Apocalipsis 20

Uch'akik itzel

1Te'uri xwil jun ángel xqaj li chikaj, rok'am jun lawe pu'ab' jaqb'al re uchi' i nim laj jul chi naj qajnaq wi, xaq o jun nim laj karena pu'ab'. 2I ángel le xuchap i jun chi pacha nim laj itzel kumatz; are i itzel kumatz le chi ax o wi; are ire chi “Itzel” kb'ix che, xaq “Satanás” kb'ix che. I ángel xuxim ru' i karena, arewi lajujwinaq kamo' (1,000) junab' uwach. 3Are uri xuk'aq b'i pa jul chi naj qajnaq wi pa jyub', xaq xutz'apij uchi' i jul; te'uri xukoj jun retal chwach i tz'apb'al re, man mijun kujaqo. Keje xu'an ile che man kel ti chal chkit'orik i tinimit chwach i jyub' ta'aj. Keje uwach ile lajujwinaq kamo' (1,000) junab', xwiri are ktz'aqat i lajujwinaq kamo' (1,000) junab' o uchak ko'tax chub'i jub'i'.

4Te'uri xwil jub'an kub'ib'al chi o u'ij ke i atol tzij. I je kul chila je are ike chi Dios uya'om i atb'al tzij pki'ab' re kki'at ni tzij pkiwi i winaq rumal wach i ki'anom. Xaq xwil i kanima ni'pa i je kamsam ni rumal ub'ixkil i saq laj tzij chrij i Jesús. Je are ike chi kk'atzix kijolom rumal ub'ixkil utzij i Dios. Ike je are i kikojom ti u'ij i itzel chikop, xaq mitene che uk'exwach. Xaq kiya'om ti kib' chi koksax retal chwach kikrusil, xaq mitene che ki'ab'. Ike xek'asi chik, te'uri xe'ajawin junam ru' i Cristo, arewi lajujwinaq kamo' (1,000) junab'. 5Xwiri i jub'an chik kamnaq xek'asi ti chik k'a ktz'aqat ni lajujwinaq kamo' (1,000) le. I walijik che i kamik, chi kpe chuxe' i lajujwinaq kamo' (1,000) le, iri are i nab'e walijik che i kamik. 6¡Utz ke ike chi o ke che i nab'e walijik che i kamik! ¡Man lik je ch'am laj utinimit i Dios! Ukab' kamik lik nti ucho'ab' pkiwi ike; je are i ajpatanib' re i Dios xaq re i Cristo, i ke'ajawin ni junam ru' Ire, che i lajujwinaq kamo' (1,000) junab' le.

7Are kk'is i lajujwinaq kamo' (1,000) junab', are uri ko'tax li Satanás kelsax li pa tz'apil wi. 8Ire k-e chkit'orik i Gog xaq Magog, chi je are ni'pa i tinimit re ronojel uwach i jyub' ta'aj. Te'uri i Satanás kumol kichi' i achiyab' chi je yij che i ch'oj, lik je k'i, pacha i uk'iyal i seneb' re i mar. Keumol na re i ch'oj.

9Te'uri, xwil pa wachij chi lik xkimol kib' chrij i lo'laj tinimit re i Dios, lik nojnaq uwach ulew chrij chwach i tinimit le chi lik k'ax kuna i Dios. Xwiri i Dios le xuk'aq li a' pkiwi, is xeuporoj konojel. 10I Itzel, chi je ut'orom te'eq, xk'aq b'i pa nim laj a', chi pacha uwi i mar kjuluwik rumal i asufra. I a' le are i a' pa xk'aq wi i jun chi pacha itzel chikop, xaq i profeta chi xa ajt'oronel. Chila kejilaw wi chipa'ij chicha'ab' k-e ij saq chkij.

I kamnaq k-at ni tzij pkiwi chrij wach i ki'anom

11Te'uri xwil jun nim laj kub'ib'al saq chi o u'ij, xaq xwilo chi o jun kul chila chi lik nim i u'ij uchomal, xwiri chwach Ire xsach uwach i kaj xaq uwach ulew, lik mijun xril chik uwach. 12Xaq xewil i kamnaq je tak'al chwach i Dios; o i je nimaq xaq o i je ch'utiq je tak'al chwach i kub'ib'al chi o u'ij. Ni'pa i ki'anom tz'ib'tal chupam jub'an wuj. I wuj le o i xjaqawik; te'uri xjaqtaj jun chik wuj chi are i wuj re i k'aslemal. I je kamnaq, x-at ni tzij pkiwi, wach i ki'anom, chrij pacha i tz'ib'tal chupam i wuj.#20.12 Daniel 7.9-10. 13Ipa krajawin wi i kamik xeujach i kamnaq chi je o te'eq ru' ire, xaq i mar xeujach i kamnaq, i konojel ike x-at ni tzij pkiwi chrij wach i ki'anom pkik'aslemal. 14Te'uri, i rajaw i kamik xk'aq b'i chupam i uk'ijib'al a'. I k'ijib'ali re i a', are i ukab' kamik. 15Chupam i a' le, xek'aq b'i ni'pa i tz'ib'am ti kib'i chupam i wuj re i k'aslemal saqil. Keje ile x-aljinsax chwe.

Currently Selected:

Apocalipsis 20: ACHICUB

Highlight

Compare

Copy