Miqueas 2
2
I kicho'ab' i je aj-anol k'ax
1¡Lik to' kiwach i jub'an chi tupu are kewarik
kkich'ob' u'anik i utz taj,
are kuriq i ij lik kki'an na,
man lik o i cho'ab' pki'ab'!
2Kkirayij uwach ulew, xaq kki'an ke che;
kkirayij uwach i ja xaq lik kkel-aj.
Kki'an k'ax chke i achiyab', i chke i kalk'uwal
xaq che ronojel i ub'itaq ke xaq i kuxtab'al ke.
3Rumali kub'ij i Ajwal:
“Xaq Yin o inch'ob'onik chiwij yix.
Kintaq nu b'i jun tojpen piwi
chi lik kixtotaj ti chwach, keje qajsab'al ni i'ij ile,
kixtiki ti chik chu'anik nim che iwib'
man are i ij re olem pa nim laj k'ax.
4Che taq i ij le kixb'ixax ni
ru' i b'ix re o'ej. Kb'ix ni chiwe:
Lik xsachsax qawach qonojel;
i qatinimit, are i Ajwal rajaw,
lik jalwachim i rajaw xaq lik mijun k-atiwik;
ni'pa taq qulew lik jachtal
chkiwach i je ajch'akanel chqij.”
5Rumali yix nti kya' chiwe
che utinimit i Ajwal.
I je utz ti laj taq profeta
6“¡Mek'un taq qu' ru' tzijonik! —Ike kkib'ij.
¡I k'ax lik kojuriqa taj!”
7¿Xatab'a lik k'oqom i tinimit re ma Jacob?
¿Xatab'a i Dios usachom unimal uk'ux?
¿Keje nawi ku'an i Dios ile?
¿Xatab'a utzij ku'an ti utz
che pachin ku'an i suk'ulik?
8Yix ix walijnaq chrij intinimit.
Kimaj ki'u' i jub'an chke chi lik paqal rajil
chi ketzalij li pa ch'oj,
man kich'ob' yix chi ya xetotajik.
9K'a chupam li kachoch ipa lik utz te'eq je jeqel wi
kekik'aq li i ixoqib',
xaq kkesaj ki'ij i kak'al ronojel ij saq
chi Yin inya'om chke.
10¡Chixwalijoq! ¡Mimayij i b'e!
Man iri are ti jun k'ijib'al re i uxlanb'al,
man lik nim i utz taj o che,
rumali lik ksachsax ni uwach ronojel.
11We o jun kunojij t'oronik, i kub'ij:
“Yin kinya utzijol i uwa'al uva muqb'am xaq i k'uxux”,
ile lik are i profeta chi lik rajwaxik che i tinimiti.
I Dios kusujuj relsaxik utinimit pa k'ax
12Kinmol kichi' konojel i tinimit re ma Jacob;
kinmol uchi' jutzob'aj chi je k'i ti chik chi xekanaj kanoq re Israel.
Kinmol kichi' pacha i chij pa k'olb'al ke,
pacha jutzob'aj chij chwa taq k'im,
i lik kewojoj na pacha taq uk'iyal winaq.
13I Dios kujaq nu b'i i b'e chkiwach,
ike keterej nu b'i chrij
i ke'el ni che i okb'al re i tinimit.
I ajawinel chi Ajwal,
knab'ej nu b'i chkiwach konojel ike.
Currently Selected:
Miqueas 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
