Abd%EDas 1
1
Uqajsaxik u'ij i Edom
1I Ajwal xuya i tzijonik puwach ma Abdías.
Qatom jun tzijonik re i Ajwal;
jun ajb'il tzij enaq b'i pa nimaq taq tinimit, chub'ixkil:
“¡Chixwalijoq! ¡Jo pa ch'oj chrij i tinimit Edom!”
I Ajwal Dios kub'ij che i Edom:
2“Kin-an ni ch'utin chawe chkixol i nimaq taq tinimit
xaq lik kinqajsaj ni a'ij.
3I u'anik nim che awib' lik at ut'orom.
At jeqel pa taq jul re uxol nimaq taq ab'aj
xaq lik at jeqel puwi i nimaq taq jyub',
rumali lik kach'ob'o:
Chi mijun katk'aqaw pulew.
4Tupu katel b'i k'a naj chikaj pacha i kotxik
tupu ka'an asok chuxol taq ch'umil,
lik k'a chila na katink'aq wi loq.”
I Ajwal kub'ij.
5“We kek'un taq ili'omab' awu' cha'ab' pa el-anik,
kkik'am tu b'i ronojel;
we xaq kek'un ajmolol uva
kkiya kan keb' oxib' ch'uyaj.
Xwiri i je ajch'oj chawij,
lik kiqajsam a'ij.
6¡Lik xel-ax b'i ub'itaq awe ma Esaú!
¡I ub'itaq awe chi awuwam chi o u'ij i lik k'ax kana'o xel-ax b'ik!
7Konojel i kiya'om kiwach awu', xatkit'oro;
lik xatkesaj b'i chwach awulew.
Tupu i jub'an chi kichomam kib' awu' lik xech'ojin chawij,
i je awamiy chi lik kul te ak'ux chke
lik xatkich'ako man xkikoj tzaqsab'al pa b'e.
¡I tinimit Edom lik nti unojb'al!”
8I Ajwal kub'ij:
Yin are kinya utojb'alil che i tinimit Edom,
kinsach ni kiwach konojel i o kinojb'al
xaq kwesaj ni kinojb'al
i je jeqel chwi taq jyub' re ma Esaú.
9I achiyab' chi je yij che i ch'oj re Temán lik kesiksat ni rumal i kixib'rikil,
chwi taq jyub' re ma Esaú,
lik mijun kk'asi kanoq.
Umak i Edom
10Lik kya' ni ak'ix xaq lik ksach ni awach ronojel ij saq,
rumal xab'ij k'ax xaq xakamsaj acha' a Jacob.
11Are i achiyab' chi je yij che i ch'oj chi je aj naj
xkiraqij b'i okb'al re i tinimit Jerusalén,
i je ajch'oj le are xkel-aj b'i b'eyomal re i tinimit,
¡Yet xajek' awib'!
Are xkisakij chkiwach ni'pa
i b'eyomal chi xkik'am b'ik,
¡Yet xa'an che awib' pacha taq at kachi'il ike!
12Utz ti xa'ano chi xatkikotik
are xtzaq acha' pa k'ax,
mat xatkikot chke i rak'al ma Judá
che i ij are xetzaq puyej,
xaq mat xeayo'ya
che i ij are je o puk'axk'ol.
13Xaq mat xatok pintinimit
che i ij are o pa k'axk'olil,
xaq mat xatkikot
che uk'ax are o puyej,
xaq mat xawel-aj ub'eyomal
che i ij are o pa jalajuj taq k'ax.
14Xaq mat xattak'i xol taq b'e
re keakamsaj i jub'an chi ke'anmaj te chwach i kamik,
xaq mat xeajach i jub'an chi xe'anmaj
che i ij are o i kamik.
15Pacha u'anik xa'an yet chke i jub'an xaq keje u'anik ile k-an chawe yet:
¡Lik kya'ix ni utojb'alil chi kmajaw chawe!
Man naqaj chik o wi u'ij i Ajwal
pkiwi konojel i nimaq taq tinimit.
Ukojik u'ij i tinimit Israel
16Keje pacha uk'ayil i uwa'al uva muqb'am chi xitu' yix
chila puwi i lo'laj injyub',
xaq keje uk'ayil i uwa'al uva muqb'am ile chi kkitu' i jub'an chik nimaq taq tinimit,
kkitu' na, lik kkitu' na;
lik ksach ni kiwach konojel chwach i jyub' ta'aj.
17Xwiri i jyub' Sion are ni jun lo'laj k'ijib'al re i Dios,
chila ketotaj wi jujun.
I je umuq uxikin i ma Jacob
kkik'am chik i kulew;
18i je umuq uxikin i ma Jacob xaq i re ma José
je keje na pacha jun a' xaq pacha urep a',
xwiri i je re i ma Esaú je keje pacha i k'im chaqij;
chi i a' le, kuk'is kiwach konojel.
¡Lik mijun chke i je re ma Esaú ktotajik!
Yin in Ajwal xinb'ij.
19-20I je aj Israel re Neguev kek'iji ni che i k'ijib'al re i jyub' re ma Esaú, i je aj chwa ta'aj kkik'am ni kulew i je aj Filistea. Xaq kek'iji ni chwach ulew re ma Efraín xaq i ulew re i Samaria, i je re ma Benjamín kkik'am ni kan i ulew ke aj Galaad. I uk'iyal winaq re i tinimit Israel chi xe'elsax b'i pkitinimit kkik'am ni ulew ke aj Canaán k'a che i Sarepta, xaq i winaq aj Jerusalén chi je o pa Sefarad kek'iji ni chwach i nimaq taq tinimit Neguev. 21Ke'el nu b'i ajch'akanel puwi i jyub' Sion re kki'at tzij chkij i je o puwi i jyub' re ma Esaú, i are ni Ajwal krajawinik.
Currently Selected:
Abd%EDas 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
