KALATIX 6
6
Klawm Glawm Paox Tix
1Puxaik khankix eue, phan krup pui tix kaux kaux ka daux phimap pa yuh nawh, pex pa kawn dex mai khuan, khaw ti viex rhawm awn pa mhawm ti deeh cox cai nawh mhawm heue. Deeh gi ka tokaux tix, ha maix kox hoek ka krax nyaw glaw heue. 2Tix kaux lai tix kaux klawm glawm paox tix mai kieh lox lai beenli Cao Khrit naog kah heue. 3Phan pui tix kaux kaux ce tokaux tix mawh pa laoh lie, yam ang nawh mawh tidtix, nawh deeh pie ka tokaux tix tiru heue. 4Kieh kaux pui mawx kaux pui an tiag cheu ti yaox kaing pa yuh tix phan yuh nan nawh tak koe min pakngai ka grawng tokaux tix khaing, mai ang yaw rangdi ka tang kaux heue. 5Grawh grawng nawh kaux pui mawx kaux pui an tak lai klawm glawm tokaux tix heue. 6Kieh kaw pa pon krax gau ka daux gumlox bwan, gwieh ti tawx ceu pa mhawm can pa koe tix ka cao gau ka nawh heue. 7Paw kieh pie ka tokaux tix, ang doh nieb pon yuh pa ang cee ang cak ka Siyiex heue. Grawh grawng nawh pui rhuat simie ceu pa yuh ka mawx ang ah, nawh tak deeh vawg ceu an heue. 8Kaw pa rhuat ka daux nex nham tokaux tix, tak sang deeh vawg pa cux sium khaing nex nham heue. Kaw pa rhuat ka daux Khuan Cao, tak sang deeh vawg ju leeing ju khaing Khuan Cao heue. 9Ex paw kieh laux rhawm ka ceu pa yuh pa mhawm mhiem, grawh grawng nawh yam hoek bawg yam ex tak sang pon ti vawg, phan ex ang khrup rhawm heue. 10Mawh kheu in, yam yaox ex dee pon ti yuh, kieh ex yuh ceu pa mhawm ka pui khawmuik mai nie lheu mawh ka kix pa mawh pui geh nyiex krax yum rhawm heue.
Lox Rien Rhawm Mai Lox Nawb
11Pex yaox grawng aux hoik tiiem ngai lai pa ting miex ding ka pex, ka khaix taix tokaux aux heue. 12Can pui pa simie ti ao min pakngai ka daux nex nham khankix khin ti kieh pex pat hak, son ang kix sang yaox ti geu krax tuktiak son khaox lhak Cao Khrit heue. 13Grawh grawng nawh pie tokaux kix pa hoik rieb ti teei been pa pat hak khankix kawx ang priex ti hawt ka lox lai beenli, kix simie ti kieh pex pat hak, son sang pon kix ti yaw rangdi ka daux nex nham pex heue. 14Paw kieh aux yaw rangdi ka tix ceu kawx lheu khaing khaox lhak Simiang ex Yesux Khrit, haktiex hoik yum ka aux mai aux hoik yum ka haktiex heue. 15Ka daux Yesux Khrit pa pat hak ang ah, pa ang pat hak ang ah, ang koe bwanson tidtix, ceu pa koe bwanson mawh ngie pa mawh pui pa khraox heue. 16Can kix pa sang hawt hu ka daux lox tawm in, kieh pa nhim mai pa caux rhawm koe ka piang kix mai ka piang Isarelax cie Siyiex heue. 17Jah tom yam in, paw kieh pui lak lheut ka aux tix kaux kawx, mawh kheu aux hoik peeh khaix rhoi pa hoik yuh ka Yesux daux tokaux aux heue.
18Puxaik khankix eue, kieh bwanson Simiang ex Yesux Khrit ot tau mai khuan pex liak. Amen.
Currently Selected:
KALATIX 6: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
