Jon%E1s 1
1
Ma Jonás k-anmaj chwach i Dios
1I Ajwal xu'ijla ma Jonás, chi uk'ojol ma Amitai, i xub'ij che: 2“Jat, jat chila che i nim laj tinimit Nínive i chatzijoj chke chi kinsachsaj kiwach, man k'a wu' Yin k'unnaq wi utzijol re i kimak atzalal.”
3Xwiri ma Jonás, xa xuqelo wach xb'ix che, xa x-anmaj chwach i Ajwal, i x-e chila che i okb'al chuchi' i mar re Jope, chila xuriq wi jun barco chi elik chub'i re enam re pa Tarsis; are uri xutoj i k'amb'al b'i re, i x-an b'i chupam i barco chi enam chik re. 4Xwiri i Ajwal xu'ano chi xpe jun nim laj tew chi lik nim ucho'ab', xaq xpe jun nim laj jab' ray upam puwi i mar chi lik ya ku'an te ch'aqa taq che i barco. 5I ajchakib' re i barco lik xkixij kib', chkijujunal xe'ok chutz'onoxik che i ki-dios. Pa k'isb'al re, xkik'aq b'i ronojel i eqan pa mar keje ile mas kb'in i barco. Tz'aqat ma Jonás, qajnaq b'i chupam i k'olb'al b'iroxik chupam i barco, chila xkanaj wi lik kwarik. 6Are uri i aj-atzil ke i winaq chi kok'am i barco x-e chila ipa o wi ma Jonás, xub'ij che:
—¿Wach ka'an yet chi, chi to' waram ka'ano? ¡Chatwalijoq xaq chatz'onoj che a-Dios! Moqxa kraj kojrilo xaq kojuto.
7Tz'aqat, i ajchakib' re i barco kkib'ij chkiwach:
—Kqapaj chqawach, ilb'al re pachin ajmak che i k'ax chi oj o wi ri.
Are xkipaj chkiwach are ma Jonás xelik ajmak. 8Are uri xkib'ij che:
—Chab'ij chqe wach uchak petnaq i k'axi pqawi. ¿Wach rumal o wach kak'ayij chi at o chi? ¿Ipa katpe wi? ¿Pachike atinimit? ¿Pachike lemajil katpe wi?
9Ma Jonás xula' uwach chke:
—Yin in aj Hebreo, i kinkoj u'ij i Ajwal Dios aj chikaj, chi anawnaq i mar xaq i ulew.
10-11Ma Jonás xulap chke aj-ok'al i barco chi ire xa anmajnaq b'i chwach i Ajwal, ike are xkita ile xaq xkilo chi i mar lik mas kel chikaj, lik xkixij kib' xaq xkitz'onoj che:
—¿B'uchak xa'an iri? ¿Wach nawi kqa'an chawe yet man keje ile kuxlan i mar?
12Ma Jonás xub'ij:
—Chinik'aqa b'i pa mar man keje ile i mar kuxlan na. Yin lik weta'am chi are yin in ajmak, rumali i nim laj jab' tew upam petnaq piwi.
13I aj-ok'al barco xe'ok chutakpuxik i barco ru' i che' takpujb'al b'i re, ru' ronojel kicho'ab' tejeb'sab'al pan re chuchi' ya, xwiri xetiki ti che, man i mar lik xa mas xwalij ucho'ab' rumal roywal. 14Are uri xki'an kitz'onb'enik chwach i Ajwal i xkib'ij: “Ajwal, maya chqe kojkam rumal umak i achi ri. We nti umak, maya chqaqul ukamik, man yet, Ajwal, ka'ano pachike kawaj.”
15Are xb'itaj iri, xkik'aq b'i ma Jonás pa mar, are uri i mar xuxlanik. 16I aj-ok'al i barco are xkil ile, xkina jun nim laj kojb'al u'ij i Ajwal pkik'ux xaq xkisujuj jun sipon chwach xaq xki'an jun sujunik.
17Tz'aqat, i Ajwal uyijb'am jun nim laj kar b'i'b'al b'i re ma Jonás. I ma Jonás xk'iji oxib' ij xaq oxib' a'ab' chupam i nim laj kar.
Currently Selected:
Jon%E1s 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
