YAOGYAW 22
22
Lox Kok Yam Khi Rhawm Mai Lox Yaogyaw
1Siyiex Aux, Siyiex Aux, Maix lai tik vud Aux yuh ka mawx? Yam kok yo Aux Maix, sonsang taoh ka Aux, #Mat 27:46; Mak 15:34 Maix lai ot singai khaing Aux yuh ka mawx? 2Siyiex Aux eue, yam kok yo Aux Maix, yam pon singaix Maix ang pawk lox Aux mai yam ponsawm kawx, Aux kok yo Maix mai aux ang yaox dee laux dee lee tix heue. 3Maix mawh Cao pa singax singeh, pa ot ka daux pa yaog yaw pui Isarelax heue. 4Tax du ex khankix, deuh rhawm ka Maix, mawh kheu kix deuh rhawm ka Maix, Maix tom taoh kix heue. 5Kix kok yo ka Maix mai hoek krax taoh mai Maix kieh kix luan khaing krax pa kaig tua heue. 6Phan mawh aux, ang mawh pui, mawh ngie viag mai dee sa lao pui mai dee yuh pui khawmuik pa ang ceu ang cag kah heue. 7Can pui pa yaox ka aux khawmuik, nyiah aux mai kix blex dak tix mai vut vied kaing kap tix#Mat 27:39; Mak 15:29; Luk 23:35 heue. 8Kix ah nin, nawh deuh rhawm ka Siyiex, sonsang taoh nawh luan heue. Mawh kheu khaw rhawm Nawh Cao ka nawh kieh taoh nawh lih heue.#Mat 27:43 9Maix kieh aux deuh rhawm ka Maix, tom yam bluh Maix aux lih khaing vaig miex tix mai yam kawn peuex aux teeh miex tix heue. 10Aux hoek ka daux tawm taix Maix tom yam keh mai Maix hoik dawg mawh Siyiex aux tom yam ot aux ka daux vaig miex tix heue. 11Paw lai ot singai khaing aux, grawh grawng nawh, krax khi rhawm hoik dex mai aux mai pui pa teem aux ang koe tix kaux kawx. 12Mawie mhaing, mawie praix rob vung viang aux tom nie mai mawie praix pa ting riang ting rao pa koe ka daux meung Bashan kawx, rob vung viang aux heue. 13Kix ang jheeh tix awm sivai sangsi pa graoh mai rud kiied ti ih heue. 14Kix klup ti tik aux, piang tiex awm rawm, si-ang siawp aux kawx, hoik tang hu, rhawm aux kawx, ceh hu awm bee kax, ka daux naok aux heue. 15Riang rao aux hoik hit kroh hu awm aw tiex, dak aux kawx, hoik khlieb hu mai si-ang kap heue. Hoik kieh aux rau daux phawng tiex tom sidah yum heue. 16Cub sox khankix rob vung viang aux mai cub pui pa caox khankix kawx, hoik rob vung viang aux mai suat taix caong aux doh heue. 17Aux hoik pon simin ka si-ang tokaux aux mai kix maong ti jhak ka aux heue. 18Kix teei kraung ceep aux gwieh ti ih mai sibex aux kawx, kix nieb ti yaox heue.#Mat 27:35; Mak 15:24; Luk 23:34; Yo 19:24 19Viang mawh kawx nan, Siyiex eue, paw lai ot singai khaing aux liak. Maix pa mawh Cao riang rao aux eue, nied ti hoek laung mai teem aux liak. 20Taoh ju aux khaing lawm vaig mai taoh pui pa moh aux khankix lih khaing daux tawm taix sox khankix liak. 21Taoh aux lih khaing jheeh sivai sangsi khankix liak mai deeh pawk lox aux yam kok yo aux Maix ka daux rung mawie riad liak. 22Aux tak krai grawng Maix ka puxaik aux khankix heue. Aux tak yaogyaw Maix ka sinax pui hun khankix heue.#He 2:12 23Pui pa lhat graung ka Siyiex khankix eue, yaogyaw ka Nawh Cao heue. Doeh ru Yakop khawmuik eue, yaog min plakngai Nawh ting heue. Ceu pui Isarelax khankix eue, lhat graung ka Nawh Cao heue. 24Grawh grawng nawh, Nawh Cao ang nieb yuh pa ang cee ang cak ka pui pa hot sibhawm mai pa kha rhawm, Nawh ang veeh ngai khaing kix mai Nawh Cao nghiet ka lox pa rawg mhaing kix heue. 25Aux yaogyaw ka Maix ka daux sinax pui hun mai aux hawt yuh sijax mukheu awm pa hoik kham aux ti yuh sivoe ngai pui pa lhat graung ka Maix heue. 26Pui pa hot sibhawm tak yaox ti sawm tom sak heue. mai pui pa sawg ka Siyiex khankix tak yaogyaw ka Nawh Cao heue. Kieh rhawm pex koe riang rao jheung jheung liak. 27Dee sidah haktiex khawmuik, tak sang doh keud mai deeh tieh tix hoek ka Siyiex, pui kuceu khawmuik, tak sang krub plak sivoe ngai Maix heue. 28Grawh grawng nawh, piang haktiex khawmuik, hoik mawh meung cie Nawh mai Nawh Cao kwang ka piang pui khawmuik heue. 29Can kix pa mi pa koe khankix, deuh rhawm ka pa ih tix mai can kix pa hu daux phawng tiex ang krox ka ju tix, kix tak grux ngawng ti krub ka Nawh Cao heue. 30Doeh ru kix kawx, tak sang krub ka Nawh Cao mai krai grawng Siyiex ka pui leeing ju heue. 31Kix tak sang deeh lih hoek ti plak jhi grawng pa rahsee Nawh Cao ka kix pui pa tak sang keh khankix heue.
Currently Selected:
YAOGYAW 22: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
