Malaqu%EDas 1
1
I k'axnab'al uk'ux i Dios che i tinimit Israel
1Iri are utzij i Ajwal chi xub'ij che ma Malaquías chi profeta kub'ij che i tinimit Israel.
2I Ajwal kub'ij: “Yin k'ax kixinna yix.” Xwiri yix kila' ni uwach chwe: “¿Wach retamaxik kqa'an yoj we k'ax kojana'o?” I Ajwal kula' uwach: Yin k'ax kixinna'o rumal i ma Esaú i ma Jacob chi katz kicha' kib' chkiwach, Yin k'ax xinna ma Jacob, 3xinxutuj i ma Esaú. I utinimit i ma Esaú, chi lik are jun jyub' naj uwi xin-an jun tz'inilik jyub' che, i rulew ire xin-an che chi xwi utz re kik'ijib'al chikop aj pa taq es.
4We i aj Edom, chi je umuq uxikin i ma Esaú, kkib'ij: “Wulijsam ni'pa ub'itaq qe, xwiri kqayak chik i nim laj qatinimit”, i Ajwal chi ronojel ktiki che, kula' neri uwach: “Ike kkiyak neri, xwiri Yin kinwulijsaj tan chik chke. I ub'i utinimit are ni iri: Tinimit re mak atzalal xaq nim laj Tinimit chi nti uk'isik roywal i Ajwal chrij.” 5Yix lik kiwil ni ru' ib'a'wach, xaq kib'ij na: “¡I Ajwal lik nim ucho'ab' chi lik kik'aw che i mojon re uchi' i jyub' Israel!”
I Ajwal keuyaj i ajsujul sipon
6I Ajwal chi ronojel ktiki che, kub'ij chke i ajsujul sipon: I alk'uwalxelab' kkikoj ki'ij kiqajaw, xaq i je taqon kekojon che i kajaw. We Yin in Iqajaw yix. ¿B'uchak uri kikoj ti in-ij? We Yin in Iwajaw, ¿B'uchak uri kinikoj taj? Yix kinixutuj, xaq kib'ij: “¿Wach ru' qak'aqom b'i a'ij?” 7Yix are kik'am li i sipon chwach insujb'al sipon xa are kik'am li lejom wa re trigo chi utz taj xaq k'a kitz'onoj: ¿Wach ru' kqapetsaj wi awoywal? Yix kipetsaj woywal are kich'ob'o chi insujb'al sipon utz we kqajsax u'ij 8i kich'ob' yix nti k-ono we kisujuj taq chikop chwe chi je potz', je jetz' o we xa je iwab'. ¡Jix pe ru' i atol tzij yix xaq chik'ama pe b'i chke! ¡Chiwila uri we ike qus kkil uk'amik i sipon le! 9Chitz'onoj uri yix che i Dios chi kril tob'al qawach. Xwiri we kiya isipon le che, miwoy-ej uri we i Dios qus kril uk'amik isipon le. I Ajwal chi ronojel ktiki che kub'ij: 10“¡Utz wetene jun chiwe yix kutz'apij uchija re i wachoch, man keje ile kitzij ti chik i a' re insujb'al sipon chi nti uchak! Man kinkikot ti iwu' yix kub'ij i Ajwal xaq kink'am ti isipon chi kisujuj chwe. 11Konojel pa nimaq taq tinimit chwach i jyub' ta'aj koksax in-ij; che ronojel taq k'ijib'al kk'atsax ni pom chwe Yin, kojb'al in-ij xaq kkiya i sipon chwe chi lik utz xaq lik ch'am, kub'ij i Ajwal. 12Xwiri, yix kipetsaj woywal, man kich'ob'o chi sujb'al insipon, chi are inmexa, chi nti k-ono we kqajsax taq u'ij, xaq utz we kqajsax taq u'ij i ti'b'alil chi o puwi. 13Yix kib'ij: ¡Lik oj kosnaq chik che ni'pa taq iri! Xaq kinixutuj, kub'ij i Ajwal. I lik k'a kich'ob'o chi kinkikotik are kixk'un chusujuxik jun chikop chwe chi xa el-am, o we ntaj jun chikop jetz' o xa iwab' kub'ij i Ajwal. 14¡Lik chk'oqox ni ajt'oronel chi kub'ij chi kusujuj jun chikop chwe chi lik nti k'ax che, xwiri are kuporoj i sipon, xa are i chikop chi o k'ax che are kusujuj chwe! Yin in are i nim laj Ajawinel, i konojel i winaq pa taq tinimit kkiyak in-ij.” Iri kub'ij i Ajwal chi ronojel ktiki che.
Currently Selected:
Malaqu%EDas 1: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
