Miqueas 6
6
Uch'ojinik i Ajwal chrij i tinimit Israel
1Chita yix wo'or wach kub'ij i Ajwal:
“¡Chatwalijoq i chalapa wach i rajwaxik chawe chkiwach i nimaq taq jyub',
xaq i uwi taq loma chkita i ach'awb'al!”
2Chita yix nimaq taq jyub'
xaq yix ukub'ib'al i jyub' ta'aj:
I Ajwal kuyijb'a ni jun u'atik tzij chrij utinimit,
kuyak jun ch'oj chrij i tinimit Israel.
3Iri are kub'ij i Ajwal:
“Chala'a uwach chwe, intinimit,
¿Wach in-anom chawe chi xpe awoywal chwe?
4Yin xatwesaj li pa Egipto, xatinto pu'ab' i tinimit le chi at uya'om te'eq pa k'ax;
Yin xintaq b'i a Moisés, Aarón xaq i al Mariy
re katkesaj li chila.
5Intinimit, chk'un chak'ux
uch'ob'onik a Balac, ajawinel re i Moab,
xaq i ula'ik uwach chi xub'ij i a Balaam chi uk'ojol i ma Beor.
Chk'un chak'ux are xatik'aw pa Sitim k'a pa Gilgal,
xaq xawetamaj i ch'akanik re i Ajwal.”
Urayijb'al i Ajwal che i winaq
6¿Wach nawi ru' kink'ut wib' kojb'al u'ij
i Ajwal, Dios aj Chikaj?
¿Kink'ut nawi wib' chwach Ire ru' me' chi o jun junab' che,
re kinporoj chwach Ire?
7¿Kkikot nawi i Ajwal, we kinsujuj lajujwinaq kamo' (1,000) ral taq mama'ib' chij che?
¿Kkikot nawi ru' lajujwinaq kamo' (10,000) raqana re aceite?
¿Kkikot nawi we kinsujuj i wak'al atz che
tojb'al re inqelanik xaq re inmak atzalal?
8I Ajwal ub'im chik chawe, yet winaq,
pachike usuk' i utz
xaq wach i utz chi kraj Ire ka'ano:
Cha'ana i suk'ulik, chawila tob'al kiwach i nib'a'ib', cha'ana ajaj che awib'
xaq chatkojon ru' unimal ak'ux che a-Dios.
Tzijonik chrij i tzaqsab'al xaq i t'oronik
9I Ajwal ktijin chusik'ixik i tinimit,
xaq lik ru' nojb'al ktayik xaq ru' utzil:
“Chita, tinimit xaq i je ajpixb'anel re i nim laj tinimit:
10I chi rachoch i utz ti laj winaq o b'eyomal ru' chi k'ax ti uch'akom wi
xaq i pajb'al le chi tz'aqat taj chi Yin tzel kwilo.
11¿Wach nawi ukuyik umak kin-an che
i jun chi ku'an jech' che upexu xaq i upajb'al chi tz'aqat taj?
12I b'eyomab' re i nim laj tinimiti konojel je aj-anol k'ax;
je ajnuk'ul tzij xaq je ajt'oronel konojel ni'pa uwinaq.
13Rumali kinya utojb'alil chawe;
kinsach awach rumal amak.
14Katij ni awa, xwiri katnoj taj,
arewi lik katij uyej rumal numik;
kamol ni wach taq i katijo, xwiri nti kattiki chuk'olik,
we o ni kattiki chuk'olik, kin-an na chi are ch'oj ksachaw ni uwach.
15Kattikan na, xwiri nti kamolo;
kajok' ni uwach i olivo, xwiri nti kawaj che i aceite;
kaya'ya ni uva, xwiri katu' ti i uwa'al uva muqb'am.
16Man xa at teren chrij utaqanik xaq i wach
taq ku'an i ma Omri xaq i ralk'uwal i ma Acab,
xaq are ka'ano pacha kki'an ike.
Rumali Yin kin-an ni chawe yet xaq chke awinaq
jun utz ti laj k'ulmanik re xib'rikil xaq re yo'yanik,
i k'ixb'alil re intinimit ktzaq ni pawi yet.”
Currently Selected:
Miqueas 6: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
