Popular Bible Verses from Apocalipsis 10

Share

Are kuriq i ij chi kuch'awsaj u-trompeta i uwuq ángel, are i k'utb'al re uri chi Dios ya xutzin chuyijb'axik wach uch'ob'om na. Pacha i ub'im chke i rajchak ujer, chi profeta, keje ku'an ni ile.” Keje ile xub'ij i ángel.

Te'uri xb'ix chwe: “Yet, o uchak kapaxsaj chik utzijol wach k-on ni Dios chke uk'iyal taq tinimit, uk'iyal taq ulew, uk'iyal taq atol tzij, uk'iyal taq winaq, xaq i jalajuj taq ch'ab'al.” Xb'ix chwe.

Te'uri, xwil chik jun ángel, nim ucho'ab', ktijin li uqajik chikaj. Ire ch'uqum rij che i sutz', xaq o jun xok-ab' puwi ujolom. I upalaj pacha utzunb'al ij kwalch'inik, xaq i raqan pacha ketzun a' chi kjuluwik.

Are uri xin-e ru' i ángel, xaq xintz'onoj i ral wuj che. Ire xub'ij chwe: “Chachapa xaq chatija b'ik. Ile ku'an ni che i pachi' pacha ujelal uwa'al kab', xwiri are o chik chapam, k-on ni k'a.” Xub'ij chwe. Te'uri xinchap i wuj chi o pu'ab' i xintijo. I pinchi' xu'ano pacha ujelal uwa'al kab', xwiri, are xtijtajik, lik xuya ni uk'ayil chinpam.