Miqueas 4
4
I ajawinik re i chomb'al ib' re i Ajwal
1Pa k'isb'al taq ij lik kkub'ax ni
i jyub' ipa kriqtaj wi i rachoch i Ajwal.
Are ni i jyub' chi lik mas naj rij;
chi lik mas naj rij chkiwach ni'pa i jub'an chik jyub'.
Konojel ni'pa i nimaq taq tinimit kek'un ni ru' ire;
2k'iyal taq tinimit keupon ni ru', kkib'ij:
“Chixpetoq, chojel b'i puwi i jyub' re i Ajwal,
prachoch i Dios re i ma Jacob,
man keje ile Ire kuk'ut ub'e chqe,
xaq keje ile kojb'in ni uri che ub'e.”
Man pa tinimit Sion kel wi i k'utunik re i Ajwal,
xaq pa Jerusalén kpe wi utzij.
3I Ajwal ku'at ni tzij chkixol i nimaq taq tinimit,
xaq are ni Ire kch'ob'ow i ch'oj chkixol k'iyal taq tinimit,
xaq keje k-on ile chke i je o li k'a naj.
Ni'pa i kich'ich' chi k'ulala o uware kki'an ni tukb'al ulew che
xaq i kiche' ch'ich' utzam kki'an ni os che.
Are uri mijun chik tinimit kuk'am chik uch'ojb'al re ch'oj chrij jun chik
xaq nti chik k'utunik kkik'amo re ch'oj.
4Are uri konojel kejeqi'ik man lik nti chik xib'rikil,
i chkijujunal ke'uxlan ni
che umujal i kitikon re uva xaq i higo.
¡Iri lik are utzij i Ajwal chi ronojel ktiki che!
5I jub'an chik tinimit kekikoj ni kitiox,
xwiri yoj lik arewi kojkojon ni
che i Ajwal chi qa-Dios.
I Ajwal kuto ni utinimit
6-7Iri kub'ij i Ajwal:
“Che taq i ij le kinmol ni kichi' inchij,
chi inya'om te'eq utojb'alil chke:
Chke i jetz', chke i je kosnaq xaq ni'pa i je kichernaq b'ik.
Ku' ike, xaq ku' i ni'pa i je o chila,
kin-an ni jun tinimit nim ucho'ab'.
Yin, chi in Ajwal, kin-at ni tzij puwi intinimit
k'a che li jyub' Sion, wo'or i lik arewi k-e ij saq chrij.
8Yet Jerusalén, are i ja tak'tik chi yab'al ucho'ab' i tinimit Sion,
are ni yet katu'on tan chik uchuch i ajawinik,
chi at nim laj ixoq pacha a'anom te'eq ujer.”
9Wo'or ut, ¿B'uchak katsik'inik keje
pacha jun ixoq chi ya kk'iji rak'al?
¿Xatab'a rumal nti ajawinel re katok'awik?
¿O moqxa rumal je kamnaq i keyaw anojb'al?
10Chab'ak'ak'ej awib' i chatsik'inoq, tinimit Sion,
pacha jun ixoq chi o k'axk'ol che rumal ya kk'iji rak'al,
man i awinaq ke'el b'ik i kejeqi ni pa jamalik taq k'ijib'al,
xaq keupon ni k'a pa Babilonia.
Xwiri i Ajwal kuto utinimit chila;
keuto ni chkiwach i je ajch'oj chkij.
11Wo'or je k'i nimaq taq tinimit
kimolom kib' chawij,
kkib'ij: ¡Lik kojkikot
chrilik i tinimit Jerusalén man xqajsax u'ij!
12Xwiri i nimaq taq tinimit le keta'am taj
wach uch'ob'onik xaq wach uyijb'am i Dios;
keta'am taj chi Ire kumol ni kichi' ku'an chke
pacha taq yotaj trigo chila ipa kjich' wi uwach.
13¡Chatwalijoq i chaya'ya uwi i trigo, tinimit Sion!
Man i Ajwal kub'ij:
“Yin kinya ni acho'ab' pacha re jun toro
chi o rok'a' re ch'ich' xaq i rixk'aq re anch'ich',
man keje ile ku'an ni k'ax chke uk'iyal taq tinimit.
Yet kamaj ni kib'eyomal chke chi k'ax ti uch'akik ki'anom
i kaya ni chwe Yin kojb'al re in-ij,
Yin, chi in Ajwal re ronojel i jyub' ta'aj.”
Currently Selected:
Miqueas 4: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
