Apocalipsis 17

Ilanik pa wachij re yijb'al ib'

1Te'uri xk'un jun chke i wuqub' ángel, chi kuk'am te'eq i kitu'b'al pki'ab', xub'ij chwe: “Sa'aj wu', kink'ut ni tojpen chawe chi kpe puwi i ixoq chi kuch'ak umer chwach i uch'akul#17.1 I mer tzij xub'ij are iri: I lik ajmak laj ixoq. chi o chuk'ulel uk'iyal ya. 2I je ajawinelab' re uwach i jyub' ta'aj ki'anom i utz taj chwach i Dios rumal i tinimit le; xe'eloq pacha kki'an i achiyab' ru' jun ixoq chi kuch'ak umer chwach uch'akul. Ni'pa i winaq re uwach i jyub' ta'aj ki'anom i utz taj junam ru' i tinimit le; xe'eloq pacha xe'ab'ar che i uwa'al uva muqb'am chi uya'om ire chke.” Keje ile xub'ij i ángel chwe.

3Are kintijin chrilik ile pinwach, i Lo'laj Utewal i Dios xu'an chwe chi xink'am b'i che jun tz'inilik jyub' chaqij rumal i ángel le.

I ixoq annaq chrij i itzel chikop

Chila xwil wi jun ixoq annaq chrij jun pacha itzel chikop kaq rij. I itzel chikop le o uk'iyal taq b'iyaj tz'ib'tal chwach ronojel uch'akul, chi lik qajsab'al re u'ij i Dios; xaq o wuqub' ujolom, xaq o lajuj rok'a'. 4I ixoq le lik uwiqom rib' ru' u'u' chi k'iyal taq utzunb'al, o i kaq che; xaq o i kaqkoj che pacha kaqxar. Xaq lik uwiqom rib' ru' b'iroxik chi an-o'oj, chomiq taq ab'aj#17.4 I mer tzij xub'ij are iri: Uwiqom rib' ru' anpwaq, ru' perla, xaq ru' jub'an ral taq ab'aj chomiq, paqal rajil. xaq i perla. Xaq o jun tu'b'al pu'ab', lik an-o'oj. Xwiri i tu'b'al le, nojnaq che i utz taj, xaq che i ch'am taj chi petnaq che uch'akik umer chwach uch'akul. 5I ixoq o jun b'iyaj tz'ib'tal chwach ukrusil, are jun b'iyaj chi etamam ti usuk'. Keje iri kub'ij: “Iri are i nim laj Babilonia, chi kichuch konojel i je ajmakib' laj taq ixoqib', xaq konojel i je aj-anol utz taj chwach i jyub' ta'aj.” 6Are uri xwilo chi i ixoq lik ab'arel, xwiri ire ab'arel rumal i kikik'el i je re i Dios, xaq rumal i kikik'el ike chi je ajsaqinel tzij chrij i Jesús#17.6 I usuk' i tzij xub'ij: Are ya kk'un i k'isb'al ij, je k'i i je re i Dios kekamsax na kumal i aj tinimit Babilonia..

Are xwilo, lik xinb'isoj. 7Te'uri i ángel xub'ij chwe: “¿B'uchak katok il che?” Xcha. Yin kinsaqij chawe wach usuk' chi uwam uwach re i ixoq le xaq i itzel chikop chi ok'awnaq, chi o wuqub' ujolom, xaq o lajuj rok'a'. 8I nim laj itzel chikop le chi xawilo, k'as te'eq, xwiri wo'or nti chik. Xwiri ya kel chal pa nim laj jul chi naj qajnaq pa jyub', te'uri ksachsax ni uwach. I winaq chi to' je re uwach i jyub' ta'aj kkib'isoj na are kkil uwach. Je are ike chi tz'ib'am ti kib'i chupam i wuj pa tz'ib'tal wi kib'i ni'pa i o kik'aslemal saqil. I wuj re i k'aslemal, ax o wi k'a chuxeb'al li ij saq. Ni'pa i tz'ib'tal ti kib'i chupam i wuj le, kkib'isoj na are kkil uwach i nim laj itzel chikop le chi k'as te'eq ujer, xwiri wo'or nti chik, xwiri ya kk'un tan chik.

9Are i kinb'ij chawe ri, are kraj o ano'oj chutayik ub'e. I wuqub' ujolom i itzel chikop le are i wuqub' uwi i jyub' re i nim laj tinimit ipa kul wi li ati ixoq le#17.9 I mer tzij xub'ij are iri: Are i wuqub' uwi jyub' pa kul wi i ixoq., xaq i wuqub' jolomaj le ke'eloq are wuqub' nimaq taq ajawinelab'. 10Jo'ob' chke i ajawinelab' le je kamnaq chik, i jun k'a ktijin che u'atb'al tzij; i jun chik k'amaja kk'unik. Xwiri are kk'un i jun chi k'isb'al re le, lik knajtin ti chik. 11I nim laj itzel chikop chi k'as te'eq ujer, chi wo'or nti chik. Ire le are i uwajxaq ajawinel tupu kikwenta i wuqub' ajawinelab'. Chi lik kumaj b'i ub'e re usachik uwach ronojel ij saq.

12I lajuj ok'a' awilom, ke'eloq je are lajuj ajawinelab' chi k'amaja kkijeq ki'atb'al tzij. Kya' ni chke chi je ajawinelab', xwiri xa jun or kki'at ni tzij junam ru' i nim laj itzel chikop. 13I lajuj ajawinelab' le, xaqjun kino'oj chkiwach: Kkiya ni ki'atb'al tzij pu'ab' i nim laj itzel chikop; lik kkito na. 14Ike kki'an ni ch'oj chrij i jun chi Ral Chij kb'ix che. Xwiri ire, junam ku' i je teren chrij, ketiki ni chke, man ire are i nim laj Ajawinel pkiwi konojel i ajawinelab', ni'pa i je teren chrij ire je chatalik xaq je sik'tal rumal i Dios; ike kko'taj taj.#17.14 Apocalipsis 19.16; cf. Deuteronomio 10.17; Daniel 2.47.

15I ángel xub'ij chik chwe: I uk'iyal ya chi xawilo, ipa kul wi i ch'am laj ti ixoq#17.15 I ch'am ti laj ixoq xub'ij le, are i mal laj tinimit., ke'eloq je are uk'iyal taq winaq, uk'iyal taq tinimit, uk'iyal taq ulew, uk'iyal taq kijayil xaq uk'iyal taq ch'ab'al. 16I lajuj ok'a' chi xawilo xaq i nim laj itzel chikop, k-on panoq tzel kkil ni ixoq le chi kuch'ak umer chwach uch'akul. Ike xa kko'taj kanoq; kkikanaj kanoq lik ch'analik. Kkitij ni uti'ijlal, xaq kkiporoj na. 17I Dios uya'om pkinojb'al chi kki'ano pacha kraj ire. Chi kkijunamsaj kinojb'al re kkijach ni ki'atb'al tzij pu'ab' i nim laj itzel chikop. Keje kki'an ike ile k'a ktz'aqat ni ronojel pacha ub'im i Dios. 18I ixoq le chi xawilo are i nim laj tinimit chi krajawin pkiwi i ajawinelab' re uwach i jyub' ta'aj. Keje ile xub'ij i ángel chwe.

Currently Selected:

Apocalipsis 17: ACHICUB

Highlight

Compare

Copy