Apocalipsis 8

Uwuq sello

1Ire, chi Ral Chij kb'ix che, xuraqch'ij i uwuq sello; are uri lik xtz'ini chila chikaj; xuch'ij nik'aj or lik tz'inilik.

Ilanik pa wachij re yijb'al ib'

2Te'uri xewil i wuqub' ángel chi je tak'al chwach i Dios. Are uri, xya' wuqub' trompeta chke, jun ke chkijujunal. 3Te'uri xk'un chik jun ángel, rok'am jun sib'al pu'ab' lik an-o'oj. Xtak'i chwach i sujb'al sipon chi xaq lik an-o'oj chi o chwach i kub'ib'al chi o u'ij. Are uri k'i pom xya' che man kuya puwi i sujb'al sipon an-o'oj junam ru' i kitz'onb'al i jutzob'aj re i Cristo. 4I sib' re i pom chi o pu'ab' i ángel xel b'i chikaj chwach i Dios, junam ru' i kitz'onb'al i winaq chi je re i Dios. 5Te'uri i ángel xunojsaj i sib'al che a'al chi o puwi i sujb'al sipon; xaq xujopij b'i chwach i jyub' ta'aj. Are uri xtataj uch'awb'al i jab', xaq jub'an chik ch'awb'al, xaq xpe jub'an urep ray, xaq xpe jun nim laj kab'raqan.

6Are uri i je wuqub' ángel chi yatal wuqub' trompeta chke, xkiyijb'a kib' chuch'awsaxik.

Uch'awsaxik i kajib' nab'e taq trompeta

7Te'uri i nab'e ángel xuch'awsaj u-trompeta. Are uri xutikb'a li tzaqik i nimaq taq saqb'ach, xaq i a'#8.7 Éxodo 9.23-25. chi antal junam che ru' kik' chwach i jyub' ta'aj. Are uri i ulew xumaj a', urox unimal#8.7 I jyub' ta'aj, we ta o oxib' tant che, jun che i oxib' tant xk'atik. xk'atik, xaq keje i che', xaq ronojel i rax es.

8Te'uri i ukab' ángel xuch'awsaj u-trompeta. Are uri pacha jun nim laj jyub' kjuluwik xk'aq b'i pa mar; urox unimal che i mar xkik'er uwach.#8.8 Éxodo 7.17-21. 9Ni'pa i chikop je k'as chupam, urox unimal chke xekamik. Xaq ni'pa i barco o puwi, urox unimal chke xsach kiwach.

10Te'uri i urox ángel xuch'awsaj u-trompeta. Are uri jun nim laj ch'umil xtzaq li chikaj, lik kjuluwik pacha antorcha. Xtzaq pkiwi urox unimal che i raqana xaq urox unimal che i ralaxb'al ya. 11I ub'i i ch'umil le, “K'a”; kb'ix che. Urox unimal che i nimaq taq ya xu'an k'a che, i rumal i ya k'a le je k'i i winaq xekamik.

12Te'uri i ukaj ángel xuch'awsaj u-trompeta. Are uri xyojtaj i ij, urox unimal xu'on equm che. Xaq keje xu'on che i ik', xaq che i ch'umil; urox unimal xusach uwach kitzunb'al. Rumal uri, urox unimal re i pa'ij xu'on ti saq, xaq keje xu'on che i cha'ab', man nti qas utzunb'al i ik', i ch'umil.#8.12 Éxodo 10.21-23.

13Te'uri xintaqen chikaj, xaq xinta uch'awb'al jun kotxik chi krupup chikaj. Are uri ire xsik'in chub'ixkil: “¡Ay! ¡To' kiwach ike chi je re uwach i jyub' ta'aj! ¡To' kiwach ike are kkich'awsaj ki-trompeta i oxib' chik ángel! ¡Lik to' kiwach ike!” Xub'ij.

Currently Selected:

Apocalipsis 8: ACHICUB

Highlight

Compare

Copy