Miqueas 5
5
I Dios keukoj ni aj-atol tzij re Israel
1“Xwiri wo'or, tinimit Jerusalén, chayijb'a ni atob'al awib',
man sutim awij
xaq lik kya' ni utojb'alil che aj-atzil re i tinimit Israel.
2Xwiri yet, Belén Efrata,
at ch'utin chkixol i lemajil re Judá,
chawe yet kel ni jun aj-ok'al utzam re i tinimit Israel
chi kpe che jun alk'uwalxel re ujer.”
3Wo'or i Ajwal kero'taj ni kan utinimit,
xwiri k'a kk'iji ni i ak'al chi kalax ni
ru' jun ixoq chi b'italik.
Are uri i aj Israel chi je elsam b'i pa cho'ab' chwach kulew,
kkimol chik kib' ku' kach aj tinimit Israel.
4I ajawinel kwalij na, re kuchajij utinimit
ru' ucho'ab' xaq ru' lo'laj u'ijol re i Ajwal chi u-Dios,
keje ile ike kek'iji ni pa chomb'al ib',
man i Ajwal lik nim ni u'ij
k'a pa taq k'isb'al rokraq re uwach i jyub' ta'aj.
5Ire kuk'am na li chomb'al ib'.
Are i aj Asiria kkimaj qatinimit
xaq ke'ok b'i pa nimaq taq ja re i ajawinel,
keqataq nu b'i chkij ike
wuqub' aj-ok'al utzam i tinimit xaq wajxaqib' achiyab' chi lik o kipatan.
6Ike kerajawin ni pa Asiria,
i tinimit re i Nimrod, lik ru' i ch'ich' chi k'ulala o uware,
kojkito ni chkiwach i aj Asiria
chi xkimin kib' pqatinimit chi
xaq xkimaj i qulew.
Usachik kiwach i ajch'oj
7Are uri, chkixol uk'iyal taq tinimit,
i jub'an chi kekanaj kanoq re utinimit i ma Jacob,
je keje na pacha uxaqk'aj chi kutaq li Ajwal, keje pacha i jab' chi ktzaq puwi i es,
ile lik are ti i winaq k-anawik chi kpe jab'.
8Are uri, chkixol uk'iyal nimaq taq tinimit,
i jub'an chi kekanaj kanoq re utinimit i ma Jacob
je keje na pacha jun koj chkixol chikop aj pa taq es,
pacha jun koj o pkik'ijib'al i chij,
are ke'ik'aw i chij keuchapo xaq ku'an ch'aqa taq chke,
lik mijun kuya che chi kk'asi kanoq.
9Keje u'anik i ch'oj ile ka'an yet, Ajwal,
xaq keasachsaj ni kiwach konojel i je ajch'oj chawij.
K'isb'al re i ch'oj xaq ukojik ki'ij i tiox chi xaril je antalik
10Iri are kub'ij i Ajwal:
Che taq i ij le keinkamsaj ni akaway
xaq keinsachsaj ni kiwach ach'ich' re ch'oj;
11kin-an ni che i nimaq taq atinimit chi ketzaq puyej
xaq kinwulijsaj ni ronojel ukowib'al;
12kinsachsaj ni kiwach i je ajkojol a'
xaq kixkanajik nti chik ajnanel;
13kinsachsaj ni kiwach ni'pa taq atiox chi xaril je antalik xaq ab'aj chi lik o ki'ij,
man keje ile lik arewi kakoj ti chik ki'ij
atiox chi xa yet at anawnaq.
14Keinmich' ni ache' chi lik o u'ij
xaq kinsachsaj ni uwach konojel atinimit.
15Rumal i woywal, kin-an ni uk'exel
chke i nimaq taq tinimit chi xkaj ti xekojon chwe.
Currently Selected:
Miqueas 5: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
