2 SAMOELAX 2
2
Davit Mawh Simiang Meung Yudax
1Khaix an, Davit chawk ka Simiang Siyiex ah nin, “Mawh sang yaox aux t haok ka veng pa koe ka daux meung Yudax tix veng veng lie?” mai Simiang Siyiex ah nin ka nawh, “Hu heue, ” Davit deeh ah nin, “Mawh sang yaox aux tix haok ka veng mawx lie?” Mai Nawh Cao ah nin, “Hu ka veng Hebron.” 2Mawh kheu nan Davit haok ka dee an, tau mai moeng nawh ra kaux Ahinawm bun veng Yezerelax mai Abigelax miexmai moeng Nabalax bun veng Kharamelax.#1Sa 25:42-43 3Mai Davit viex pui pa ot mai nawh haok tau mai pui nyiex ma kix ku kaux mai ot ka daux nyiex yaong veng Hebron. 4Pui Yudax hoek mai kix groi bee piang Davit, sonsang yaox nawh ti mawh simiang piang nyiex ma pui Yudax mai kix ah nin ka Davit, “Pui veng Yabiet khaing ka daux haktiex Gilat, hoik yaox ti sipaung ka Sawlux.”#1Sa 31:11-13 5Mawh kheu nan Davit ploi pui cau tix hu ka pui veng Yabiet pa ot ka daux haktiex Gilat ah nin ka kix, “Kieh Simiang Siyiex nawb bwan piang pex, mawh kheu pex hoik jhi krax caux rhawm tix ka cao simiang aux Sawlux mai sipaung nawh.” 6“Kieh Simiang Siyiex deeh jhi krax caux rhawm tix mai pa mawh meh ti piang pex, mawh kheu hoik yuh pex ceu in, aux tak deeh viiet krax caux rhawm ka pex.” 7Mawh kheu nan teei riang pex kieh koe rhawm kaux cong mai rhawm kwa rhawm vao, mawh kheu simiang Sawlux hoik yum mai daux nyiex ma pui Yudax hoik groi bee piang aux mai hoik yaog aux mawh simiang piang kix.”
Yaog Ishabawshiet Mawh Simiang
8Abana kawn simex Nerax cao kaing naing ting Sawlux khankix teei Ishabawshiet kawn simex Sawlux mai viex nawh hu ka veng Mahanem, 9Kix yaog nawh mawh simiang piang pui Gilat, pui Asha, pui Yezerelax, pui Epharem, pui Binyamin, pui Isarelax khawmuik. 10Yam koe ju Ishabawshiet kawn simex Sawlux tixpon num, nawh jah ti kwang piang haktiex Isarelax, nawh yaox ti kwang ra num, mawh ngie cub doeh nyiex ma pui Yudax pa hawt khaix Davit. 11Yam mawh Davit simiang daux veng Hebron piang doeh nyiex ma pui Yudax, koe aliah num mai liah khix.
Naing Haktiex Isarelax Mai Haktiex Yudax
12Abana kawn simex Nerax mai kawncau Ishabawshiet kawn simex Sawlux, lih khaing veng Mahanem mai hu ka veng Gibion. 13Yuabax kawn simex Zeruya mai kawncau Davit lih hu rieb kix hawt rawm nhawng Gibion mai kix ngawm piang toi rawm nhawng plak in tix cub, plak an tix cub. 14Abana ah nin ka Yuabax, “Kieh pui awn ju in khankix, yaog ti kaoh mai silah paox tix, ka plak sivoe ex” mai Yuabax ah nin, “Kieh kix silah heue.” 15Mawh kheu nan, kix yaog ti kaoh hu awm pa hoik simin kix khaing pui Binyamin kao ra kaux, pa hawt khaix Ishabawshiet kawn simex Sawlux mai khaing pui daux cub kawncau Davit kao ra kaux. 16Ku mawx ku an ra lai jhawp kaing paox tix mai blung paw paox tix ka vaig mai goh ti yum tau khawmuik, Mawh kheu nan, dee an tom kok mawh Helaka Hazurim bang lawm vaig, pa koe baoh veng Gibion. 17Daux singaix an naing hoik kied kin tete, Abana khawm pui Isarelax hoik som ka plak sivoe kawncau cub Davit. 18Kawn simex Zeruya loe kaux, pa mawh Yuabax, Abishie mai Asahelax ot tan khawmuik, Asahelax mawh pa kied phai caong awm cak. 19Asahelax niied ti hawt khaix Abana mai nawh ang lai veeh tix plak gwiex plak dawm ka hawt tix Abana. 20Abana deeh gi plak khaix tix ah nin, “Mawh maix Asahelax lie?” mai nawh deeh pawk ah nin, “Mawh aux heue.” 21Abana deeh ah nin ka nawh, “Veeh maix hu plak gwiex phan ang mawh nan plak dawm mai giex pui naing tix kaux mai teei kraung naing nawh son maix, ” viang mawh nan, Asahelax ang cu ti veeh tix khaing hawt tix khaix nawh. 22Abana baox ah nin ka Asahelax, “Veeh maix hu tang dah, khaing hawt tix khaix aux, aux sang chix pah maix yum piang tiex kheu grawng ceu patix? Mai aux sang pon jhi ngai tix ka puxke maix Yuabax yuh ka mawx?” 23Asahelax ang cu ti veeh tix plak khaix, mawh kheu nan Abana blung vaig nawh ka pliah tix mai pliah an phlat plak blawg nawh mai nawh goh ti yum tan, yam hoek pui hun dee goh Asahelax tix yum, kix cung ka praok nawh tan. 24Yuabax mai Abishie kawx, pheet khaix Abana, singaix klip ka kiex yam hoek kiex piang gawng Ama, pa koe sivoe veng Gi-a ka daux krax hu pui ka daux tiag Gibion. 25Pui Binyamin khrawm paox tix tau mai Abana mai hoik deeh mawh cub kru naing tix cub mai kix teei dee ot tix piang choek gawng tix mu. 26Abana kok yo ka Yuabax ah nin, “Mawx sang kieh lawm vaig kiied ti ih ex jheung jheung lie? mawh ang maix tawng sang mawh ceu in pa song daux bawg yam dee sidah praix sax, mawh kawn sang rheung miex grheung pa tak sang kieh maix pui hun deeh blak ti ing khaing pa hawt pheet tix khaix puxaik kix?” 27Mai Yuabax deeh pawk ah nin, “Awm im ju Siyiex, phan maix ang deeh krai lox in, pui khawmuik tak naox pa hawt pheet puxaik tix, yam bah riang praix ponngawb tete.” 28Mai Yuabax phlu teettawng mai pui khankix kaok mai kix ang lai hawt pheet pui Isarelax, kix ang lai yuh naing. 29Abana mai pui nawh lih hu leeing sawm ka daux lung mai kix tiang rawm klawng Yawdan mai hoek ka veng Mahanem. 30Yuabax deeh blak tix khaing hawt pheet tix Abana, yam deeh khrawm nawh pui tix khankix, kix yaox grai cub kawncau Davit kao dim kaux, khawm Asahelax. 31Kawncau Davit pon pah pui Binyamin, khawm pui Abana yum loe yieh tixgliah kaux. 32Kix teei tokaux yum Asahelax mai sipaung ka daux simeeig keeing nawh, ka veng Bieliehiem, Yuabax mai pui nawh hu krax leeing sawm mai hoek ka veng Hebron yam jah praix ti riang heue.
Wa Common Language Bible © Bible Society of Myanmar, 2012