Zacar%EDas 9
9
Utojb'alil pkiwi i nimaq taq tinimit chi je o naqaj
1Iri are i tzijonik chi xuya ub'ixkil i Ajwal chrij i tinimit Hadrac xaq i tinimit Damasco: Ni'pa taq i tinimit re Siria je re i Ajwal, xaq je re Ire konojel i tzob'ajil re Israel. 2Xaq re Ire i tinimit Hamat, chi o chunaqaj i jub'an nimaq taq tinimit le, xaq i Tiro i Sidón, ru' ronojel uxeb'al uk'aslemal. 3I tinimit Tiro lik xuyak k'iyal ja chi lik utz uyijb'axik xu'an che; te'uri lik k'i an-o'oj xaq i saq-o'oj xut'ub'a ru' pacha ut'ub'axik ixkab' ulew. 4Xwiri i Ajwal lik kumaj ni ronojel che, i kuk'aq b'i pa mar ni'pa taq ub'eyomal, i lik kuk'at ni ronojel i tinimit.
5I tinimit re i Ascalón are kril iri, lik kuxij ni rib' che. Xaq keje i tinimit Gaza lik kutij ni k'ax, i roy-enik i tinimit Ecrón ktzaq ni pulew. ¡I tinimit Gaza kkanaj na nti chik rajawinel, xaq i tinimit Ascalón kkanaj na nti chik uwinaq! 6Pa tinimit Asdod kejeqi ni jub'an winaq chwach, chi jalajuj kepe wi, keje ile kinqajsaj ni ki'ij i aj Filistea. 7Kwesaj ni pkichi' i ti' chi o kik' che chi kkitijo, xaq kwesaj ni o chuxol taq kiware, xaq kwesaj i tijawik re chi utz taj kkitijo. Xwiri chkixol i winaq le, o ni jujun kekanaj na lik je we Yin; keu'on ni aj Judá, i Ecrón keu'on na keje pacha i je aj Jebús. 8Yin lik keinchajij i je we Yin re keinto chkiwach i ke'ik'aw chi. I aj-anol k'ax ku'an ti chik k'ax chiwe, man wo'or Yin lik kink'ak'alin ru' inb'a'wach.
I ajawinel re Israel k-on panoq
9¡Lik chatkikotoq, tinimit Sion!
¡Chatb'ixan ru' kikotemal tinimit Jerusalén!
Awajawinel ya kk'un awu' yet, lik suk'ulik xaq ajch'akanel,
xwiri lik ajaj laj winaq, annaq chrij jun b'uru,
i ral b'uru rak'al jun ati b'uru.
10Ire kusachsaj ni kiwach ukareta i ma Efraín,
i ukaway i tinimit Jerusalén
xaq i k'aqb'al ch'ab' re ch'oj.
Kutzijoj ni chomb'al ib' pa nimaq taq tinimit
xaq krajawin ni chuchi' i mar xaq k'a che chik uchi' jun chik mar,
che i raqana Éufrates k'a pa k'isb'al re i rokrik re i jyub' ta'aj.
Uyakik tan chik i tinimit Israel
11Iri are kub'ij i Ajwal:
“Tinimit Jerusalén, rumal i kik' re atrat,
Yin kewesaj na li pa chaqij k'otom
awinaq chi je o chila prexil.
12¡Yix chi ix ajprex chi lik arewi ikub'am ik'ux chroy-exik,
kixtzalij chub'i che i nim laj ja chi re tob'al iwib'!
Kinb'ij chiwe chi kinya ni utzil chomal piwi,
lik kamul chwach i k'ax chi xitijo.
13Inyijb'am chik i k'aqb'al inch'ab' re ch'oj, chi are i tinimit Judá,
xaq inkojom jun ch'ab' che, chi are i tinimit Efraín.
Chawe yet, Sion, kin-an ni jun ch'ich' chi k'ulala o uware,
xaq keinyak ni awak'al chrij i rak'al i tinimit Grecia.”
14I Ajwal kuk'ut ni rib' puwi utinimit;
kuk'aq na li uch'ab' pacha ray.
I Ajwal Dios kuch'awsaj ni trompeta
xaq k-e b'i chupam i uch'awb'al ray pa wiqab'.
15I Ajwal chi ronojel ktiki che keuchajij ni je re Ire,
ike le kkiya'ya ni ab'aj chi ke i je ajk'aqol ab'aj ru' ul
xaq kkitij b'i i je ajch'oj chkij;
kkitu' nu b'i kikik'el pacha i uwa'al uva muqb'am,
lik kenoj ni che pacha unojsaxik jun nim laj laq,
xaq pacha i ok'a' re i sujb'al sipon.
16Che i ij le, i Ajwal Dios
kuto ni utinimit pacha uto'ik jutzob'aj chij,
xaq kewalch'in ni je re Ire pkitinimit
pacha jub'an chomiq taq ab'aj re jun koron.
17¡Lik utz, xaq lik k-on ni chom i tinimit!
Ru' uk'iyal u-trigo xaq uwa'al uva muqb'am,
i qak'al je alab'om xaq i je altom je chomiq kek'iy na.
Currently Selected:
Zacar%EDas 9: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
