Malaqu%EDas 3
3
1I Ajwal chi ronojel ktiki che kub'ij: “Kintaq b'i ajb'il intzij re kuyijb'a i b'e. I Ajwal, chi yix kixtijin chutzukuxik, lik juntir kok la prachoch. ¡Ya kupon i ajb'il tzij re i trat chi yix lik kirayij!” Lik ya kk'unik kub'ij i Ajwal.
2Xwiri ¿Pachin kuch'ij i ij re uk'unik? ¿Pachin nawi kuch'ij naj che i tak'alem? Man lik kupon na pacha jun a', anb'al re ch'am chqe; keje na pacha jun xab'on chi kresaj b'i ch'am taj chqe chi oj utz'ijom. 3I Ajwal kkub'i ni chu'anik ch'am chke i je ajsujul sipon, chi je umuq uxikin i ma Leví, pacha k-an che i saq-o'oj xaq i an-o'oj chi kporox pa a' anb'al chom che. Te'uri ike ketiki ni chusujuxik kisipon chwach i Ajwal, lik keje na pacha i rajwaxik k-anik. 4I Ajwal lik kkikot ni uri che usipon i Judá xaq che i Jerusalén, xaqjun pacha ukikotemal te'eq che, jela kanoq.
5I Ajwal chi ronojel ktiki che kub'ij: Yin kink'un ni chu'atik tzij piwi yix. Xaq che taq i ij le lik kinsaqij ni chkij ni'pa i ki'anom i je ajnanel, xaq i jub'an chi kki'an ch'am taj ru' i kich'akul, xaq ni'pa i to' kkikuxtaj inb'i chi qatzij taj, ni'pa taq i kkiya i ajchakib' pa k'ax, malkanib' xaq i ak'alab' chi nti chik kiqajaw kichuch, xaq ni'pa i kki'an k'ax chke i je aj naj xaq i jub'an chi kkikoj ti in-ij.
Jun che i lajuj re i ch'akanik xaq i sipon
6Yin in are i Ajwal, chi kinjaltaj taj. Rumali yix, chi ix umuq uxikin i ma Jacob, lik sachsam ti iwach. 7Yix ijek'om iwib' che in-atb'al tzij, keje pacha xki'an iwatit imam ujer, xaq xiwaj ti xixkojon chke ike. Yin, chi in Ajwal chi ronojel kintiki che, kinb'ij chiwe: ¡Chixtzalij chali wu' Yin, xaq Yin kintzalij chik iwu' yix! Xwiri yix kib'ij: ¿B'uchak wa kojtzalij chik awu'? 8I Yin kintz'onoj: ¿Xatab'a o krel-aj i winaq che i Dios? ¡Xwiri yix lik o iwel-am chwe! I lik k'a kitz'onoj: ¿Wach qel-am chawe? ¡Are i jun che i lajuj che i kich'ako xaq che i to' sipon are ile iwel-am chwe! 9Are ile, ronojel i nim laj tinimit, iwonojel yix ki'an ela' chwe, rumal ile kixink'oqoj. Yin in Ajwal chi ronojel kintiki che, kinb'ij chiwe: 10Chik'ama li i jun che i lajuj che i kich'ako kiya pwachoch chila pa k'olb'al b'iroxik, keje ile o ni ktijaw pwachoch. Chik'ama inpam ru' ile, ilb'al re we kinjaq ti wantana chiwe re chikaj, re kinya k'iyal utzil chomal piwi. 11Kinya ti chke itzel laj taq chikop chi kkisach uwach i tikon, xaq i uche'lal i uva, kub'ij i Ajwal. 12Konojel i nimaq taq tinimit kkib'ij ni chiwe, utz iwe yix, man yix kya' ni jun tinimit lik chom chiwe. Yin in Ajwal chi ronojel kintiki che, inb'im.
I rutzil uk'ux i Dios che utinimit
13I Ajwal kub'ij: Yix lik ib'im k'ax laj taq tzij chwij Yin. Xaq lik k'a kitz'onoj: “¿Wach qab'im chawij Yet?” 14Iri are ib'im: Are ukojik u'ij i Dios lik nti uchak. ¿Wach kqach'ak che ile, we kqa'ano pacha kojutaq che, chi re kqakoj qa'u' re b'is chwach i Ajwal chi ronojel ktiki che? 15Yoj qilom chi winaq chi kki'an nim che kib' lik kekikotik, i itzel laj taq winaq lik ni'pa i b'iroxik chi kki'ano lik utz kel chwi ki'ab', chi kkik'am upam i Dios, i lik kya' ti utojb'alil chke.
16I jub'an chi kkikoj u'ij i Ajwal xelapan chkiwach, i Ajwal lik utz utatb'exik xu'an chke wach kkilapo. I lik chwach i Ajwal xtz'ib'ax jun wuj, chi xkoj kib'i i jub'an chupam kuxtab'al ke, man lik kkikoj u'ij i Ajwal xaq lik kkikuxtaj ub'i.
17I Ajwal chi ronojel ktiki che kub'ij: Kintijin chuyijb'axik jun ij chi ike keu'on tan chik intinimit. Keje pacha jun qajawxel kril tob'al uwach i rak'al chi kilawik, keje ni ile Yin kwil tob'al kiwach ike. 18Are uri yix kiwil tan chik ub'e wach k-anaw jun utz laj winaq xaq wach k-anaw jun utz ti laj winaq, xaq pachin kukoj u'ij i Dios xaq pachin kukoj ti u'ij.
Currently Selected:
Malaqu%EDas 3: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
