1 तीमुथियुस 1
1
नमस्कार
1ऐ चिट्ठी पौलुसेरी तरफ सिंउ आ, जै यीशु मसीहरा अक खास चैला आ। असेड़ै उद्धार कांने बाऐ परमेश्वर जां जै असेड़ि आशा मसीह यीशु आ मूंनी खास चैला बंणनैरा अधिकार दितौरा। 2आंउ ऐ चिट्ठी तीमुथियुसनी लिखता;
तु मिंडै तेईनी एकि पुत्रा समान आ, केईनी कि तु बि यीशु मसीह पन विश्वास काता, जिहीं आंउ काता। आंउ प्रार्थना काता कि पिता परमेश्वर जां असैड़ा प्रभु यीशु मसीह ताउनि अनुग्रह, दया, जां शांति दींता रिय्हा।
झूठे अगुवा केरै बारै
3आंउ ताउनि फिरी शुणांता कि मीं इफिसुस शहर छडि करि मकिदुनिया प्रदेशा मझ गांहणा किना पेहिलै ताउ सिंउ क्या विनती क्यौरी थी कि इफिसुस शहरा मझ बेशि करि जै झूठै शिक्षक अत्तै, तैन्हांंनि आज्ञा दै कि तैन्हांं झूठा नियमा शिख्रांणा बंद करा। 4जां तैन्हांं सिंउ बोला कि तैन्हांं झूठिया कहानियां जां अपड़ै पूर्वजा केरी बडी-बडिया गला पन टैंम बर्बाद मेईं करा, जैन्हैं ला वाद-विवाद भूंतै। ऐतियै झगड़ै परमेश्वरेरै कंम कांना मझ मजत ना कातै। परमेश्वरैरा कम सिर्फ ऐतियै मैहणुवें ला करि सकतै जै परमेश्वरा पन विश्वास कातै। 5तुहांनि ऐ आज्ञा दींणैरा मिंडा मकसद सै प्रेम पेईदा कांना, जै साफ दिल, निर्दोष अन्तरात्मा जां सच्चै निष्कपट विश्वासै ला पेईदा भूंता। 6जै झूठै शिक्षक अत्तै तैन्हैं ऐ कम कांने बंद करि दितोरै अत्तै जां बस बेकार गला केरै बारै मझ बोतै रींहथै। 7सै मूसेरी शिक्षाईया केरा व्यवस्थापक भूंणैरा दावा कातै, पण असलियत मझ सै किछ बि ना जांणतै कि सै कितु शिख्रांणैरी कोशिश कातै अत्तै जां बड़ै आत्म-विश्वास सिंउ अपड़िया गला पन अड़ोरै रींहथै। 8असु पता कि अगर मैहणु व्यवस्थाय ठीक ढ़गै सिंउ इस्तेमाल कातै ता सै अच्छै अत्तै। 9सै मैहणु जै परमेश्वरेरी व्यवस्थाय अनदेखा कातै जां ऐसेरी आज्ञायरा पालन ना कातै, सै मैहणु जै परमेश्वरेरी अराधना ना कातै जां जै लगातार पाप कातै, सै मैहणु जै दुष्ट अत्तै, सै मैहणु जै परमेश्वरैरा आदर ना कातै, अशुद्ध अत्तै सै मैहणु जै अपड़ै मयि-बबेरा जां होरनियां केरा खून कातै। 10व्यभिचारियानि, पुरूषगामियानि, अपहरण कांनार, झूठी कसम खांणार जां तैन्हांं सभनियांं मैहणुवां केरै तेईनी जां ऐठणीरै अलावा सच्ची शिक्षा सभनियांं विरोधिया केरै तेईनी बंणाउरी आ। 11ऐ सच्ची शिक्षा असेड़ै अदभुत परमेश्वरेरी तैस माहिमा बाई खुशखबरिरै मुताबिक आ जै मूनी होरनियांनि शुणाणेरै तेईनी दितोरी आ।
अनुग्रहरै तेईनी धन्यवाद
12असेड़ै प्रभु यीशु मसीहनी आंउ धन्यवाद दींता, जेनि मूनी शक्ति दित्ती; कि तेनी आंउ ईमानदार समझि करि अपड़ि सेवा कांनेरै तेईनी चुणा। 13हलाँकि आंउ ता पेहिलै मसीहरी निंदा कांनार, विश्वासिया सताणै वा जां निर्दयी मैहणु थ्या; तां बि परमेश्वरै मूं पन दया की, केईनी कि मीं अंणजांणै मझ जां अविश्वासेरी वजहि ला ऐ कम क्यौरै थ्यै। 14यीशु मसीह मझ असेड़ै प्रभुरा अनुग्रह, विश्वास जां प्रेम सेईतै मूं पन भुआ। 15ऐ गल सच आ जां हर तरह सिंउ मनणै लायक आ कि यीशु मसीह असु पापिया बचांणेरै तेईनी संसारा मझ या जां तैन्हांं पापिया मझ सभनियां बडा आंउ आ। 16पण मूं पन ऐठणीरै तेईनी दया भुई कि मूं सभनियें बडै पापी मझ यीशु मसीह अपड़ि पूरी सहनशीलता लुहाईया कि, जै मैहणु तैस पन अनन्त जीवनेरै तेईनी विश्वास करेलै तेन्हैरै तेईनी आंउ अक मिसाल बंणु। 17अबै अनंतकालैरा राजा, जै हमेशा जींता, जैस कौ ना तका सकता, तैस एकमात्र जां सच्चै परमेश्वरैरा आदर जां माहिमा युगानयुग तेईनी भूंती रिय्हा। आमीन।।
18मिंडै पुत्र तीमुथियुस, तैन्हांं भविष्यवाणियां केरै अनुसार जै पेहिलै तिंडै बारै मझ क्यौरी थी, आंउ ताउनि ऐ आज्ञा दींता ताकि तु तैन्हांं केरै अनुसार खुशखबरिरै तेईनी तिहियें अच्छी लड़ाई लड़ जिहीं कि अक अच्छा सिपाहि युद्धा मझ लड़ता। 19जां ताउ मसीह पन लगातार विश्वास कांना चेहिंथा जां तु सैहै कर जै ताउ पता कि सै ठीक आ, किछ मैहणुवें ऐत पन ध्यान ना दिता, जेसैरा नतीजा ऐ भुआ कि अबै सै मसीह पन विश्वास ना कातै। 20तैन्हांं मझां हुमिनयुस जां सिकन्दर मीं विश्वासिया केरी मंडली मझां भेईर करि दित्तै, जां सैक्यै शैतानेरै हवालै करि दित्तै ताकि सैक्यै शिख्रिया कि परमेश्वरेरी निंदा ना कांनी चेहिंथी।
Currently Selected:
1 तीमुथियुस 1: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
