Apocalipsis 7
7
I wajxaqlajujchiy (144,000) winaq chi xkoj jun retal chke
1Te'uri xewil chik kajib' ángel je tak'al jujun pa taq kajib' ch'uk re uwach i jyub' ta'aj. Ike le ketijin chu'atixik i tew che i kajib' ch'uk man kkiya ti che chi kpe chwach i jyub' ta'aj, xaq mitene puwi i mar, xaq mitene pkiwi i che'. 2Are uri xwil chik jun ángel xel li ipa kel wi li ij. Ire rok'am i kojb'al retalil re i Dios k'aslik pu'ab'.#7.2 I upatan ire, are ukojik i retalil re i Dios chwach kikrusil i winaq ni'pa i je re i Dios k'aslik. I ángel le, ko xsik'in chke i kajib' ángel, chi o pki'ab' kki'an k'ax che uwach i jyub' ta'aj, xaq che i mar. 3Xub'ij chke: “Mi'an tan k'ax che uwach i jyub' ta'aj, xaq che i mar, xaq mi'an chke i che'. Mi'an tan ile, k'a kqakoj ni retalil chwach kikrusil ni'pa i je rajchak i qa-Dios.” Xub'ij chke.
4Xaq xinta ni'pa kik'iyal chi kok ni retalil chke: Je wajxaqlajujchiy (144,000) tzob'aj ke aj Israel.
5Je lajujmo' juchiy (12,000) chke umuq uxikin i mam Judá, xaq lajujmo' juchiy (12,000) chke umuq uxikin i mam Rubén, xaq lajujmo' juchiy (12,000) chke umuq uxikin i mam Gad, 6xaq lajujmo' juchiy (12,000) chke umuq uxikin i mam Aser, xaq lajujmo' juchiy (12,000) chke umuq uxikin i mam Neftalí, xaq lajujmo' juchiy (12,000) chke umuq uxikin i mam Manasés, 7xaq lajujmo' juchiy (12,000) chke umuq uxikin i mam Simeón, xaq lajujmo' juchiy (12,000) chke umuq uxikin i mam Leví, xaq lajujmo' juchiy (12,000) chke umuq uxikin i mam Isacar, 8xaq lajujmo' juchiy (12,000) chke umuq uxikin i mam Zabulón, xaq lajujmo' juchiy (12,000) chke umuq uxikin i mam José, xaq lajujmo' juchiy (12,000) chke umuq uxikin i mam Benjamín.
9Te'uri xintaqej tan chik, xaq xewil uk'iyal winaq, jalajuj taq tzob'ajil, tinimit lik je k'i chi lik k-an ti chik tikilem chkajlaxik; je tak'al chkiwach i keb': Are i Jun chi kul pa kub'ib'al chi o u'ij, xa chwach i Ral Chij#7.9 I jun le are i Qajwal Jesucristo.. Ike saq i ki'u', is kuk'am uxaq palma pki'ab'. 10Ike xesik'in chub'ixkil i tziji:
“¡I totajik, olik kumal i keb' chi are i qa-Dios
chi kul pukub'ib'al chi o u'ij,
xaq i Cristo, chi Ral Chij kb'ix che!”
11Xaq konojel i ángel je tak'al b'ik kisutim rij i kub'ib'al chi o u'ij, xaq kisutim kij i nimaq taq winaq, xaq i kajib' je pacha ángel. Xkixukb'a kijolom k'a chwach ulew#7.11 I mer tzij xub'ij are iri: Xkijupij kib' chwach. chwach i kub'ib'al chi o u'ij, xaq xkikoj u'ij i Dios; 12xkib'ij:
“¡Lik keje ile ch-antaj na!
I qa-Dios lik kmajaw che chi kb'ixax u'ij, kqab'ij uchomal,
kqab'ij wach i nim laj unojb'al, xaq kqatioxij che.
Kmajaw che chi kqakoj u'ij rumal wach o pu'ab', xaq rumal ucho'ab'.
Keje i qa-Dios ile k-e ij saq chrij.
¡Lik keje ile ch-antaj na!”
Keje ile xkib'ij i ángel.
13Are uri o jun chke i nimaq taq winaq xutz'onoj chwe: “¿Aweta'am yet je pachin ike le chi saq ki'u' xaq ipa je petnaq wi?” Xub'ij chwe. 14Yin xinb'ij che: “Nim laj winaq, yet aweta'am”. Xinb'ij che. Ire xub'ij chwe: Je are ike chi je elnaq chupam i nim laj uyej chi xik'aw chwach i jyub' ta'aj. (Kijachom kib' pu'ab' i Tol ke.) Kich'ajom i ki'u', xaq ki'anom chik saq che ru' ukik'el i Ral Chij.
15Rumali je o chwach i ukub'ib'al i Dios chi o u'ij,
xaq kki'an kipatan chrij chipa'ij chicha'ab' pa ja re riqb'al ib' ru' i Dios;
Ire, chi kul pa chom laj ukub'ib'al chi o u'ij,
keuchajij na.
16Ike kkitij ti chik numik xaq i k'atik;
xaq kkitij ti chik uyej rumal i ij
xaq kek'atsax ti chik rumal ucho'ab'.
17Keje ile k-an ni chke, man ire chi Ral Chij kb'ix che chi xaq o chuxol i kub'ib'al re i Dios chi o u'ij,
ire keuchajij na pacha je uchij;
keuk'am b'i chuchi' taq i ralaxb'al ya, xaq kkitu' ni ya chi kuya kik'aslemal.#7.17 Salmos 23.1-2; Isaías 49.10.
Ni'pa uwa'al kiwach i Dios kusu ni chke.#7.17 Isaías 25.8; Apocalipsis 21.4.
Currently Selected:
Apocalipsis 7: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
