2 कुरिन्थियों 9
9
दान दींणेरै तेईनी मजत
1अबै यरूशलेम शहरा मझ विश्वासिया केरै तेईनी धन दींणेरी सेवायरै बारै मझ मूं तुहांनि लिखणैरी जरूरत ना। 2केईनी कि आंउ मजत कांनेरै तेईनी जै तुवाड़ी ईच्छा आ; तैस जांणता, तेनी वजहि ला आंउ तुवाड़ै बारै मझ मकिदुनिया प्रदेशा मझ रींहणै बाऐ विश्वासिया केरै सांमणै ऐ बोलतै गर्व काता; कि तुवे अखाया प्रदेशेरै मैहणु ता पिछलै एकि साला किना-ऐ मजत कांनेरै तेईनी तियार थ्यै जां तुवाड़ी ऐनि ईच्छाय ला तैन्हांं मझां बड़ै मैहणुवंनी मजत कांनेरी हिम्मत मेयि।
3पण आंउ तीतुस जां तैस सेईतै दुवां विश्वासी भाईया तुहां किनि ऐठणीरै तेईनी भेईजता, ताकि जै असुवें तुवाड़ै बारै मझ गर्व लुहाऔरा, सैक्या गलत साबित ना भुईया; पण जिहीं मीं बोलोरू आ, तिहियें तुवे यरूशलेम शहरेरा विश्वासिया केरी मजत कांनेरै तेईनी तियार बेशा। 4ऐहीं ना भुईया कि, अगर मकिदुनिया प्रदेशा किना किछ विश्वासी भाई मूं सिंउ ऐईछिया, ता तुवे दान दींणानि तियार-ऐ ना भुईया, ता भौ सकतु कि असैड़ा जै भरौसा तुहां पन आ, तेनी ला असै शर्मिन्दा भुईया, पण तुवे होरै बि ज्यादा शर्मिन्दा भूंणै। 5ऐठणीरै तेईनी मीं ऐ जरूरी समझु कि आंउ ऐन्हां त्रईयो विश्वासी भाईया सिंउ विनती करूं, कि सैक्यै असु किना पेहिलै तुहां किनि गहिया जां सै दान जै तुवे दिल खोलि करि दींतै, जेसेरै बारै मझ पेहिलै किना बोलि दितोरू थियु, तैस तियार करि रखा, ताकि ऐ जबरदस्ती ना, पण तुवाड़ी अपड़ि ईच्छा सिंउ दान दितौरा भुईया।
दान किहीं दींणा
6पण गल ता ऐ आ, कि जै थोड़ु तियु बांता, तैस थौड़ुऐ तियु बढ़णु बि; जै जादु बांता, तैस जादु बढ़णु बि। 7हर कोई बगैर कुनि दुखै या बगैर जबरदस्ती कांने, त्योतुवै दिया, ज्योतु तेनी दींणानि सोचौरू भुईया; केईनी कि परमेश्वर खुशी सिंउ दींणारा सिंउ प्रेम रखता। 8परमेश्वर तुहांनि ज्योति तुवाड़ी जरूरत आ, तेत किना जादु दींणा मझ सामर्थी आ, ताकि तुहां किनि अच्छै कंम कांनेरै तेईनी जरूरती किना जादु भुईया। 9जिहीं पवित्र शास्त्रा मझ लिखोरू आ;
“परमेश्वर जैन्हां जरूरत भूंती, तैन्हांंनि दिल खोलि करि दींता,
तेसैरी दया हमेशा बंणी रींहणी।”
10परमेश्वर हमेशा किसानानि बांणैरै तेईनी बी दींता, जां तैन्हांंनि खांणेरै तेईनी रोटी बि दींता। ता ऐहींयै चारै तैस सैकेई चीजै हासिल बि करांणी, ताकि तुवे दिल खोलि करि तैन्हांं केरी मजत करि सकिया जैन्हां जरूरत आ। 11तुवे हर तरह सिंउ आशीषित भूंणै, ऐठणीरै तेईनी तुवे हमेशा दिल खोलि करि दींणैरै तेईनी योग्य भुईया; जां जेख्णी असुवां तुवाड़ा खुलै दिल सिंउ दितौरा दान मैहणुवंनी दींणा, ता तैन्हांं मैहणुवां परमेश्वरैरा धन्यवाद कांना।
12केईनी कि ऐ सेवा पूरी कांने ला, ना सिर्फ परमेश्वरेरै मैहणुवां केरी जरूरत-ऐ पूरी भूंती, पण मैहणुवां केरी तरफ सिंउ परमेश्वरैरा बि बड़ा धन्यवाद भूंता। 13होरनियां केरै तेईनी दान दींणेरी ऐस सेवकाय साबित कांनु कि तुवे सच्चै अत्तै जां बड़ै मैहणुवां परमेश्वरेरी महिमा कांनी। केईनी कि तुहैं मनि लियौरू आ, कि यीशु मसीहरी खुशखबरी सच्ची आ। अबै तुवे ऐन्हां गला केरा पालन कातै। अबै गरीब विश्वासिया जां होरनियां सभनियां विश्वासिया केरी मजत खुलै दिल सिंउ कातै रिय्हा। 14जां तैन्हांं तुवाड़ै तेईनी परमेश्वरा सिंउ प्रार्थना कांनी। सैक्यै तुहां सिंउ प्रेम कातै, केईनी कि तैन्हांं पता, कि परमेश्वरै तुहां मैहणुवां पन बड़ा अनुग्रह क्यौरा। 15ऐईछा असै पिता परमेश्वरैरा तैस दांनेरै तेईनी धन्यवाद कातै, जेसेरै बारै मझ शब्दा मझ शुणांणु मुशिकल आ।
Currently Selected:
2 कुरिन्थियों 9: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
