु यीशु मसीहरा अनुग्रह जांणतै, कि तैस किनि सभ-किछ भौकरी बि सैक्या असेड़ै तेईनी असु सैयि कंगाल बंणी ग्या; ताकि असै आत्मिक तौर पन धनी भौ गहिया। 10-11ऐठणीरै तेईनी मिंडी ऐ तुवाड़ै तेईनी सलाह आ; कि तुवे अपड़ि जैस ईच्छाय पूरी कांनेरै तेईनी तियार थ्यै, तैस पूरी कांनेरै तेईनी ऐ होरू बि अच्छु आ, कि जैस कंमेरी तुहैं पिछलै एकि साला किना योजना बंणा करि शुरूवात क्यौरी आ; तिहियें ज्योति तुवाड़ी पुगत आ, तेठणिरै अनुसार ऐस योजनाय पूरी बि करा। 12केईनी कि अगर तुवाड़ै मंना मझ होरनियांनि दान दींणेरा विचार आ, ता तुवे तैस दाना दी सकतै, जै तुहां किनि आ; पण असै तेसैरी उम्मीद ना कातै, जै तुहां किनि गुंजाइश ऐ ना। 13आंउ ऐ ना चांहथा, कि होरनियां केरा जीवन आसान बंणाणेरै तेईनी तुवाड़ै जीवना मझ मुश्किली भौ गहिया; पण सभनियां किनि सभ बराबर भूंणु चेहिंथु। 14इस टैंमा तुहां मैहणुवां किनि जै जादु आ, तेनी ला तैन्हांं केरी तंगि दूर कांनी चेहिंथी; ताकि तैन्हांं केरी जरूरत पूरी भूंणै ला, जै तुहां किनि घटि गियु, तेनी ला तुवे, तैन्हां सिंउ बराबर भौ गहिया। 15जिहीं पवित्र शास्त्रा मझ लिखोरू आ; कि
“जेनि जादु बटौऊ, तैस किनि जादु ना निकोत्थु,
जेनि घट बटौऊ, तैस किनि किछ घट ना निकोत्थु।”
तीतुस कुरिन्थ नगरा मझ भेईजा
16परमेश्वरैरा धन्यवाद भुईया, जेनि तीतुसेरै मंना मझ तुवाड़ै तेईनी चिन्ता पेईदा की। 17जेख्णी असुवें तीतुसनी तुहां किनि गांहणेरै तेईनी बौलु, ता तेनी असेड़ि गल मनि लैई, जां बड़ा खुश भौ करि अपड़ि मर्जी सिंउ तुहां किनि चलि यौउरा 18असै तैस सिंउ होरै विश्वासी भाई बि भेईजै, जैन्हां केरू नाँ खुशखबरी प्रचार कांने ला सभनियां कलीसिया केरा विश्वासिया मझ फैलौरू आ; 19जां यौतुवै ना; पण कलीसियेरै मैहणुवें सैक्या नियुक्त बि केया, कि दान किट्ठा कांनेरै कंमेरै तेईनी असु सिंउ चलिया, जै दान यरूशलेम शहरेरा विश्वासिया केरै तेईनी किट्ठा केया; केईनी कि असेड़ि तैन्हांं विश्वासिया केरी मजत कांनेरी ईच्छा थी, ताकि परमेश्वरैरी महिमा भुईया। 20असै ऐन्हां गला केरै तेईनी सतर्क रींहथै, कि तीतुसा सिंउ तैस विश्वासी भेईजणै ला, जेसैरी सेवा असै कातै अत्तै, कोई तेसेरै बारै मझ असु पन दोष ना लईया। 21असैड़ा मकसद सिर्फ सैहै कम कांने अत्तै जै कंम प्रभुरी नजरी मझ ता ठीक अत्तै, पण मैहणुवां केरी नजरी मझ बि अच्छै भुईया; असै सिर्फ तैन्हांं कंमा अच्छै तरीकै सिंउ कांना पन अपड़ा ध्यान दींतै।
22जां ऐन्हां दोईयो सिंउ असै एकि होरै विश्वासी भाई भेईजतै अत्तै, जैस मझ असुवें बार-बार परखी करि जोश तकाउरा; पण अबै तुहां पन तैस बड़ा विश्वास आ; जेनि वजहि ला सैक्या हौरा जादा उत्साहित आ। 23अगर कोई तीतुसेरै बारै मझ पुछता, ता सैक्या मिंडा साउगी जां तुवाड़ै तेईनी अक तुहां सिंउ कंम कांनारा; जां अगर असेड़ै विश्वास कांनारा भाईया केरै बारै मझ पुछता, ता, सैक्यै कलीसियै किना भेईजोरै अत्तै, जैन्हां केरा जीवन मसीहरी महिमा कांनेरै तेईनी आ। 24ऐठणीरै तेईनी अपड़ा प्रेम जां असैड़ा सै गर्व जै तुहां पन आ; तैस कलीसियेरै सांमणै तैन्हांंनि सिद्ध करि-करि लुहाआ।
Currently Selected:
2 कुरिन्थियों 8: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
