YAOGYAW 21
21
Lox Yaogyaw Kheu Hoik Pex Nawh
1Siyiex eue, ka daux riang rao pa tawx Maix, Simiang gaux rhawm gaux rhi mai ka daux pa taoh Maix kied gaux rhawm gaux rhi gaux rhi heue. 2Maix caux rhawm mai tawx awm pa lo nawh ka daux rhawm tix, Maix ang thiang ti tik ka lox pa rawg nawh bwan ka jheeh heue. 3Grawh grawng nawh, Maix tawx bwanson pa kied mhawm mai Maix ceep mhok khri ka piang kaing Nawh heue. 4Nawh rawg bwanson krax pa im ju mai Maix tawx krax pa lang ju leeing ju heue. 5Nawh ting min plakngai kheu krax pa taoh Maix mai tawx min plakngai Maix mai sibrawm pa ting deuh ka piang nawh heue. 6Maix hoik ciak ti deuh bwanson leeing ju ka Nawh mai kieh Nawh kied gaux rhawm gaux rhi sivoe ngai Maix heue. 7Grawh grawng nawh, simiang deuh rhawm ka Siyiex mai Nawh kaux cong leeing ju, kheu bwanson Siyiex Cao pa ting lhaong khaing khawmuik heue. 8Taix Maix tak sipub ka pui pa koeng ka Maix khawmuik mai taix khawn dawm Maix tak sipub ka pui pa koeng pa khoi ka Maix heue. 9Yam lih pa song rhawm Siyiex, kieh kix lih mawh awm glah ngu, mawh kheu kied song rhawm Siyiex mai tak bleet kix mai tak sang gleeing ti tik kix ka daux ngu heue. 10Maix tak yieh ti tik ru kix ka piang haktiex mai tak yuh kawn praix kix laux leeing ka sinax kawn pui heue. 11Grawh grawng nawh, kix keud ti yuh pa ang mhawm tang plak ka Maix, viang mawh nan, ceu pa nieb keud kix ti yuh khankix, lih ti mawh pa giex going heue. 12Grawh grawng nawh, Maix kieh kix deeh veeh ti hu plak khaix tix mai Maix nyeu te ka pakngai kix heue. 13Siyiex eue, kieh yaogyaw ka Maix, kheu riang rao sibrawm Maix mai ex rhax lai yaogyaw ka Maix heue.
Currently Selected:
YAOGYAW 21: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
