2 कुरिन्थियों 7
7
1प्यारे विश्वासी भाईयो, केईनी कि परमेश्वरै असु अपड़ा बच्चा केरै रूपा मझ स्वीकार कांनेरा वायदा क्यौरा। ऐठणीरै तेईनी जै बुरै कंम असेड़ै शरीरा जां आत्माय अपवित्र बंणातै, तैन्हांं सभनियां बुरा कंमा कांने बन्द करि दिया; जां परमेश्वरैरा आदर करि-करि सच्चै दिल सिंउ पवित्र जीवन जिआ।
आनन्द जां पश्चाताप
2असुनि तुवे दिल सिंउ प्रेम करा, असै कोसकेरू किछ ना बिगाड़ोरू; असै कोस सिंउ कोई अन्याय ना क्यौरा जां ना असै कोस सिंउ कदि छल-कपट क्यौरा। 3आंउ तुहां दोषी बंणाणेरै तेईनी ऐ ना बोलता; केईनी कि आंउ पेहिलै बोलि बेठौरा, कि असै तुहांनि दिल सिंउ प्रेम कातै। असु अलग ना रींहणु, चाहे असै जिआ या मरिया। 4आंउ तुहां मैहणुवां सिंउ बड़ै आत्मविश्वास सिंउ बोलता, जां आंउ तुवाड़ै बारै मझ बड़ा खुश आ। असेड़ि सारिया परेशानियां केरै बावजूद बि तुहैं मूंनी पूरी तसल्ली दित्ती; जां अबै आंउ अपड़ै दुखा मझ बि बड़ी खुशी मनांता रींहथा।
5जेख्णी मीं त्रोआस शहर छडा जां मकिदुनिया प्रदेशा मझ पुज्जा, तेख्णी असै शारीरिक रूप सिंउ खिजि गियोरै थ्यै। केईनी कि असुवां हर जगाय बड़ी परेशानि झेलणी पेईथी; हर जगाय लड़ाई थी, जां मंना मझ डर थ्या। 6-7तांबि उदास मैहणुवंनी तसल्ली दींणै बाऐ परमेश्वरै तीतुस ऐड़ि भेईजि करि असुनि तसल्ली दित्ती; जां सिर्फ तेनी ऐईंणै ला ना; पण जै तीतुसै तुवाड़ै गेहरै प्रेमेरै बारै मझ मूंनी खबर शुणाय, कि किहीं तुवे दुखा मझ बि मिंडी चिन्ता कातै रींहथै, ता ऐ शुणि करि मूंनी बड़ी-ऐ खुशी भुई।
8केईनी कि बेशक अगर मिंडी चिट्ठी ला तुहांनि दुख लगा; पण तांबि ऐनि ला आंउ पछतांता ना, जिहीं पेहिलै पछताईंथ्या। केईनी कि मूं पता थ्या, कि ऐनि चिट्ठी ला जै दुख तुहांनि भूंणा, सैक्या थोड़ी देर तेईनी भूंणा। 9पण अबै आंउ खुश आ; पण ऐठणीरै तेईनी ना, कि तुवे दुखा मझ थ्यै; पण ऐठणीरै तेईनी खुश आ, कि तुहैं तैन्हांं दुखा केरी वजहि सिंउ पाप कांने छडि दित्तै; केईनी कि जै दुख तुहांनि थ्यै, सै परमेश्वरेरी मर्जी सिंउ थ्यै, कि असेड़ि तरफ सिंउ तुहांनि कोई नुकसान ना भुईया। 10केईनी कि परमेश्वरेरी भक्तिरा दुख ऐतिया पश्चाताप पेईदा काता; जेनि ला उद्धार भूंता। ऐ कोई दुखेरी गल ना; पण संसारिक चीजा केरा दुख कांने ला नरकेरी मोउत मेईंती। 11तुहां पता, कि परमेश्वरेरै तेईनी तुहैं जै दुख सहन क्यै, तैन्हैं ला तुहां मझ क्या-क्या बदलाव या; ऐतेई जोश बाई जल्दबाजी, अपड़ि सफाई दींणेरी ईच्छा, अत्याचारेरै खिलाफ गुस्सा, संकटा मझ ऐतेई सावधानी, मूं सिंउ मिलणेरी जल्दबाजी, सेवा कांनेरै तेईनी जोश जां गलत कंम कानारानि झट सजा दींणै बाऐ कंमै ला तुहैं ऐ साबित करि दित्तु, कि तुवे ऐन्हां कंमा मझ दोषी नत्तै। 12तां बि मीं ऐ चिट्ठी जै तुहांनि लिखोरी आ, सैकेई ना ता तैन्हांं केरी वजहि लिखि, जैन्हैं अत्याचार केया, ना तैन्हांं केरी वजहि लिखि, जैन्हां पन अत्याचार भुआ; पण ऐकेई चिट्ठी ऐठणीरै तेईनी लिखि, कि तुवाड़ा जोश जै असेड़ै तेईनी आ, सैक्या परमेश्वरेरै सांमणै प्रकट भौ गहिया। 13ऐठणीरै तेईनी असुनि बड़ा होंसला मैआ; जां असेड़ि हिम्मत जां खुशी तीतुसा तका करि होरी बि बधि गैई; केईनी कि सैक्या तुवाड़ै कारण बड़ा खुश भौ गियौरा थ्या।
14केईनी कि तेसेरै सांमणै मीं तुहां पन जै गर्व क्यौरा थ्या, तेनी ला आंउ शर्मिन्दा ना भुआ; केईनी कि जिहीं असै तुहां सिंउ सभ गलै सच-सच बोलोरी थी, तिहियें असैड़ा गर्व कांना बि तीतुसा किनि सच निकोत्था। 15जां जेख्णी तैस चैता ऐईंता, कि तुहैं तेसैरी आज्ञा मनि जां जेख्णी तुहैं मसीहरै सेवका सैयि तेसैरा स्वागत केया, ता तेसैरा प्रेम तुवाड़ै तेईनी होरा जादा बधि गांहथा। 16मूं बड़ी खुशी आ, कि तुहां पन मूं हर गलैरै तेईनी भरौसा।
Currently Selected:
2 कुरिन्थियों 7: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
