1 पतरस 5
5
विजुर्गा जां जुवान छोकरूवनी संदेश
1किछ ऐतेई गलै अत्ति जै आंउ तेठणिरै विजुर्गानि बोलणा चांहथा, केईनी कि आंउ बि तुहां सैयि अक विजुर्ग आ। यीशु मसीह मीं ऐपु तैन्हांं दुखा सहन काता लधौरा। जेख्णी तैस फिरी दुबारे वापस ऐईंणु, ता आंउ बि तेसैरी महिमा मझ शामिल भूंणा। अबै आंउ तुहां सिंउ विनती काता; 2कि तैन्हांं विश्वासी मैहणुवां केरी देखभाल करा, जै तुहां किनि अत्तै जां जैन्हां केरी देखभाल कांनेरा जिम्मा परमेश्वरै तुहांनि दितौरा। ऐहीं तुवे अपड़ि मर्जी सिंउ करा, ना कि मजबूरी मझ; केईनी कि परमेश्वर बि ऐहीं चांहथा, कि तुवे खुश भौ-करि अपड़ै सच्चै मंन सिंउ ऐहीं करिया, ना कि पेईंसा कमूंणेरै लालचा मझ ऐहीं करिया। 3जैन्हां मैहणुवां केरा तुहांनि जिम्मा दितौरा, तैन्हां पन राजै सैयि हक मेईं जता; पण विश्वासिया केरै तेईनी अक अच्छा उदाहरण बंणा। 4जेख्णी प्रभु यीशु मसीह जै असैड़ा मुखिया जां पुव्हाल आ, तैस दुबारे वापस ऐईंणु, ता तैस असुनि ऐतिया ईनाम दींणा, जेसैरी चमक कदि ना मुकणी। 5ऐहियें चारै तुहां जुवान मैहणुवां बि वुजुर्गा केरी आज्ञायरा पालन कांना चेहिंथा। तुहां सभनियां प्यार सिंउ योकिया केरी मजत कांनी चेहिंथी; केईनी कि पवित्र शास्त्रा मझ लिखोरू आ कि
“परमेश्वर घमण्डी मैहणुवां केरा विरोध काता,
पण दीन मैहणुवां पन अनुग्रह काता।”
6ऐठणीरै तेईनी तुवे नम्र भौ-करि अपांणा शक्तिशाली परमेश्वरेरै हत्था मझ दी देया, ऐहीं कांने ला तुवे तैस स्वर्गा मझ आघै कांने। 7तुवे परमेश्वरा किनि अपड़ि सारी परेशानि जां चिन्ताय शुणा, केईनी कि तैस असेड़ु चितैंण आ। 8समझदार मैहणुवां सैयि सतर्क भौ-करि बियुझै बेशा; केईनी कि असैड़ा दुशमण शैतान, एकि गरजतै शैरा सैयि असु पन हमला कांनानि फाड़नानि जां खांणनी तियार भूंता बेठौरा, कि असै परमेश्वरेरी आज्ञा ना मनियां। 9तुहां अपड़ै विश्वासा मझ मजबूत भौ-करि ऐ सौचि करि तेसैरा मुकाबला कांना चेहिंथा; कि जै विश्वासी भाई इस संसारा मझ रींहथै अत्तै, शैतानेरी गल ना मनि करि ऐतियै दुख सहन कातै अत्तै, जेतियै दुख तुवे सहन कातै अत्तै। 10परमेश्वर जै पूरी तरह सिंउ अनुग्रह ला भरौरा, तेनियें परमेश्वरै असै यीशु मसीह मझ, तेसेरी अनन्त महिमा मझ शामिल भूंणेरै तेईनी शदाउरै अत्तै; परमेश्वरा तुवे थोड़े तियै टैंमेरै तेईनी दुख सहन कांना किना बाद पवित्र बंणा दींणै ताकि तुहां मझ कोई बुराई ना रिय्हा, ताकि तुवे अपड़ै विश्वास मझ मजबूत भौ-करि अडिक रैहि सकिया। 11परमेश्वर आदर कांने लायक आ; केईनी कि तेसैरी सामर्थिरा कदि बि अन्त ना भूंता। आमीन।
लाष्ट नमस्कार
12मीं ऐ हल्की तैई चिट्ठी सिलवानुस भाईरी मजति ला लिखि जां तुहांनि भेईजि। आंउ तैस मसीह मझ अक विश्वास कांने लायक भाई सैयि मनता। मिंडा ऐस चिट्ठी लिखणैरा मकसद तुहांनि हिम्मत दींणी आ जां तुहांनि यकीन दिवांणा, कि जै ऐत मझ लिखोरू आ, ऐ असेड़ि गवाहि आ, कि परमेश्वरैरा सच्चा अनुग्रह ऐ लिखोरै वचन अत्तै; ऐन्हां वचना मझ तुवे मजबूत भौ-करि बेशा। 13बेबीलोन शहरा (रोम) मझ जै विश्वासी भाई अत्तै, सैक्यै तुहांनि नमस्कार बोलतै अत्तै; जै परमेश्वरै चुणोरै अत्तै, जिहीं तेनी तुवे चुणोरै अत्तै। मरकुस बि जै मिंडै पुत्रा सैयि आ, सैक्या बि तुहांनि नमस्कार बोलता। 14योकियानि प्रेम सिंउ नमस्कार करा। आंउ प्रार्थना काता, कि परमेश्वर हर तैस मैहणुनी शांति दिया जै मसीहरा।
Currently Selected:
1 पतरस 5: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
