2 SAMOELAX 4
4
Grawng Pah Ka Ishabawshiet Yum
1Yam hoik mhong kawn simex Sawlux pa mawh Ishabawshiet ka hoik yum Abana ka daux veng Hebron, nawh dah rhawm mai pui Isarelax kawx hoik khi rhawm kah. 2Kawn simex Sawlux koe ra kaux, Bana mai Rekhap kiex mawh cao kaing kru naing nawh, kiex mawh kawn simex Rimon khaing pui Berawti mai mawh pui Binyamin, Kheu hoik mawh veng Berot, pa hoik laig ka daux haktiex cie doeh ru pui Binyamin. 3Mawh kheu pui Berawti hoik to hu ka veng Gitem mai paung tan tom in singaix. 4Yawnasan kawn simex Sawlux koe kawn simex tix kaux, koe jhawm saux chawh caong, #2Sa 9:3 yam koe ju tix phwan num, kix mhong grawng Sawlux mai Yawnasan khaing veng Yezerelax mai bun cao priex nawh, yaog ti viex nawh to yam hoik niied nawh ti to, kawn nyawm an rau piang tiex mai caong nawh khluik, ceu kaux nawh mawh Mephibawshiet. 5Kawn simex Rimon pa mawh Rekhap mai Bana pui Berawti lih hu ka nyiex Ishabawshiet, bawg yam hax koek ponngaix, caw bawg yam it kawn nyawm an. 6Yam hoek kiex tan, kiex laig daux nyiex mai yuh tix awm pui pa sang don ngox ca mai kiex blung vaig Ishabawshiet ka gawn, Rekhap mai pux nawh Bana to khaing tan. 7Yam hoik laig kiex daux nyiex yam an, Ishabawshiet kawn nyawm it piang ku it tix, ka daux lawg, khaix an kiex blung vaig nawh ka gawn mai kiex kid ti viex kaing nawh ing mai to leeing sawm ka daux lung daux ngawd. 8Mai kiex viex kaing Ishabawshiet hoek ka Davit, ka daux veng Hebaron mai kiex ah nin, “In mawh kaing Ishabawshiet kawn simex Sawlux, pui koeng maix pa hoik sawg ka ju maix, Simiang Siyiex hoik pawk bix cao simiang aux, daux in singaix khaing Sawlux mai doeh ru nawh khankix.” 9Davit deeh pawk ah nin ka Rakhap mai pux nawh Bana kawn simex Rimon pui Berawti, “Awm im ju Simiang Siyiex, pax hoik taoh ju aux khaing pui koeng aux khankix, 10yam krai pui tix kaux grawng an ka aux ah nin, “Jhak heue, Sawlux hoik yum, kix hoik keud ti viex grawng pa mhawm hoek ka aux, aux deeh giex nawh mai pah nawh ka daux veng Zikalat, pui an keud aux sang tawx totaix ka tix son grawng an.”#2Sa 1:1-16 11Lheu khaing an yam pah pui caox ka pui pa rahsee, yam it nawh ka daux nyiex cao tix, tak nie lheu mawh pui kwa miex ding? Mawh kheu nan, yam in aux sang deeh mhaing nham nawh khaing pax mai sang teei pax khaing piang haktiex in.” 12Mawh kheu nan, Davit tawx lox tix ka pui awn ju khankix mai kix pah kiex yum mai kix kid taix caong kiex mai tak teue hawt rawm nhawng Hebron, kix teei kaing Ishabawshiet mai sipaung daux simeeig Abana, pa koe daux veng Hebron heue.
Wa Common Language Bible © Bible Society of Myanmar, 2012