Miqueas 7
7
I utz ti laj anik re i tinimit Israel
1¡To' inwach yin! In keje pacha i jun chi kutzukuj pich'ol
are ik'awnaq chik i molonik,
xaq kuriq ti chik uva xaq i higo,
i echa' le chi kwaj te'eq utijawik.
2Lik nti chik winaq chwach i jyub' ta'aj chi lik je suk'ulik xaq je nti chik i kkikub'a kik'ux che i Dios;
konojel koy-em i ij
re u'anik i ch'oj;
to' chkiwach ike kkikoj i tzaqsab'al kib'.
3Lik je tijonel re i utz taj;
i ajpatanib' kkitz'onoj mer chke i winaq,
i aj-atol tzij kkik'am i mer chi ksujux chke,
i nimaq taq aj-atzil kki'ano wach kkaj ike,
i kkitzij i tinimit.
4I jun chi mas utz chke ike keje pacha jun k'ix;
i jun chi lik utz unojb'al keje pacha jun k'ix zarza.
Xwiri kk'un ni ij chi kyijb'axik ni'pa i ki'anom,
i ij chi xub'ij i ajchajinel chawe.
Are uri krajawin ni sachb'al no'oj chkixol ike.
5Makoj taq utzij alok'anij;
i lik makub'a ak'ux che jun awamiy
xaq chana awib' che taq i tzij are katlapan ru' awixoqil.
6Man i alk'uwalxelab' lik kkiqajsaj ki'ij i kiqajaw kichuch,
i altom kkiqel kichuch,
i alib'xelab' kkiqel i kichuch kalib'
i je ajch'oj chkijujunal xa chkiwach je alal.
7Xwiri yin kwoy-ej ni che i Ajwal
xaq kinya ni kub'ib'al ink'ux che i Dios chi Tol we,
man ire kinuta na.
I saqil laj uch'akanik i tinimit Israel
8Yet, tinimit, chi at ajch'oj chwij, matkikot che intzaqik puyej,
tupu xintzaqik xwiri kinwalij chik;
tupu usutim wij i equm,
xwiri are i Ajwal intzunb'al.
9In makunnaq chwach i Ajwal,
rumali kinch'ij ni roywal;
tz'aqat Ire ku'at ni tzij puwi wach in-anom
xaq ku'an ni atb'al tzij chwe.
I Ajwal kinresaj ni chisaq,
ku'an ni chwe chi kwil uch'akanik.
10Are uri i ixoq chi ajch'oj chwij lik kril na,
i lik kk'ix ni che.
Ire xub'ij te'eq chwe: ¿Ipa o wi Awajwal Dios?
Xwiri wo'or lik kinkikot ni chrilik
chi kya'yax ni uwi pacha xo'ol pa taq b'e.
Uyijb'axik tan chik i Jerusalén
11Tinimit Jerusalén ya kuriq i ij
chi kyak tan chik atapial
xaq i uchi' awulew lik knimar uwach.
12Ya kuriq i ij
chi kek'un ni jalajuj taq tinimit awu':
K'a che li Asiria k'a pa Egipto,
k'a che li raqana Nilo k'a Éufrates,
che jun mar k'a che chik jun mar, xaq che jun jyub' k'a che chik jun jyub'.
13I jyub' ta'aj ku'an ni tz'inilik jyub' chaqij
rumal kimak uwinaq,
rumal i utz taj chi ki'anom.
Lapanik ru' i Dios rumal i elik chisaq re i tinimit
14¡Ajwal, chachajij atinimit,
man je are i chij chi lik je awe yet,
chi kitukel je o pa taq k'achelaj,
chi sutim kij che i utz laj ulew!
Cheak'ama b'ik pacha te ujer,
chwa taq k'im re i Basán xaq i Galaad.
15Cha'ana chke chi kkil nimaq taq anik,
keje pacha che taq i ij are xeawesaj li pa Egipto.
16¡Xaq i jub'an chik nimaq taq tinimit chkila,
chk'ix kipalaj che
tupu lik o kipatan!
¡Chekanajoq pacha taq kel ti kich'ab'al xaq pacha taq je tak!
17¡Chkiri'a uk'aj ulew pacha taq i kumatz
xaq keje pacha i jub'an chik chikop chi kejukuk chwach ulew!
¡Che'el b'i pikisok kesiksatik,
xaq ru' xib'rikil keupon tan chik
chawach yet Qajwal Dios!
I Dios kukuy umak utinimit
18Lik nti chik jun Dios pacha Yet,
man Yet kakuy i mak atzalal
xaq ksach chak'ux uqelanik
i jutzob'aj uqax atinimit.
Yet lik kak'ut i k'axnab'al ak'ux chqe,
i awoywal Yet lik ronojel ti ij uwach chqe.
19Chawila tan chik tob'al qawach
xaq chamuqu i qamak atzalal.
Chak'aqa b'i qamak
k'a pa cho re i mar.
20¡Lik arewi ch-ol ni kub'ib'al ak'ux xaq i k'axnab'al ak'ux, Ajwal,
chi asujum li ujer
chke i qatit qamam mam Abraham xaq i mam Jacob!
Currently Selected:
Miqueas 7: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
