Nah%FAm 2
2
1 Chata pe' tinimit Nínive, i ajsachanel ktijin u'enam chawij yet.
¡Chayijb'a i awajchajinel che i k'ijib'al re ukowib'al i tinimit!
¡Chak'ak'alij i b'e!
¡Chaxima i ach'ich' re ch'oj xe apam!
¡Chayijb'a acho'ab' che i ch'oj!
2Man i Ajwal kuyak tan chik u'ij i ma Jacob,
xaq u'ij i tinimit Israel,
pacha te'eq u'anom ujer are k'amaja kkel-aj b'i ub'itaq re,
are xkikanaj kanoq pacha taq jun che' nti u'ab'.
3I ch'ich' re tob'al kib' i uwinaq chi je yij che i ch'oj lik kaq ktzunik
xaq lik kaq i ki'u'.
¡Lik je yij chik che i ch'oj!
I kich'ich' re kib'inb'al lik keje ktzunik pacha i a';
i kikaway lik kek'achirik.
4I ajch'oj je o pa taq b'e chupam i kich'ich' re kib'inb'al, lik kkich'ij b'e rumal koywal,
lik to' ke'e k'ulala chi taq k'eb'al,
lik je keje pacha antorcha tzijom,
keik'awik pacha utzunb'al ray.
5I ajawinel keusik'ij i rajpatanib',
ike kkitakij kaqan
che i ch'ich' xaq che i tapial are ke'e pa'anem,
che i tob'al kib' chi yij chik.
6I tz'apb'al uchi' i raqana kejaqtaj na,
i nim laj ja re i ajawinel ktzaq na li pulew.
7Kelsax b'i ati ajawinel pa cho'ab' chwach rulew;
junam ku' i rajtaqon,
lik kejilawik pacha i palomax
xaq lik ke'o'ik kkich'ay uwach kik'ux ru' ki'ab'.
8Keje pacha i ya chi o atb'al re xwiri xa o tel che i atb'al re,
keje ile ke'anmaj i winaq aj Nínive.
“¡Chixtak'al loq! ¡Chixtzalij loq!” Keje ile kesik'in ni chke,
xwiri mijun ktzalij loq.
9¡Chiwel-aj i saqpwaq! ¡Chiwel-aj i anpwaq!
¡Ub'eyomal i tinimit Nínive nti uk'isik!
10Lik wulijnaq, chaqij jyub', tz'inilik jyub' o'tam,
lik keje ile u'anom i tinimit Nínive.
I kanima i winaq lik ksach rumal xib'rikil,
lik ksiksat i kich'ek,
konojel nti chik kicho'ab'
xaq i kipalaj lik ksach utzunb'al.
11¿Wach kkanaj chupam kijul i koj,
chupam kisok i rak'al i koj?
Chila i koj xaq i kak'al
lik utz te'eq kkina'o;
lik mijun te'eq kexib'iwik.
12I ma koj kukamsaj uti',
kujach re ati koj xaq ke i rak'al,
xaq kunojsaj ujul che taq i ch'aqa taq chikop chi je ukamsam.
Usachik uwach ronojel i tinimit Nínive
13I Ajwal chi ronojel ktiki che kub'ij:
“Chi in o wi chu'anik ch'oj chawij:
Keink'atsaj ach'ich' re i ch'oj, lik kin-an ni sib' chke;
keinkamsaj ni ral taq awak'al;
kinsachsaj ni uwach i el-anik chi o chwach awulew,
xaq lik ktataj ti chik mas i kich'awb'al i keb'iw atzij.”
Currently Selected:
Nah%FAm 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
