Malaqu%EDas 2

1Wo'or, chi ix ajsujul sipon, chiwe yix kinya wi i taqaniki: 2Yix o uchak kinikoj na, xaq lik o uchak kikoj retalil ukojik in-ij. We ki'an taj, yin kixink'oqoj na. Man rumal ikojom ti retalil ukojik in-ij, yin kinya ni k'oqonik chiwe xaq keje ni'pa taq i kya' chiwe re ipatan. Are kub'ij i Ajwal chi ronojel ktiki che.

3Kinmaj ni ipatan xaq kink'aq ni kikis chikop chipalaj chi kek'am loq re keporoxik. ¡Xaqjunam ru' i kikis chikop, yix lik kixmes nu b'ik! 4Keje ile kiwetamaj na chi Yin inya'om i taqaniki man intrat ru' i ma Leví lik jikilik nti uk'isik. Are kub'ij i Ajwal chi ronojel ktiki che.

5Intrat lik are i k'aslemal xaq i chomb'al ib' re ma Leví. Xinya che, re kkojon ni chwe xaq re kukoj ni in-ij, ire xuk'utu chi kukoj in-ij xaq xu'an ti nim che rib' chinwach. 6I ma Leví xuk'ut i saq laj tzij xaq nti tzij kel puchi' chi utz taj. Uk'aslemal lik suk'ulik che i chomb'al ib' wu' Yin xaq je k'i xeu'atij chu'anik i utz taj. 7Lik chkiqul i je ajsujul sipon o wi uk'utik xaq retamaxik inwach, i konojel o uchak keupon ku' ike k'amb'al re utzijol wach kki'ano, man are ike je ajb'il tzij re i Ajwal chi ronojel ktiki che.

8Xwiri yix, chi ix ajsujul sipon, xijek' iwib' che i utz laj b'e; ru' ik'utunik i'anom chi je k'i je tzaqnaq che i utz taj. Keje ile, yix ijech'b'am intrat ru' ma Leví. 9Ile, rumal ix kojonnaq ti chwe, xaq xwi ta la ile, are kik'ut chke i winaq xaqjun ti kilik ki'an chke konojel, Yin kin-an na chi ronojel i tinimit tzel kixkilo xaq kixkixutuj. Are kub'ij i Ajwal chi ronojel ktiki che.

I suk'ul ti laj k'uxij ke i aj Israel

10¿Xatab'a xaqjun ti Qaqajaw qonojel, chi are i Dios chi qonojel are oj anawnaq? ¿B'uchak uri, kqat'or qib' yoj chqawach, chi xa kqajech'b'a i trat re junamsab'al qawach chi xu'an i Dios ku' i qatit qamam ujer? 11I tinimit Judá jikil ti uk'ux che i Dios, lik k-an i ch'am taj pa Jerusalén xaq pa tinimit Israel. I tinimit Judá uqajsam u'ij i lo'laj uch'amil i rachoch i Ajwal chi lik k'ax kuna i Ajwal, i achiyab' re i tinimit Judá xa kitzukum kixoqil chi kkikoj ki'ij i dios chi je saqil taj. 12¡Utz wetene i Ajwal kusach kiwach ni'pa kki'an taq i b'iroxik le pqatinimit, nti k-ono xa je pachinoq tupu kok'am taq li kisipon chwach i Ajwal chi ronojel ktiki che!

13Xwiri yix lik xwi ti ile ki'ano: Lik kinojsaj uwi i sujb'al sipon re i Ajwal ru' uwa'al iwach, lik kixo' ru' nim laj uk'axk'ol ik'ux man i Ajwal lik kraj ti chik kuk'am isipon. 14Xwiri yix lik k'a kitz'onoj ¿B'uchak? Are uchaki man are i Ajwal rilom chi yet atz'aqatsam ti asujunik chi xa'an che ixoq chi xatk'uli ru' are k'a at ala. ¡Are te'eq awachi'il, xaq lik xab'ij che chi katzukuj ti uk'exel! 15¿Xatab'a xa jun ti Dios anawnaq i ch'akulaj xaq i uxlab'? ¿I wach kraj i Dios ru' ile? Are kraj chi je umuq uxikin lik kejach ni pu'ab' Ire. ¡Chichajij uri iwib' yix che iwuxlab', xaq msach pik'ux i sujunik chi i'anom che iwixoqil are ix alab'om te'eq! 16I Ajwal Dios re i tinimit Israel, chi ronojel ktiki che, kub'ij: “¡Yix lik chichajij uri iwanima, mitzukuj jun chik ixoq; man yin tzel kwil i jun chi kujach i rixoqil i kutz'ij uk'aslemal are ku'an taq i mak atzalal le!”

I ij re u'atik tzij rumal i Dios

17I Ajwal lik kosnaq chik chitayik; i yix lik k'a kitz'onoj: “¿Wach taq wa qab'im man kosnaq chik chqatayik?” Yix uri ib'im chi Ajwal qus krilo pachin taq kki'an i utz taj xaq lik kikot ku'. ¡Yix lik kikoj taj we i Dios lik suk'ulik!

Currently Selected:

Malaqu%EDas 2: ACHICUB

Highlight

Copy