Apocalipsis 19

1Chrijil iri xinta i ko laj kich'awb'al ke uk'iyal winaq chi xkib'ij chila chikaj:

“¡K'amori che i Dios!

I totajik, i lo'laj u'ij xaq i cho'ab' je re i qa-Dios,

2man Ire lik pusuk' ku'at tzij, lik saq laj tzij u'atik ku'ano.

Suk'ul i u'anom, man uya'om i nim laj tinimit pa tojpen,

chi xeunawsaj ronojel uwach i jyub' ta'aj che i utz taj.

I Dios xuya i tinimit le pa tojpen

man xeukamsaj i je rajpatan Ire.”

Keje ile xesik'in chub'ixkil.

3Te'uri xesik'in tan chik:

“¡K'amori che i Dios!

I sib' re i tinimit le lik kel ni k'a chikaj ronojel ij saq!”

Xkib'ij.

4Are uri i je kajib' juwinaq (24) nimaq taq winaq junam ku' i kajib' b'iroxik chi o kixik' pacha winaq ketzunik, is xkixukb'a kijolom k'a chwach ulew, xaq xkikoj u'ij i Dios chila pa kub'ib'al chi o u'ij. Xkib'ij: “¡Lik keje ile ch-antaj na! ¡K'amori che i Dios!” Xecha. 5Are uri, xtataj jun ch'awb'al pa o wi i kub'ib'al chi o u'ij; chi kub'ij:

Chikojo u'ij i qa-Dios

iwonojel yix chi ix rajchak,

lik chikojo u'ij, iwonojel yix chi nimaq chi ch'utiq

lik chikojo u'ij Ire,

Keje ile xub'ij i ch'awb'al.

B'ix kojb'al u'ij i Dios

6Te'uri xinta pacha kich'awb'al je uk'iyal winaq; xinta yin pacha uch'awb'al uk'iyal ya, ko' upam, xaq pacha k-on uch'awb'al jab' lik ko' upam. Keje iri xkib'ij:

¡K'amori che i Dios,

man i Ajwal ya xujeq u'atb'al tzij,

i qa-Dios chi Ronojel Ktiki che!

7¡Chojkikotoq!

¡Lik chojkikotoq! ¡Chqab'ij u'ij,

man ya xk'un i ij re uk'ulankil i Tol qe,

chi Ral Chij kb'ix che!

I rixoqil#19.7 Cf. Isaías 54.5-6; 62.5; Jeremías 2.2; Ezequiel 16; Oseas 2.19-20; 2 Corintios 11.2; Efesios 5.23-32., uyijb'am chik rib';

8i Dios uya'om che chi kukoj jun u'u' antal che i k'ul lino, chi lik chom,

lik ch'am, xaq lik kwalch'inik.

Keje ile yatal che, man i je re i Dios ni'pa i utz ki'anom,

ke'eloq are u'u' i ixoq,#19.8 I ixoq le, je are konojel i jutzob'aj chi kekojon che i Cristo. lik ch'am xaq lik saq.

9Te'uri i ángel xub'ij chwe: Chatz'ib'aj i tziji: “Utz ke ike chi je sik'im che i nim laj wa'im re uk'ulankil i Tol ke chi Ral Chij kb'ix che. Keje ile chatz'ib'aj.” Xub'ij i ángel chwe. Te'uri xub'ij chik chwe: “I tziji, lik saq laj tzij, lik utzij i Dios”; kub'ij.

10Te'uri xinxuki chwach i ángel, kojb'al u'ij; are uri xub'ij ire chwe: “Ma'an ile, man yin xa in rajchak i Dios, xaqjun pacha yet, xaqjun pacha i awachalal chwach i Cristo, ni'pa i kixterej chrij i saq laj tzij chi u'aljinsam i Jesucristo. Are i Dios chakojo u'ij.” Xub'ij chwe.

Man i saq laj tzij chi u'aljinsam i Jesucristo, are ile chi kyaw pkik'ux i profeta.

Jun ajrij kaway chi lik ajch'akanel

11Te'uri xwil i kaj jaqalik, xaq xwinaqir jun kaway saq rij. O jun kul chrij i ub'i keje iri: “Aj-anol re pacha i ub'im”, xaq “Aj-anol re i saq laj tzij”; keje ub'i ile, man suk'ul i atb'al tzij ku'ano; xaq i ch'oj ku'ano xa are tob'al re i utz. 12I utzunb'al ub'a'wach pacha ktzun urep a';#19.12 Apocalipsis 1.14; 2.18; cf. Daniel 10.6. i ujolom k'i koron o che. Xaq o jun b'iyaj tz'ib'tal che, chi xwi ire reta'am usuk'. 13I u'u' chi ukojom, mub'am pa kik'. I ub'i ire, “Utzij i Dios”, kb'ix che. 14Kiterb'em b'i uk'iyal achiyab' aj chikaj chi je yij che i ch'oj, i ki'u' lik chom, lik saq, xaq lik ch'am, i je annaq chkij jub'an taq kaway saq kij. 15Puchi' i jun kel jun ch'ich' chi k'ulala o uware#19.15 Apocalipsis 1.16.. Ru' i ch'ich' chi k'ulala o uware le, ktiki ni chuqajsaxik kicho'ab' i tinimit re uwach i jyub' ta'aj, te'uri ku'at ni tzij pkiwi ru' nim laj cho'ab'.#19.15 Apocalipsis 2.27-28; 12.5; cf. Salmos 2.9. Ku'an ni chke pacha ku'an jun ajyitz'ol uva are kuwach' i uva ru' i raqan chupam jun perol. Keje ku'an i Dios ile chke chi Ronojel Ktiki Che, rumal i roywal chke. 16I jun le chi xwilo, o ub'i tz'ib'tal chwach u'u', xaq chwach uwi ra'; i ub'i are iri: “I Nim Laj Ajawinel pkiwi konojel i je ajawinelab', xaq Ajwal pkiwi ni'pa i ajwalxelab'.”#19.16 Apocalipsis 17.14; cf. Deuteronomio 10.17. Keje ile tz'ib'tal che.

Uch'akik i chikop aj pa mar

17Te'uri xwil jun ángel tak'al chwach i ij, xsik'in chke konojel i tz'ikin chi kerupup chwa kaj xaq are i kkitij i ti'ij. Xub'ij: ¡Chixpetoq! Chimolo iwib', re i nim laj wa'im chi kuya i Dios. 18Chixpetoq, cholitija kiti'lal i ajawinelab', kiti'lal i kaj-atzil i achiyab' chi je yij che i ch'oj, kiti'lal i achiyab' chi o ukowil kik'ux. Chitija kiti'lal i kaway junam ru' kiti'lal i kajaw. Cholitija kiti'lal konojel, ke i winaq chi je o pa k'ax rumal i rajaw kichak xaq i jub'an chi nti kajaw; nti k-ono we je nimaq o we je ch'utiq; xub'ij i ángel chke i tz'ikin.

19Te'uri xwil chik uwach i nim laj itzel chikop xaq i je ajawinelab' re uwach i jyub' ta'aj ru' kiwinaq chi je yij che i ch'oj, chi kimolom kib' chu'anik ch'oj chrij i jun chi kul chrij i kaway saq rij xaq chkij i uwinaq chi je yij che i ch'oj. 20I itzel chikop xchaptajik, xaq i rachi'il xchaptajik chi pacha profeta, xwiri xa ajt'oronel. Are ire le chi u'anom i nim laj anik rumal ucho'ab' i itzel chikop are o chwach. Rumal i nim laj anik le, je k'i i winaq je ut'orom xwiri xa je are ike chi o chik k'utb'al re i itzel chikop chke xaq kikojom u'ij i uk'exwach. Te'uri i itzel chikop xaq i rachi'il chi ajt'oronel, ike le je k'aslik xek'aq b'i chupam i a'. I a' le pacha uwi i mar kjuluwik chi kjuluw rumal i asufra. 21I jub'an chi kachi'ilam i keb' le xekamsax ru' i ch'ich' chi k'ulala o uware chi kel li puchi' i jun chi annaq chrij i kaway saq rij. Te'uri konojel i tz'ikin lik xenoj ni che i kiti'lal i je kamnaq.

Currently Selected:

Apocalipsis 19: ACHICUB

Highlight

Compare

Copy