Zacar%EDas 14

I k'isb'al ch'akanik re i Jerusalén

1Ya kk'un i ij re i Ajwal, are kmaj b'i ub'itaq awe Jerusalén chi lik chawach yet kkijach b'i chkiwach ike. 2Che i ij le i Ajwal kumol ni kichi' i nimaq taq tinimit re kki'an ch'oj chrij i tinimit Jerusalén. Xaq kkich'ak ni i tinimit, kkel-aj nu b'i ub'itaq ke pa kachoch, kechap ni kixoqil pa cho'ab' i kkimin kib' ku' xaq kek'am nu b'i nik'aj chke uwinaq. Xwi nik'aj chik kekanaj ni pa Jerusalén. 3Xwiri kel la li Ajwal chu'anik ch'oj chkij i nimaq taq tinimit le, pacha u'anik ku'ano are o pa ch'oj. 4Che i ij le i Ajwal kuk'am ni ucho'ab' ru' i raqan puwi i jyub' Olivos chi o chwach i Jerusalén, pusuk' ipa kel wi li ij. Xaq jun nim laj ta'aj, chi kjeqan b'i uchi' prelb'al ij, keuk'isa k'a puqajb'al ij, ku'an ni keb' che i jyub' Olivos. Pa nik'aj che i jyub' k-e pa moxab' i nik'aj chik k-e pa wiqab', 5i yix kix-anmaj nu b'i chwach i uwa ta'aj chi kkanaj chkixol i keb' jyub', chi kupon ni k'a pa Azal, chila ch'aqap. Kix-anmaj ni yix keje pacha xki'an iwatit imam ujer rumal kab'raqan chi xik'awik are krajawin i ma ajawinel Uzías pa Judá. I kk'un ni Wajwal Dios rachi'ilam li konojel i suk'ul laj taq uwinaq.

6Che i ij le nti saq re i pa'ij xaq nti equm re cha'ab'. 7Are ni jun ij chi lik xa jun, chi lik xwi i Dios reta'am. Che i ij le k-aljin taj pa chke i pa'ij xaq pa chke i cha'ab', man i cha'ab' lik saq na. 8Are uri ke'el na li joror laj taq ya pa Jerusalén, chi kb'in ni pa alaj xaq pa sa'ij, nik'aj chke ile k-e pa mar prelb'al li ij, xaq i nik'aj chik k-e pa mar re puqajb'al ij. 9Che i ij le krajawin ni Ajwal chwach ronojel i jyub' ta'aj. I Ajwal lik xa jun xaq i ub'i lik xa jun. 10Ronojel uwach ulew kkanaj na lik uwata'aj, kjeqan li pa Geba k'a pa Rimón, pa wiqab' re i tinimit Jerusalén. I Jerusalén lik nim ni u'ij, lik kejeqi ni winaq chupam che i k'ijib'al le, kjeqan b'i che uchija re i Benjamín k'a che Uch'uk chik jun Uchija, ipa te o wi Uchija Ujer, xaq kjeqan b'i k'a che i ja tak'taq re i Hananeel k'a ipa kyitz' wi aceite re i ajawinel. 11Qatzij, i Jerusalén kek'iji ni winaq chwach, i lik ksachsax ti chik uwach. I uwinaq kejeqi ni chila, lik nti xib'in ib' chke.

12Xwiri chke i nimaq taq tinimit chi xki'an ch'oj chrij i tinimit Jerusalén, i Ajwal lik kuya ni k'ax laj tojb'alil chke: I winaq le lik je k'aslik k-ay ni kich'akul, i kib'a'wach k-ay ni pkik'ijib'al xaq k-ay ni utzam ka' pkichi'. 13Che i ij le i Ajwal lik kuya ni xib'rikil chke. Chkijujunal kkichap ni che u'ab' jun kachi'il, i kki'an ni ch'oj chkiwach. 14Are uri lik kukoch'ij ni uwach i tinimit Judá pa Jerusalén, kekik'am nu b'i ub'itaq ke i nimaq taq tinimit chi je o naqaj chke, chi are uk'iyal kib'eyomal, are i saq-o'oj, an-o'oj xaq i ki'u'. 15I tojb'alil chi ktzaq pkiwi i winaq, are ile ktzaq ni pkiwi i to' kaway, pkiwi i chok' xikin, pkiwi i kamey, pkiwi i axna xaq chkij konojel i chikop chi ke i ajch'oj chkij chi je o pa wu'waq taq ja.

16Chrijil chik iri, ni'pa i xek'asi kanoq re i tinimit chi xki'an ch'oj chrij i tinimit Jerusalén ke'e ni junab' junab' chukojik u'ij i Ajawinel, chi are i Ajwal chi ronojel ktiki che, chu'anik i nima'ij ke i mujb'al re es. 17We o jun chke i nimaq taq tinimit chwach i jyub' ta'aj k-e ti pa Jerusalén che i nima'ij re kojb'al u'ij i Ajawinel, chi are i Ajwal chi ronojel ktiki che, i jab' ktzaq ti uri puwi i rulew. 18I winaq re i tinimit Egipto chi ke'e ti pa nima'ij, i Ajwal kuya ni utojb'alil chke, xaqjunam pacha kuya che i jun chik nim laj tinimit chi k-e ti pa nima'ij re i mujb'al re es. 19Ile are ni tojb'alil kya' che i tinimit Egipto xaq chke konojel i jub'an chik nimaq taq tinimit chi ke'e ti pa nima'ij re i mujb'al re es.

20Che i ij le, ktz'ib'ax i tziji che i kich'inch'in i kaway: “Jachtal pu'ab' i Ajwal”. Xaq i b'oj re i kosino re prachoch i Ajwal lik o ni ki'ij pacha i nimaq taq laq chi je o chwach i sujb'al sipon re i Dios. 21Konojel i b'oj re i kosino chi o pa Jerusalén xaq pa Judá, lik jachtal pu'ab' i Ajwal chi ronojel ktiki che. Pachin kkisujuj jun poronik are kechapb'ew ni i b'oj le, i kkicha'saj i ti' ke i chikop chupam chi kkisujuj. Che i ij le lik nti chik jun ajk'ay prachoch i Ajwal chi ronojel ktiki che.

Currently Selected:

Zacar%EDas 14: ACHICUB

Highlight

Copy