याकुब 5
5
अमीर मैहणुवंनी चेतावनी
1अमीर मैहणुवो शुणा, तुहां मैहणुवां विलाप कांना चेहिंथा, केईनी कि तुहां पन मुश्किलै ऐईंणै बाई अत्ति। 2तुवाड़ा धन नाश भौ गांहणा तुवाड़ै लिकड़ै कीड़ै खराब करि छडै। 3तुवाड़ै सुन्नै- चांदी मझ ख्रेयि लगी गेयि; तैस ख्रेयि तुवाड़ै खिलाफ गवाहि दींणी, जां आगी सैयि तुवाड़ु मास खा छडणु; तुवाड़ै जरियै जमा क्यौरा खजाना न्याएरी धियाड़ी तुवाड़ै खिलाफ सबूत बंणी करि खड़ा भूंणा। 4तका, जैन्हैं मजूरै तुवाड़ी पट्टि बढि, तैन्हांं पट्टिया मझ कम कांनारै मजूरा केरी लैरी दींणेरी आवाज शुणा, जैन्हां सिंउ तुहैं तेन्हैरी मजूरी दींणनी नमां क्यौरा, जां फसल बढणारा केरी रूणैरी आवाज सैनाय केरै प्रभु शुणि ल्यौरी आ। 5तुहां मैहणुवां धरती पन सुखा मझ जां भोग-विलासा मझ जीवन जियौरा; ऐहीं करि-करि तुवे तैन्हांं जानवरा सैयि अत्तै, जैन्हां मारी करि खांणा किना पेहिलै हट्टा-कट्टा बंणातै। तिहियें चारै तुवे बि जांणतै कि तुवाड़ा न्याय भूंणारा। 6जै मैहणु अपड़ा बचाव ऐपु ना करि सकतै, सैक्यै मैहणु तुहैं दोषी बंणाय जां मारी बि छडै।
दुखा मझ धीर धरा
7ऐठणीरै तेईनी प्यारे विश्वासी भाईयो, प्रभु यीशु ऐईंणा तेईनी धीर रखा, तैन्हांं किसाना केरै बारै मझ सौचा जै ठडिंरी जां गर्मीरी झड़िरै तेईनी बड़ै धीर सिंउ भाअ कातै, ताकि फसल मोटियो जां बढियूंणेरै तेईनी तियार भुईया। 8तिहियें-चारै धीर धरा जां उम्मीद मेईं छडा, केईनी कि प्रभु जल्दी ऐईंता। 9हे विश्वासी भाईयो, योकिया पनि दोष मेईं ला, ताकि तुहां पन दोष ना लईयो; तका प्रभुरी न्याय कांनेरी धियाड़ि नीड़ आ। 10विश्वासी भाईयो, तैन्हां भविष्यवक्ता अपड़ा आदर्श समझा जैन्हैं प्रभुरै नाँईयां मझ गलै कातै दुख सहन क्यै जां धीर रखा। 11तैन्हांं मैहणुवंनी असै बड़ा आदर दींतै, जै धीर धरि करि दुख सहन कातै रींहथै। तुहैं मैहणुवें अय्युबैरै धीरैरै बारै मझ शुणौरू आ जां तुहां पता कि प्रभु अंत मझ तेसैरी किहीं मजत की, जेनि ला ऐ प्रकट भूंतु कि प्रभु क्यौता दयालु जां करूणाय ला भरौरा। 12पण हे मिंडै विश्वासी भाईयो, सभनियां बडी गल ऐ आ कि तुवे कसम मेईं खांतै; ना ता स्वर्गेरी, ना धरतिरी, ना कोसक्यै होरी चीजेरी। तुवाड़ी गल हाँ ऐरी हाँ मझ जां नां ऐरी नां भुईया, ताकि परमेश्वर तुहां दोषी ना बंणाईया।
प्रार्थनायरी शक्ति
13अगर तुहां मझां कोई दुखा मझ भुईया, ता सै प्रार्थना करिया; अगर कोई खुश भुईया ता सै स्तुति बाऐ भजन लईया। 14अगर तुहां मझां केणुक्या बिमार भुईया ता कलीसिया केरै अगुवे शदा जां सैक्या प्रभुरू नाँ लैकरी तैस पन तैल मयि करि तैस सिंउ प्रार्थना करिया। 15जां विश्वास सिंउ क्यौरी प्रार्थनाय ला बिमार मैहणु बचि गांहणा जां अगर तेनी पाप बि क्यौरै भुवै ता परमेश्वरा तेसेरै पाप माफ कांने। 16ऐठणीरै तेईनी तुवे मैहणु योकिया केरै सांमणै अपड़ै-अपड़ै पाप मनि ल्या जां योकिया केरै तेईनी प्रार्थना करा, ताकि तुवे भलै-चंगै भौ गहिया; धर्मी मैहणुरी प्रार्थना असरदार जां सामर्थी आ। 17भविष्यवक्ता ऐलिय्याह बि ता असु सैयि दुख-सुख भोगणै वा अक मैहणु थ्या जां तेनी अपड़ै पूरै मंन सिंउ प्रार्थना की कि झड़ी ना पुईया ता साढ़ै त्रियां साला तेईनी झड़ी ना यैई। 18तेनी दुबारे प्रार्थना की ता असमांणा किना झड़ी यैई जां जमींनि मझ फसलि भुई। 19हे मिंडै विश्वासी भाईयो, अगर तुहां मझां कोई विश्वासी भाई सच्चाईरी बत्तै किना भटकि गहिया जां जै कोई तेसनी मंन बदलणा मझ मजत करिया। 20ता तुहां ऐ पता भूंणा चेहिंथा जां जै कोई तेसनी मंन बदलणा मझ मजत करिया, ता तैस अक पापी नरकेरी मोउती किना बचांणा, जां पिता परमेश्वरा तेसेरै बड़ै पाप माफ कांने।
Currently Selected:
याकुब 5: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
