1 तीमुथियुस 2
2
अराधना कांनेरै बारै मझ
1सभनियांं गला किना बधि करि आंउ अबै तुहां सभनियांं मैहणुवां सिंउ विनती काता कि सभनियांं मैहणुवां केरै तेईनी विनती, प्रार्थना, निवेदन जां धन्यवाद करा। 2राजा केरै तेईनी सभनियांं अधिकारिया केरै तेईनी प्रार्थना करा ताकि सै शांति जां हिफाजती सिंउ रींहणा मझ असेड़ि मजत करिया कि, जेनि ला असै परमेश्वरेरी अराधना कांना जां होरनियां सिंउ हमेशा सही बर्ताव करि सकिया। 3सभनियांं मैहणुवां केरै तेईनी ऐहीं-चारै प्रार्थना कांनी सही आ जां असैड़ा उद्धार कांने वा परमेश्वर ऐस स्वीकार काता। 4तेसैरी ईच्छा आ कि सभ जंणै सच्चाईरै बारै मझ जांणिया जां तेन्हैरा उद्धार भुईया। 5केईनी कि सिर्फ अकै परमेश्वर आ जां सिर्फ अकै मैहणु आ; जै परमेश्वरा जां मैहणुवां मझ मेल-मिलाप करि सकता। मतलब सै यीशु मसीह आ जै एकि मैहणुरै रूपा मझ पेईदा भुआ। 6मसीहै पापेरी जां मोउतिरी शक्ति किना सभनियांं मैहणुवां छडांणेरै तेईनी अपांणा बलिदान करि दित्ता जां तेसैरी मोउती ला परमेश्वरै सही टैमां पन ऐ साबित कियु कि सै सभनियांं मैहणुवां बचांणा चांहथा। 7ऐस मकसदेरै तेईनी परमेश्वरै आंउ खुशखबरिरा प्रचार कांनानि जां अक खास चैला भूंणेरै तेईनी चुणौरा। तेनी आंउ होरनियां जातियानि विश्वास जां सच्चाईरै बारै मझ शिख्रांणेरै तेईनी चुणा। आंउ झूठ ना बोता; आंउ सच बोता आ।
8आंउ चांहथा कि हर जगाय सभाय मझ मैहणु जै पवित्र जीवन जींतै, सैक्यै बिना गुस्सै जां झगड़ै किना अपड़ै हत्थ खड़ै करि प्रार्थना करियां करा।
9तिहियें आंउ चांहथा कि विश्वासी जनेनी शरीफ भुईया, जां तैन्हांं सही ढ़गेरै लिकड़ै लांणै चेहिंथै, जै तकांणै लायक जां मनणै लायक भुईया; ना कि छै भूंणैरा दिखावा कांनेरै तेईनी रंगा-रंगैरू शिर बंणाणु, सुन्नेरै गहणै लांणै, मोतिया केरै हार जां कीमति लिकड़ै लांणै। 10ऐठणीरी वजाय, तैन्हांं होरनियां मैहणुवां केरै तेईनी अच्छै कंम करि-करि अपांणा छै बंणाणा चेहिंथा, केईनी कि परमेश्वरेरी भक्ति कांनार जनेनियांनि ऐहै शौभा दींतु। 11जेख्णी मड़द विश्वासियानि शिख्रांता भुआ, ता तेख्णी सारिया जनेनियां चुप-चाप जां शरीफ बंणी करि शुणनु जां शिख्रनु चेहिंथु। 12आंउ इजाजत ना दींता कि जनेनी मड़दानि शिक्षा दिया या तैन्हांं पनि हुक्म चलाईया, पण सभाईया मझ चुप-चाप रिय्हा। 13आंउ ऐतियु ऐठणीरै तेईनी बोता, केईनी कि परमेश्वरै पेहिलै आदम बंणा, तेत किना बाद हव्वा बंणाय। 14होरी वजह ऐआ कि आदम शैतानेरै बहकावै मझ ना येईथ्या, पण जनेनी बहकावै मझ अईछी करि परमेश्वरेरी आज्ञा त्रोड़थी। 15पण जनेनी जन्म दींतै टैंमा बचाई गांहथी, अगर सै धीर रखि करि लगातार विश्वास, प्रेम जां पवित्रताय मझ मजबूत रिय्हा।
Currently Selected:
1 तीमुथियुस 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
