2 थिस्सलुनीकियों 3
3
प्रार्थना कांनेरी विंनती
1हे विश्वासी भाईयो, अबै लाष्टी असेड़ै तेईनी प्रार्थना करा, ताकि असै झट हर जगाय पन प्रभु यीशु मसीहरै बारै मझ संदेश फैलाय सकिया जां मैहणु ऐत पन तेतिया-ऐ विश्वास करिया जेतिया तुहैं क्यौरा थ्या। 2जां प्रार्थना करा कि असु परमेश्वर बचाईया ताकि ऐ गुस्सैबाज दुष्ट मैहणु असैड़ा कोई नुकसान ना करि सकिया, केईनी कि बड़ै सारै मैहणु प्रभु यीशु मसीहरै ऐस संदेशा पन विश्वास ना कातै।
3पण तुवे परमेश्वरा पन पूरी तराहि सिंउ विश्वास करि सकतै; तैस तुवे आत्मिक तौर पन मजबूत कांने जां तुवाड़ी हिफाजत कांनी ताकि दुष्ट शैतान तुवाड़ा कोई नुकसान ना करि सकिया। 4जां असुवां प्रभु मझ तुहां पन भरौसा कि जै किछ असै तुहांनि कांनेरै तेईनी बोलोरू आ, तुवे तिहियें कातै अत्तै जां कातै बि रैहलै। 5असै प्रार्थना कातै अत्तै कि प्रभु यीशु मसीह तुवे ऐ समझणेरै काबिल बंणाणै कि परमेश्वर तुहां सिंउ क्यौता प्रेम काता जां परेशानियां केरै टैंमा तुवे बि तिहियें सहन करिया जिहीं मसीह सहन केईथियु।
कम कांनेरी जिम्मेवारी
6हे विश्वासी भाईयो, असै तुहां अपड़ै प्रभु यीशु मसीहरै अधिकारै सिंउ ऐ आज्ञा दींतै कि तुवे हर-एकि ऐतियै विश्वासी भाई किना अलग रिय्हा जै प्रभुरै कंमा मझ आलसी भूंतै जां जै शिक्षा तैन्हैं असुवां किना लियौरी आ तेसेरै मुताबिक ना चलतै। 7तुवे ऐपुवै बड़ी अच्छी तराहि सिंउ जांणतै कि तुहां तिहीं चारै जींणु चेहिंथु, जिहीं असै जिईंथ्यै, केईनी कि जेख्णी असै तुहां बिच रिहींथ्यै, ता असै आलसी ना थ्यै, पण कंम करींथ्यै। 8असुवें कोसेरै बि ऐठि मुफ्त मझ रोटी ना खई पण असै रात-धियाड़ी कंम कातै रिय्है, ताकि असु अपड़िया जरूरतिया केरै तेईनी तुहां मझां कोस पन बि निर्भर ना रींहणु पुईया। 9असै तकड़ी मैहनत की ऐठणीरै तेईनी ना कि असुनि तुहां किना मजत लींणैरा अधिकार ना, पण असै तुवाड़ै सांमणै अक मिसाल बंणना चांहथै थ्यै, ताकि तेसैरा तुवे पालन करि सकिया। 10जां जेख्णी असै तुहां सेईतै थ्यै, तेख्णी असुवें तुहांनि अक नवाँ नियम दित्थिया; अगर कोई कोस बि कंमा कांनेरै तेईनी नमां काता, ता तेसनी कोई बि रोटी मेईं दींतै।
11अबै असेड़ु शुणना मझ ऐईंतु आ कि तुहां मझां किछ मैहणु आलसी भौ गियोरै अत्तै; सै ऐपु बि कंम ना कातै जां होरनियां केरै कंमा मझ बि दखल दींतै। 12असै ऐतियै मैहणुवंनी प्रभु यीशु मसीहरै अधिकारा सिंउ ऐ आज्ञा दींतै जां तैन्हांं सिंउ विनती कातै कि सै शांति सिंउ कंम कातै रिय्हा, जां अपड़ि मैहनतिरी रोटी खईया। 13हे विश्वासी भाईयो, चाहै तुवे निराश भौ गियोरै भुईया फिरी बि भलाई कांनी मेईं छडतै।
14अगर कोई बि असेड़ि ऐसै चिट्ठी मझ लिखोरिया गला केरा पालन ना काता, ता तैस पन ध्यान दैई जां तैस किना अलग बेशै ताकि तैस शर्म मैहसूस भुईया। 15फिरी तुवे बि तैस सिंउ दुशमणा सैयि बर्ताव मेईं कातै, पण एकि विश्वासी भाई भूंणेरै नातै तेसनी समझाय कि जै तेनी क्यौरू आ तेतियु ना करिया।
लाष्ट नमस्कार
16आंउ प्रार्थना काता कि प्रभु जै शांति दींणारा, सै तुहांनि हर प्रकार सिंउ लगातार शांति दींता रिय्हा जां प्रभु लगातार तुहां सेईतै रिहा।
17आंउ पौलुस अपड़ै हत्थै ला ऐ नमस्कार लिखता कि हर एकि चिट्ठी मझ आंउ ऐनि तरीकै सिंउ लिखता ताकि सारा मैहणुवां पता लगी गहिया कि ऐ चिट्ठी मिंडी तरफि सिंउ आ। 18आंउ प्रार्थना काता कि असेड़ै प्रभु यीशु मसीहरा अनुग्रह तुहां सभनियांं पन लगातार बंणी रिय्हा।
Currently Selected:
2 थिस्सलुनीकियों 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
