KALATIX 5
5
Kaux Cong Daux Pa Mawh Pui Ploi
1Cao Khrit hoik ploi ex sonsang mawh pui ploi, mawh kheu nan kieh kaux cong kah mai paw baox deeh kieh nien ka ceu pa sang deeh kieh mawh siliex. 2Jhak heue, Aux Pawlux ah nin ka pex, phan pex lai rieb ti kieh pat hak, Cao Khrit tak ang koe bwanson tidtix son pex. 3Mawh heue, aux baox deeh kham mhai rug, grawng ku kaux daux pui pa rieb ti kieh pat hak, nawh tak mawh pa koe ceuk ti sang yuh lox lai beenli khawmuik heue. 4Pex pa simie ti hoek krax rahsee kheu lox lai beenli, hoik dud gwieh hu khaing Cao Khrit, pex hoik rau hu khaing bwanson heue. 5Grawh grawng nawh ex hoik krox ti pon pa keud pot jun pot son krax rahsee, pa sang pon kheu Khuan Cao ka daux krax yum rhawm heue. 6Grawh grawng nawh ka daux Yesux Khrit, ceu pa pat hak ang ah, pa ang pat hak ang ah, ang koe bwanson tidtix, mawh krax yum rhawm pa yuh kheu krax moh, pa koe bwanson heue. 7Glang ka in pex hoik to mhawm heue. Mawh mawx pa hoik sidien pex son ang pex sang nghiet ka lox pa mawh meh? 8Ceu pa jeeh nyaw ka pex in ang mawh pa kaoh khaing Kaw pa hoik kok ka pex heue. 9Susaix ceeix ngie chix laig ka pum khawmuik mai kieh ploh kah heue.#1Kaw 5:6 10Aux hoik yum rhawm ka pex ka daux Simiang, grawng pex tak ang keud pa tang siyox, pa lak lheut ka pex, mawh pui mawx ang ah, nawh tak geu pa prawng pa ciyang tokaux tix heue. 11Puxaik khankix eue, phan aux kawn sidiex been pat hak, lai kawn tuktiak ka aux? Phan mawh nan ceu pa sideeing ka khaox lhak hoik teei ti tik heue. 12Aux simie ti kieh kix, pa kieh pex lulax, deeh kid ti tik tokaux tix tiru heue. 13Grawh grawng nawh puxaik khankix eue, hoik kok pex sonsang mawh pui ploi, viang mawh nan paw vi shiao krax pa ploi pex, ti mawh dee duh sonsang hawt yuh alo nex nham, viang mawh nan pex tix kaux lai tix kaux yuh son paox tix ka daux krax moh heue. 14Grawh grawng nawh lox lai beenli khawmuik hoik grum naog ka daux lox in tix gum khaing, pa ah nin, “Maix tak moh paox plawg paox nyhawm maix awm moh ka tokaux tix heue.”#Krub 19:18
15Phan pex kiied mai ih paox tix, rien rhawm tix, son ang pex paklawg kheu paox tix, tix kaux lai tix kaux heue.
Plix Khuan Mai Alo Nex Nham
16Aux ah nin, hu ka daux Khuan heue. Mai pex tak ang yuh ti kieh naog alo nex nham heue. 17Grawh grawng nawh alo nex nham mawh pa lah cha ka Khuan mai Khuan mawh pa lah cha ka alo nex nham, mawh kheu ceu in kiex mawh pa ang khaw mai paox tix, tom ang pex pon yuh ceu pa simie pex ti yuh heue.#Ro 7:15-23 18Phan Khuan Cao thong pex hu, pex ang lai ot greem lox lai beenli heue. 19Krax twah klaung pa khaw mai alo nex nham, mawh in khankix, pa phit vao mai pa yuh pa ang singax, pa chax nie luan yuh, 20pa krub riang grang, pa yuh pa dex mai phi, pa koeng ka paox tix, pa simah simiang, pa boh rhawm, pa song rhawm, pa thiang paox tix, pa tang gwieh paox tix, pa tang yuh cub caw, 21pa ghoing, pa pah pui yum, pa yoek ka plai, pa silao ti yuh pawie mai ceu pa awm in khankix, pa baox grux krai aux ka pex yam in, awm pa hoik sax grux krai aux ka pex, grawng pui pa yuh ceu in khankix tak ang lai pon sin meung Siyiex heue.
Plix Khuan
22Plix cie Khuan Cao mawh, pa moh rhawm, pa gaux rhawm, pa nhim, pa lang gun lang yeung, pa chix caux rhawm, pa mhawm, pa kaux sijax, 23pa awn rhawm, pa chix priex rhawm tix, lox been pa sang lah cha ka ceu in khankix ang koe heue. 24Kix pa dex dawd mai Yesux Khrit, hoik tawk nex nham yum piang khaox lhak, tau mai ceu pa keud pa yuh alo nex nham heue.
25Phan ex im kheu Khuan Cao, viang pa hu ex kawx kieh mawh daux Khuan Cao heue. 26Paw kieh ex lih ti mawh pa sawg min pakngai pa giex going mai paw choeng ka paox tix mai paw ghoing ka paox tix heue.
Currently Selected:
KALATIX 5: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
