Miqueas 3
3
Tzijonik tzij chkij i utz ti laj taq aj-ok'al utzam i tinimit Israel
1Chita uri wo'or ix aj-ok'al utzam xaq ix aj-atzil re i tinimit Israel,
¿Xatab'a chiqul ti yix o wi
retamaxik u'anik i suk'ulik?
2Xwiri yix, tzel kiwil i utz, i k'ax kina i utz taj;
kiwesaj uti'lal intinimit
i kiya kan ub'aqil chisaq.
3Lik k'as intinimit kitij b'ik;
kiwesaj kiti'lal xaq lik kipatz' i kib'aqil;
i lik ki'an chke pacha taq je ti' re pa b'oj.
4Kuriq ni ij chi yix kisik'ij ni Ajwal,
xwiri ire lik kula' ti uwach chiwe.
Che taq i ij le kruwaj ni rib' ire chiwach
rumal taq i utz taj chi i'anom.
Tzijonik chkij i je profeta chi ket'oronik
5Intinimit arewi keb'in che i b'e chi utz taj,
i je ajmakib' are i profeta chi xa kekit'oro,
chi kkiya utzijol i chomb'al ib' chke i ketzuquwik,
xwiri kkisaqij i ch'oj
chkij i ketzuquw taj.
I Ajwal kub'ij chke i profeta le:
6“Yix ki'an ti chik
i ilanik piwach cha'ab' re k-on panoq
xaq mitene kiwesaj ub'ixkil re k-on panoq pa equm.
I ij ksach nu b'i chke i profeta le,
xaq i pa'ij k-equmar ni chke ike.”
7I jub'an chi kkiya retamaxik wach kk'ulmax chweq, kab'ij xaq i je ajnanel le,
lik keya' ni pa k'ix.
Konojel ike le lik kech'aw ti chik
are kla' ti chik uwach chke rumal i Dios.
8Xwiri chwe yin, i Utewal i Ajwal
kuya incho'ab', i u'anik i suk'ulik xaq i ukowil inwach,
re kinkoj uch'oj che i tinimit Israel uqelanik xaq i umak.
Uwulijsaxik i Jerusalén
9Chita iri wo'or, aj-ok'al utzam xaq i aj-atzil re i tinimit Israel,
yix chi tzel kiwil u'anik i utz
xaq kijech'b'a b'i ronojel i suk'ulik,
10ketijin chuyakik i tinimit Jerusalén xaq i nim laj tinimit re i jyub' Sion,
puwi i kik' xaq puwi i utz ti laj atb'al tzij.
11I je aj-atol tzij pa tinimit kkik'am mer chi ksujux chke,
i je ajsujul sipon kkiya i k'utunik xa rumal i mer
xaq i je profeta kkik'ayij i kitzijonik,
kkich'ojij chi are i Ajwal ketowik, i kkib'ij:
“I Ajwal o qu' yoj;
lik nti jun k'ax kqak'ulmaj.”
12Xwiri, rumal imak yix,
i Jerusalén chi nim laj tinimit re i jyub' Sion,
kkanajik pacha tukum ulew
xaq pacha t'ub'ulaq taq ja wulijnaq,
xaq i ulew re i rachoch i Ajwal knoj ni uwach che uk'iyal taq es.
Currently Selected:
Miqueas 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
