1 कुरिन्थियों 4
4
मसीहरा खास चैला
1ऐठणीरै तेईनी मैहणु असुवां यीशु मसीहरै सेवक जां परमेश्वरेरै भण्डारी समझिया, जैन्हांनि खुशखबरिरी गुप्त सच्चाई समझांणैरा कंम दितौरा। 2जैसनि भण्डारिरा कंम दितौरा, तैस किना ऐ आशा भूंती कि सैक्या विश्वासयोग्य भुईया। 3आंउ अपड़ै तेईनी चिंता ना काता, कि तुवे या होरै मैहणु बोलतै कि आंउ विश्वासयोग्य आ या ना। ऐड़ि तेईनी कि आंउ बिना बोलता कि आंउ विश्वासयोग्य आ या ना। 4केईनी कि मिंडा जम्हीर मूं कोस बि गलै मझ दोषी साबित ना काता, पण ऐनि ला आंउ निर्दोष साबित ना भूंता, केईनी कि मूं परखणार प्रभु आ।
5ऐठणीरै तेईनी प्रभु वापस ऐईंणा तेईनी कोसेरा बि न्याय मेईं करा। तैस अच्छै तरीकै सिंउ सैकेई सारी गलै शुणांणी जै मैहणु सौचतै जैन्हां केरै बारै मझ हौरा कौ ना जांणता, तैस तेन्हैरै इरादै प्रकट कांने जै तेन्हैरै दिला मझ अत्तै। तेख्णी परमेश्वरेरी तरफि सिंउ सभनियांं केरी तारीफ भूंणी।
6हे मिंडै विश्वासी भाईयो, मीं तुवाड़ै फायदेरै तेईनी अपड़ा जां अपुल्लोसैरा उदाहरण दित्ता, ताकि तुवे असु किना ऐ शिख्रा, कि पवित्र शास्त्रा मझ जै लिखोरू आ, तेत किना परि मेईं गहा। ऐ अच्छु ना, कि तुवे एकि अगुवेरा आदर करा, जां हौरैरा अपमान करा। 7केणु बोलता कि तुवे होरनियां किना महान अत्तै? जै किछ बि तुहां किनि आ, सैक्यु परमेश्वरै दितोरू आ, ता तेत पन तुवाड़ा घमण्ड कांनेरा कोई हक ना बंणता।
8तुहां लगतु कि जै आत्मिक रूप सिंउ जरूरी आ, सै सभ-किछ तुहां किनि आ। तुहां लगतु कि तुहां किनि सैक्यै वरदान अत्तै, जै पवित्र आत्मा मैहणुवंनी दींता। अगर तुवे सौचतै अत्तै कि असु बगैर तुवे राजा सैयि शासन कांना लगी प्यौरै अत्तै; ता मूं बड़ी खुशी भूंणी कि हकीकत मझ तुहैं राजा सैयि शासन कांना शुरू करि दितौरा, ताकि असै बि तुहां सिंउ शासन करि सकिया। 9मूं ऐहीं लगतु आ, कि परमेश्वरै असु खास चैलानि विजय यात्राय मझ मोउतिरी सजा मेऔरा केईदिया केरै समान सभनियांं लाष्टी जगाय पन रखौरै अत्तै। असै सारै संसारेरै मैहणुवां केरै सांमणै जां स्वर्गेरै स्वर्गदूता केरै सांमणै तमाशा बंणी गियोरै अत्तै।
10मैहणु असुवां मूर्ख मनतै, केईनी कि असै मसीहरै बारै मझ उपदेश दींतै, पण तुवे गलती सिंउ सौचतै कि तुवे योउतै बुद्धिमान मसीही अत्तै! बड़ै सारै मैहणु मनतै कि असुवां किनि कोई अधिकार ना। पण तुवे गर्व सिंउ बोलतै कि तुहां किनि परमेश्वरेरी शक्ति आ। मैहणु असैड़ा आदर ना कातै पण सै तुवाड़ा आदर-सम्मान कातै। 11असै आज तेईनी भ्रुख्णै-त्रिशणै फटै-पुरांणै लिकड़ा मझ अत्तै जां असु सिंउ बुरा बर्ताव कांना लाउरा जां असु किनि बेशणेरै तेईनी घर बि ना। 12जां अपड़ै हत्थै कम करि-करि मैहनत कातै, मैहणु बुरा बोलतै, असै आशीष दींतै, सै सतांतै, असै सीढ़तै। 13सै मैहणु असु बदनाम कातै, जां असै तैन्हांं सिंउ विनती करि गल कातै, ऐड़ि तेईनी कि हालै बि सै मैहणु असैड़ा आदर ना कातै; सै बोलतै कि असेड़ि कोई कीमत ना।
चेतावनी
14आंउ तुहां लज्जित कांनेरै तेईनी ऐ गलै ना लिखता, पण मिंडा मकसद तुहां सही बत्तै अंणनेरा आ, केईनी कि तुवे मिंडै बच्चै समान अत्तै, जैन्हां सिंउ आंउ प्रेम रखता। तुहांनि चेतावनी दींता, 15बेशक मसीह मझ तुहांनि बत्त शुणांणार हजारों अगुवे भुईया, पण सिर्फ आंउ ऐ पिता समान आ, केईनी कि आंउ पेहिला मैहणु आ, जै तुहां किनि खुशखबरी लै करि या, जेनि ला तुहैं यीशु मसीह पन विश्वास केया।
16ऐठणीरै तेईनी आंउ तुहां सिंउ विनती काता, कि मूं सैयि मसीह मझ अपड़ा जीवन जिआ। 17ऐठणीरै तेईनी मीं तीमुथियुस जै प्रभु मझ मिंडा प्रिय आ जां भरौसै लायक पुत्र आ, सैक्या तुहांनि याद दिवाला कि मसीहरा चैला भूंणेरै नातै आंउ केतियै कंम काता जां किहीं-चारै जीवन जींता। जिहीं कि आंउ हर जगाय हर विश्वासिनी शिक्षा दींता। 18तुहां मझ किछ मैहणु सौचतै, कि मूं तुहां सिंउ मिलणैरै तेईनी ना ऐईंणु, ऐठणीरै तेईनी सैक्यै घमण्डी भौ गियोरै अत्तै।
19पण अगर प्रभुरी ईच्छा भुई ता मूं तुहां किनि जल्दी चलि ऐईंणु जां त्यो-तेईनी ऐन्हां घमण्डिया केरी शिक्षा ना, पण तेन्हैरी शक्तिरा बि पता ला लींणा। 20केईनी कि परमेश्वरैरा राज्य सिर्फ बड़ी सारी गलै कांनी नत्ती; ऐ परमेश्वरेरी सामर्थ्य किना जींता आ। 21क्या तुवे ना चांहथै कि जेख्णी आंउ ऐईछूं ता कितु करूं? क्या आंउ तुहां किनि शौठा लै करि ऐईछूं या प्यार जां नम्रता बाई आत्मा सिंउ ऐईछूं?
Currently Selected:
1 कुरिन्थियों 4: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
