Zacar%EDas 8
8
Usujunik i Ajwal
1I Ajwal chi ronojel ktiki che xuya i tzijoniki chwe: 2“Iri are Yin chi in Ajwal chi ronojel kintiki che, kinb'ij: Lik kinna jun nim laj selosil chrij i tinimit Sion, selosil chi lik kumi'saj woywal. 3Xaq kintzalij chik pa Jerusalén, re kinjeqi chila. Are uri i tinimit Jerusalén kb'ix ni Suk'ul laj Tinimit che, xaq jyub' re i Ajwal chi ronojel ktiki che, kb'ix ni Lo'laj Jyub' che. 4I je rijab' achiyab' xaq i je rijab' ixoqib' kekub'i chik pa k'ijib'al ipa kkimol wi kib' i winaq re i tinimit Jerusalén, kkik'am kicho'ab' che kich'amiy rumal k'iyal chik junab' o chke. 5Ral taq alab'om xaq i ral taq altom lik kkinojsaj upam i k'ijib'al ipa kkimol wi kib' i winaq re i tinimit xaq ke'etz'an ni chila. 6Che taq i ij le ronojel ile k-iltaj na chi lik k'ax uch'ob'ik chke i kekanaj kan pintinimit; xwiri chwe Yin lik k'ax taj. Yin in Ajwal chi ronojel kintiki che kinb'ij: 7Yin kwesaj ni intinimit pu'ab' i tinimit chi o prelb'al ij xaq pu'ab' i jun chik chi o puqajb'al ij, 8kink'am na li pa tinimit Jerusalén re kjeqi ni chila. Keje uri ile ike je intinimit na, i Yin in ki-Dios na, ru' suk'ul k'uxij xaq ru' u'atik tzij.”
9Iri are kub'ij i Ajwal chi ronojel ktiki che: “Chikoch'ij iwach, yix chi che taq i iji itom i tzij chi xkib'ij i profeta, che taq li ij are xoksax ukub'ib'al i ja re uyakik tan chik i rachoch i Ajwal chi ronojel ktiki che. 10Man arewi k'a che taq i iji nti kajil i winaq xaq i kaway kya'ik. Rumal i ajch'oj chkij, lik nti chomb'al ib' chkixol i winaq; man Yin in-anom chke chi kki'an ch'oj chkiwach. 11Xwiri wo'or, ni'pa i kekanaj che i tinimiti, kin-an ti chik chke pacha i xin-an chke i jub'an che i nab'e taq ij. Yin in Ajwal chi Ronojel Kintiki Che kinb'ij. 12Man i chomb'al ib' lik o ni chkixol ike. I tikb'al uva kwachin na; i ulew kwachin na; i kaj kuya na li uxaq k'aj. Yin kinya ni ronojel ile chke konojel i kekanaj che i tinimiti. 13Keje pacha yix, chi ix aj Judá, xaq ix aj Israel, lik ix k'oqtal chkixol i jub'an chik nimaq taq tinimit, xwiri Yin wo'or kixinto na, i kin-an ni chiwe chi ix are jun utzil chomal. ¡Mixij iwib'! ¡Chikowij ik'ux!”
14Iri are kub'ij i Ajwal chi ronojel ktiki che: “Yin inch'ob'om te'eq chi kinya utojb'alil kimak iwatit imam yix ujer are xkipetsaj woywal, lik xinjikb'a intzij. 15Xwiri wo'or, inch'ob'om u'anik i utz che i tinimit Jerusalén xaq che i tinimit Judá. Rumali mixij iwib'. 16Iri o uchak chi lik arewi ki'an ni yix: Lik arewi chib'ij i saq laj tzij chiwach xaq suk'ul u'atik tzij chi'ana i chitija u'ijol iwib' che i chomb'al ib' pa taq atb'al tzij; 17mi'an k'ax che iwib' chiwach xaq mikuxtaj inb'i puwi jun tzij we qatzij taj. Man Yin tzel kwil ni'pa taq ile. Yin in Ajwal, xinb'ij.”
18I Ajwal chi ronojel ktiki che xlapan wu' yin, i xub'ij chwe: 19“I umayixik wa'im re utz'onoxik che i Ajwal re i ukaj ik', re ujo' ik', re uwuq ik', xaq re i ulajuj ik' lik keu'on na re kikotemal, chi lik nima'ij re kikotemal re umuq uxikin i ma Judá. ¡Yix lik k'ax china i saq laj tzij xaq i chomb'al ib'!”
20Iri are kub'ij i Ajwal chi ronojel ktiki che: Lik k'a kek'un ni winaq, xaq uk'iyal winaq ke i nimaq taq tinimit. 21Are uri i winaq re jun tinimit ke'e ku' jub'an chik winaq re jun chik tinimit, i kkib'ij chke: ¡Jo', kqatzukuj i Ajwal chi ronojel ktiki che re kqatz'onoj che chi kuya i utzil chomal pqawi! I jub'an chik kkila' ni uwach chke: ¡Xaq keje yoj koj-e na! 22I kek'un ni pa Jerusalén k'iyal taq tinimit xaq k'iyal nimaq taq tinimit, kolkitzukuj i Ajwal chi ronojel ktiki che xaq kolkitz'onoj i utzil chomal pkiwi. 23Che taq i ij le, lajuj achiyab' je aj naj ke i jub'an chik nimaq taq tinimit kkichap ni che u'u' jun aj Judío i kkib'ij ni che: “¡Kqaj enam iwu' yix, man qatom chi i Dios o iwu' yix!”
Currently Selected:
Zacar%EDas 8: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
