Zacar%EDas 7

I saqil ti laj umayixik wa'im re i lapanik ru' i Ajwal

1Che i ukaj ij re ub'elej ik' Quisleu, re ukaj junab' re rajawinik i ajawinel ma Darío, i Ajwal xuya jun tzijonik che i profeta ma Zacarías. 2Che kan i ij le, i tinimit re i Betel utaqom te b'i ma Sarezer xaq i ma Regem-melec junam ku' uwinaq re kkitz'onb'ej tob'al ke che i Ajwal 3xaq chutz'onoxik chke i profeta xaq chke i ajsujul sipon prachoch i Ajwal chi ronojel ktiki che: “¿O nawi uchak chi kqamayij ti b'is xaq umayixik qawa'im re kqatz'onoj che i Ajwal re ujo' ik' re jujunal taq junab' pacha taq qa'anom loq k'a arewi wo'or?”

4Are uri i Ajwal chi ronojel ktiki che xlapan wu', i xub'ij chwe: 5“Chab'ij chke konojel i winaq pa tinimit xaq chke ajsujul sipon: Yix kimayij iwa'im chutz'onoxik che i Ajwal xaq ix o pa b'is che ujo' ik' xaq uwuq ik' lik are ki'ano k'a xtz'aqat lajuj oxwinaq (70) junab'. Xwiri ki'an taj re kojb'al in-ij Yin, 6are i ki'an yix, are kitij iwa xaq kitu' iya', ki'an ile xwiri xa iwe yix.” 7¿Xatab'a are ti i tzij iri chi xutzijoj i Ajwal chke i profeta ujer kanoq, i tinimit Jerusalén are o te pa chomb'al ib' xaq k'iyal te winaq je o chwach, xaq keje te'eq ki'anom i tinimit ile chrij chwach, xaq i ulew re i Neguev xaq i uwa taq ta'aj?

Rumal kiqelanik ke'elsax b'i pa cho'ab' chwach kulew

8I Ajwal xlapan ru' ma Zacarías chi profeta, i xub'ij che: 9“Iri lik are kintaq u'anik: Yix chi'ana i suk'ulik che i'atb'al tzij, xaq utzil ik'ux xaq k'ax china iwib' chiwach. 10Mi'an k'ax chke i malkanib' xaq chke i ak'alab' chi nti chik kiqajaw kichuch, chke aj naj xaq mitene chke i nib'a'ib'. Mich'ob' taq u'anik i utz taj chiwach.” 11Xwiri i tinimit xraj ti xkojonik. Konojel xkiya uchel kij xaq xki'an che kib' chi ketan taj. 12Xki'an ko che i kanima pacha i chom laj ab'aj, man kkaj ti utayik i k'utunik xaq i taqanik re i Ajwal chi ronojel ktiki che chi xuya retamaxik ru' Utewal chke i profeta ujer.

Rumali i Ajwal lik xpe roywal, 13i xub'ij: “Keje pacha ike chi xkaj ti xinkita are keinsik'ij te'eq, xaq keje uri Yin kwaj ti kitayik are kinkitzukuj. 14Rumali xeinkichersaj b'i pa nimaq taq tinimit chi ike keta'am ti kiwach pacha jun kaqsut tew, chkij kan ike xkanaj i tinimit tz'inilik chi lik mijun winaq kjeqi chik chwach. ¡Jun chom laj tinimit, xwiri ike xki'an kan tz'inilik jyub' chaqij che!”

Currently Selected:

Zacar%EDas 7: ACHICUB

Highlight

Copy