2 SAMOELAX 3
3
1Daux sinax paox nyiex Sawlux mai paox nyiex Davit koe naing tom rheung, Davit nie ting riang khaing kix, paox nyiex Sawlux niied ti iak riang.
Grawng Kawn Simex Davit
(1Been 3:1-4)
2Kawn simex pa hoik keh ka son Davit ka daux veng Hebron, kawn Ai nawh mawh Amanon pa keh khaing Ahinawm kawn bun pui veng Yezerelax, 3Kawn nyi nawh mawh Khilat pa keh khaing Abigelax, kawn miexmai moeng Nabalax pui veng Kharamelax mai kawn Sam nawh mawh Apsalom, pa keh khaing Makha, kawn bun Talamie, pa mawh simiang haktiex Geshurix, 4kawn sai nawh mawh Adoniyax pa mawh kawn simex Hagit mai kawn ngox nawh mawh Shephatix kawn simex Abitalax, 5Kawn Log nawh mawh Itaram, pa keh khaing Egalax, inkix mawh pa keh ka son Davit daux veng Hebron heue.
Abana Deeh Neuex Kru Naing tix Mai Davit
6Yam kawn koe naing daux sinax paox nyiex Sawlux mai paox nyiex Davit, Abana kieh kru naing tix kaux cong ka plak paox nyiex Sawlux. 7Ishabawshiet ah nin ka Abana, “Kheu maix lai laig it tau mai moeng iak keeing aux, pa kaux Rizapa kawn bun E-a?” 8Abana kied song rhawm ka lox krai Ishabawshiet mai deeh ah nin, “Mawh aux kaing sox pui Yudax lie? aux hoik jhi krax pa kaux sijax tix ka paox nyiex keeing maix Sawlux mai ka puxaik nawh mai ka paox grawm nawh, tom in singaix mai aux ang ap kix ka Davit, daux in singaix maix hoik deuh phimap ka aux grawng bun in?” 9Phan aux ang yuh ceu an son Davit awm pa hoik tiextu Simiang Siyiex ka nawh, kieh Siyiex yuh ceu pa nie kin piang Abana. 10Tak teei meung haktiex khaing paox nyiex Sawlux#1Sa 15:28 mai deeh pang ti deuh dangngeung Davit piang haktiex Isarelax mai haktiex Yudax, jah ka veng Dan tom hoek ka veng Berashebax.” 11Ishabawshiet ang lai pawk lox Abana, kheu hoik kied lhat tix. 12Khaix an Abana ploi pui cau hu ka Davit mai kieh kix ah nin, “Cao simiang haktiex in mawh pui mawx?” Mai baox ah nin, “Yuh sijax mukheu maix tau mai aux, jhak heue, riang rao plawng taix aux tak ot plak maix mai aux tak viex pui Isarelax hoek ka maix khawmuik.” 13Davit ah nin, “Mhawm heue, aux tak yuh sijax mukheu tau mai maix, viang mawh nan aux sang mhaing tix ceu ka maix, yam hoek maix ti yaox pakngai aux, phan maix ang viex Mikhalax kawn bun Sawlux hoek, maix tak ang pon ti yaox pakngai aux.” 14Mawh kheu nan, Davit ploi pui cau tix hu ka Ishabawshiet kawn simex Sawlux ah nin, “Deeh tawx moeng aux Mikhalax ka aux, pa hoik loh aux ka haktiex pui Philitix tix yieh kaux.#1Sa 18:27 15Mai Ishabawshiet ploi pui hu teei Mikhalax khaing mex nawh Palatix kawn simex Lesha. 16Mex nawh hawt yiiem khaix nawh tom hoek ka veng Bahurim, Abana ah nin ka nawh, “Deeh ing heue, ” mai nawh deeh ing. 17Abana kum mai kwad riex jux pui Isarelax ah nin, “Bawg yam pa hoik luan, pex sawg ti yaog Davit mawh simiang piang pex. 18Yam in yaog heue, Simiang Siyiex hoik sikah ka Davit ah nin, ka daux tawm taix kawncau Aux Davit, Aux tak taoh ceu pui Aux pa mawh pui Isarelax khaing daux tawm taix pui Philitix mai khaing daux tawm taix pui koeng kix khawmuik.” 19Abana krai pui Binyamin mhong grawng ceu an mhawm mhawm, khaix an Abana deeh krai Davit mhong grawng ceu pa lo son pui Isarelax mai ka son paox nyiex pui Binyamin ka daux veng Hebron. 20Mawh kheu nan, Abana mai pui nawh tixnga kaux, hoek ka Davit daux veng Hebron, Davit yuh pawie khan kheu pa ting, ka son Abana mai pui nawh khankix. 21Mai Abana ah nin ka Davit, “Aux sang deeh ing khrawm pui Isarelax son cao simiang aux, sonsang yuh kix sijax mukheu tau mai maix, sonsang pon maix ti kwang piang kix, awm pa koe rhawm maix, ” mawh kheu nan, Davit deeh ploi Abana ing mai nawh deeh yaog ti ing daux pa nhim.
Grawng Pah Yuabax Ka Abana
22Yam an kawncau Davit mai Yuabax hoek khaing hawt tix pui koeng mai viex kraung pa pon tud rhim deeh hoek, viang mawh nan, Abana ang lai caw tix ot tau mai Davit daux veng Hebron, mawh kheu Davit hoik ploi nawh ing mai nawh ing ka daux pa nhim. 23Yam deeh hoek Yuabax mai pui naing nawh khankix, kix krai grawng ceu an ka Yuabax ah nin, “Abana kawn simex Nerax hoik hoek ka simiang mai simiang deeh ploi nawh ing mai nawh ing ka daux pa nhim.” 24Khaix an Yuabax hoek ka simiang ah nin, “Mawh yuh ka mawx? jhak heue, Abana hoik hoek ka maix jao patix maix hoik deeh ploi nawh ing mai nawh hoik pon glawt khaing taix ex. 25Maix khaw tix tawng ka hoek Abana kawn simex Nerax ti pie lhen ka maix, sonsang pon tawng nawh krax lih krax laig maix mai sonsang tawng nawh ka pa sang yuh maix khawmuik.” 26Khaix hoik lih hu Yuabax khaing plak sivoe ngai Davit, nawh ploi kawncau tix hu hawt khaix Abana, kix krup nawh ka hawt rawm daux Sirax mai deeh giex nawh hoek, viang mawh nan, Davit ang tawng ka grawng an. 27Yam deeh hoek Abana ka daux veng Hebron, Yuabax kok nawh hoek ka diang siviex veng, sonsang briex mox ti sikah tau mai nawh mai blung vaig nawh kieh yum tan, kheu jao hoik pah pux nawh Asahelax. 28Yam hoik mhong Davit ka grawng in, nawh ah nin, “Meung haktiex aux khawm cao aux ang lai koe phimap ka plak sivoe Simiang Siyiex, ka son phimap pa pah Abana kawn simex Nerax.” 29Kieh phimap an hoek piang kaing Yuabax mai doeh nyiex ma keeing nawh mai kieh pui pa koe jhawm saux lih nham seeing ang ah, pui pa koe jawm saux sipawg ang ah, pui pa kawk nyoi ang ah mai pui pa yum ka lawm vaig ang ah mai pui pa cud cha pa ih ang ah, kieh mawh pa ang jud ang jai ka daux nyiex ma Yuabax.” 30Mawh kheu nan, Yuabax mai pux nawh Abishie hoik pah Abana, kheu jao hoik pah nawh ka pux kix Asahelax ka daux naing Gibion.
Grawng Yiiem Doe Davit Son Abana
31Davit ah nin ka Yuabax mai pui pa ot mai nawh, “Riah kraung ceep pex mai ceep ka man chee rhix mai yiiem doe ka son Abana, ” mai Davit kawx hu yam sipaung ka Abana. 32Kix sipaung Abana ka daux veng Hebron mai simiang yiiem hawt simeeig Abana tan, pui khawmuik kawx yiiem kah. 33Mai simiang yiiem doe ka son Abana ah nin, “Mawh sang keung Abana ti yum, awm yum pui caox tix kaux lie? 34Taix maix ka ang phyawk tix, caong maix ka ang vien tix maix hoik yaox ti yum awm yum pui ka plak sivoe ngai pui caox khankix, khaix an pui khawmuik deeh baox yiiem ka son nawh.” 35Yam hoek pui ti sang tawx Davit ih priex pon ngaix, Davit tiextu ah nin, “Phan aux cim blah ang ah, pa ih tix ceuceu ang ah, ka sang klip singaix kieh Siyiex yuh pa nie lheu kin khaing in piang aux.” 36Pui khawmuik een ti tawng grawng ceu an mai khaw rhawm ka can pa hoik yuh simiang khawmuik. 37Pui khawmuik mai pui Isarelax tak tawng grawng ang simiang tie koe rhawm ti sang pah ka Abana kawn simex Nerax daux singaix an. 38Khaix an simiang ah nin ka kawncau tix, “Mawh ang pex tawng ka yum simiang tix kaux, pui ting daux pui Isarelax daux in singaix?” 39Viang aux mawh simiang pa hoik groi pex bee ka kawx, aux mawh pa iak riang ka daux singaix, pui inkix pa mawh kawn simex Zeruya mawh pa ting riang khaing aux, kieh Simiang Siyiex deeh plud ka kix awm yuh kix pa caox heue.”
Wa Common Language Bible © Bible Society of Myanmar, 2012