1 तीमुथियुस 3
3
कलीसिये मझ अध्यक्ष
1ऐ गल सच आ कि अगर कौ कलीसियेरा अध्यक्ष बंणना चांहथा ता सै भलै कंम कांनेरी ईच्छा काता। 2ऐठणीरै तेईनी ऐ जरूरी आ कि तैस मझ ऐ गुण भूंणै चेहिंथै कि सै निर्दोष भुईया, अपड़ि लाड़िरै प्रति वफादार भुईया, धीरै वा भूंणा चेहिंथा, अपांणा काबु मझ रखणार भुईया, आदर कांनेरै योग्य भुईया, मेहमाना केरा आदर कांनार भुईया जां परमेश्वरैरा वचन अच्छी तराहि सिंउ शिख्रांणार भुईया। 3सै अक शराबी जां झगड़ियुंणार ना भूंणा चेहिंथा, पण सै दयालु जां शान्त स्वभावै वा भुईया जां पेईंसैरा लालची ना भुईया। 4सै अपड़ै परिवारा ठीक ढ़गै सिंउ चलांणार भूंणा चेहिंथा, जां तैस अपड़ै बच्चानि शिख्रांणु चेहिंथु कि सै हर गलै मझ आदर सिंउ तेसेरी आज्ञायरा पालन करिया। 5अगर कोई मैहणु अपड़ै परिवारा ठीक-ढ़गै सिंउ ना चला सकता, ता तैस परमेश्वरेरी कलीसियैरी देखभाल किहीं कांनी? 6सै मजबूत विश्वासी भूंणा चेहिंथा, नता मनचाह सै घमण्डी भौ गहिया जां परमेश्वरा फिरी तेसनी बि तिहियें सजा दींणी, जिहीं परमेश्वरै शैताननी घमण्ड कांना पन दित्थी। 7जां कलीसियै किना भेईर बि मैहणुवां मझ तेसैरी अच्छी इज्जत भुईया। ऐहीं ना भुईया कि मैहणु तेसेरै बारै मझ बुरी गलै बोलिया जां शैतान तैस जाला मझ ऐतियै फसाय लिया, जिहीं मैहणु जानवरा जाला मझ फसाय लींतै, ताकि सैक्यै बचि ना सकिया।
कलीसिया केरै सेवका केरी योग्यता
8तिहियें चारै सेवका बि ऐतिया भूंणु चेहिंथु जेन्हैरा मैहणु आदर करिया; सै ईमानदार भुईया, पियक्कड़ ना भुईया जां नीच कमाईरै लालची ना भुईया; 9तैन्हांं किनि अक साफ दिल भूंणा चेहिंथा जां विश्वासा मझ हमेशा बंणी रिय्हा कि परमेश्वरेरी दितोरी शिक्षाय सच्ची अत्ति। 10जेख्णी सेवका चुणतै, ता पेहिलै तैन्हांं ऐ साबित कांना देया कि तैन्हांं मझ सही गुण अत्तै कि ना। अगर तैन्हांं मझ कौ बि दोष ना मेईया ता सै सेवकैरा कंम करिया। 11तिहियें तेन्हैरी लाड़ी बि आदरेरै योग्य भूंणी चेहिंथी; होरनियां केरी निंदा कांनार ना भूंणी चेहिंथी जां शरीफ जां पूरी तराहि सिंउ भरौसेरै लायक भुईया। 12सेवक अपड़ि लाड़िरै प्रति वफादार भुईया जां अपड़ा बच्चा सेईतै-सेईतै अपड़ै घरानेरै होरनियां मैहणुवां केरा बि सही ढ़गै सिंउ देखभाल कांने वा भुईया। 13केईनी कि जै सेवकैरा कंम सही ढंगै सिंउ कातै, तेन्हैरा मैहणु आदर कातै जां सै यीशु मसीह मझ अपड़ै विश्वासेरै बारै मझ बड़ी हिम्मत सिंउ बोलि सकतै।
महान रहस्या
14हलाँकि आंउ आशा काता कि मूं जल्दी ताउ किनि ऐईंणु, पण ऐ गलै ताउनि ऐठणीरै तेईनी लिखता कि, 15अगर मिंडै ऐईंणा मझ देर भौ गांहथी, ता तुहां ऐस गलैरा पता भुईया कि परमेश्वरेरै परिवारा मझ मैहणुवां केरा बर्ताव केतिया भूंणा चेहिंथा। परमेश्वरैरा परिवार जीवित परमेश्वरेरी कलीसिया आ; ऐ तिहियें चारै सच्चिया शिक्षाईया केरा समर्थन कातै जां तैन्हांं बंणा रखतै जिहीं नींह जां थंम्भ घरानि सहारा दींतै जां तैस मजबूत कातै। 16ऐत मझ कोई शक ना कि असेड़ै विश्वासा मझ गहरा भेद आ;
मसीह एकि मैहणुरै रूपा मझ प्रकट भौरा
जां पवित्र आत्माय सै परमेश्वरैरा पुत्र साबित क्यौरा,
स्वर्गदूतै सै लधौरा जां परमेश्वरै सै स्वर्गानि चुकि नियौरा।
चैलै हर जगाय तेसेरै बारै मझ होरिया जातियानि खुशखबरी शुणाय जां
संसारेरै मैहणुवें तैस पन विश्वास केया।
Currently Selected:
1 तीमुथियुस 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
