Apocalipsis 16

1Are uri xinta jun nim laj ch'awb'al, chi xch'aw li pa lo'laj k'ijib'al re i Dios. Keje iri xub'ij chke i wuqub' ángel: “I tojpen re i Dios chi o chupam i wuqub' tu'b'al le, cheijopij b'i chwach i jyub' ta'aj.” Xb'ix chke.

I wuqub' tu'b'al

2X-e i nab'e ángel i xujopij b'i wach o chupam utu'b'al chwach i jyub' ta'aj. Ni'pa i winaq chi o ub'i i nim laj itzel chikop chwach kikrusil, xaq kikojom u'ij uk'exwach, ike le xpe ch'ak che i kich'akul. Ile lik itzel ch'ak, lik k'ax.#16.2 Cf. Éxodo 9.8-11.

3I ukab' ángel xujopij b'i re ire puwi i mar. Are uri i mar lik xu'on kik', pacha ukik'el jun winaq kamsam. Are uri xekam konojel ni'pa i je k'as pa mar.

4I urox ángel xujopij b'i re ire puwi taq i ya, xaq pa taq ralaxb'al ya; are uri xu'on kik' uwach i ya.#16.4 Cf. Éxodo 7.17-21. 5Te'uri xinta uch'awb'al i ángel chi kurajawij i ya; xub'ij:

“Yet lik at suk'ulik, man keje u'atik i tzij ile ka'ano, Lo'laj Dios, lik at ch'am yet ax at o wi k'a chuxeb'al li ij saq, xaq are at o wo'or.

6Ike xkituruwsaj i kikik'el

i lo'laj atinimit chi ch'am,

xaq ke i profeta.

Wo'or a'anom chke chi kkitu' ni ya chi kik'ernaq chik uwach.

¡Lik kmajaw ni ile chke!” Xub'ij.

7Xaq xinta jun ch'awb'al, xch'aw li pa o wi i sujb'al sipon. Xub'ij che i Dios: “Qatzij ile, Ajwal Dios, yet chi Ronojel Kattiki Che; i tojpen le lik kmajawik lik utz, suk'ulik”; xub'ij.

8Te'uri i ukaj ángel xujopij b'i wach o chupam utu'b'al puwi i ij. Xuya ucho'ab' i ij re keuk'atsaj ni winaq ru' utzunb'al. 9Konojel lik xek'at ni rumal, xwiri, xkijalwachij ti kik'aslemal. Xaq xkikoj ti u'ij uchomal i Dios, xa k'ax xech'aw chrij, chi lik o pu'ab' kutaq li tojpen pkiwi.

10I ujo' ángel xujopij b'i utu'b'al puwi ukub'ib'al i nim laj itzel chikop; are uri lik x-equmar pa taq tinimit chi o pu'ab' i nim laj itzel chikop. I winaq lik xkiqach'ach'ej utzam ka' rumal uk'axk'ol.#16.10 Cf. Éxodo 10.21-23. 11Xwiri, lik xkimayij ti u'anik i utz taj chi kki'ano, xa k'ax xech'aw chrij i Dios aj chikaj rumal i ch'ak o chke xaq rumal taq uk'axk'ol.

12I uwaq ángel xujopij b'i utu'b'al puwi i nim laj raqana Éufrates. Are uri, i ya xchaqijik;#16.12 Cf. Isaías 11.15; Jeremías 50.38. i ub'eya xe'eloq jun nim laj kib'e jub'an ajawinelab' chi kek'un prelb'al ij#16.12 I je ajawinelab' le kk'unik kkimolb'ej kib' chu'ankil ch'oj chrij i Dios..

13Are uri xwil oxib' itzel tew pacha je ixtutz' ketzunik. Jun xel puchi' i nim laj itzel kumatz; jun chik puchi' i nim laj itzel chikop; xaq jun chik puchi' i jun chi u'anom che rib' pacha profeta. 14I oxib' itzel tew le are i kitewal itzel chi kki'an taq i nimaq taq anik. Ike ke'e na, kkimol kichi' i nimaq taq ajawinelab' re uwach i jyub' ta'aj, re i ch'oj chi k-an ni pa k'isb'al ij, chupam i nim laj ij re i Dios chi ronojel ktiki che.

15Kub'ij i Ajwal: “Chita pe', yin kinupon ni iwu' are nti kich'ob' che, pacha rokik jun ili'om. Utz re i jun chi lik kk'ask'atik in roy-em, uyijb'am chik u'u' are kinuponik. Keje ile ch'anal ti uri kb'inik, kk'ix ti uri chkiwach i winaq.”

16Te'uri i oxib' itzel tew xekimol i nimaq taq ajawinelab' che i jyub' chi Armagedón kb'ix che kumal i aj Hebreo.

17Te'uri i uwuq ángel xujopij b'i pa tew wach i o chupam utu'b'al. Are uri xtataj jun nim laj ch'awb'al pa lo'laj k'ijib'al re i Dios chila chikaj; lik ru' i Jun xpe wi, chi kul pa kub'ib'al chi o u'ij. Xub'ij: “Ya x-antaj ile.” Xcha. 18Are uri xpe jub'an urep ray, xaq xtatajik chi kraqlaj ray, xaq xtataj jub'an chik ch'awb'al. Xpe jun nim laj kab'raqan. I kab'raqan le, mas nim chwach taq i kab'raqan chi ik'awnaq loq are je tikarnaq wi li winaq chwach i jyub' ta'aj. 19I nim laj tinimit lik xraqch'ijik, xu'on oxib' tant. Ronojel i tinimit chwach i jyub' ta'aj xewulijik. I Dios xk'un chuk'ux uk'iyal makunik re i nim laj tinimit Babilonia; nim i roywal che, rumali, lik nim i tojpen xupetsaj puwi#16.19 I mer tzij xub'ij are iri: “I Dios xu'an pen che i Babilonia chi kutij i uwa'al uva muqb'am xuya che.” (I uwa'al uva muqb'am le are i tojb'al mak xuya puwi rumal i roywal).. 20Ronojel i nimaq taq jyub' xesachik, xaq keje ronojel i ral taq ulew chi je setel puwi i mar. 21Xaq xtzaq li nimaq taq saqb'ach#16.21 Cf. Éxodo 9.22-26. chikaj pkiwi i winaq; i ralil jun kolo o jun tintal che. I winaq xa k'ax xech'aw chrij i Dios rumal i saqb'ach le; man ile jun tojpen lik nim.

Currently Selected:

Apocalipsis 16: ACHICUB

Highlight

Compare

Copy