Lamentaciones 4
4
Ukaj o'ej
1¡B'uchak nawi chi xsach utzunb'al i an-o'oj!
¡B'uchak xsach uwalch'inik i an-o'oj chi lik paqal rajil!
I ab'aj chi lik o u'ij pa lo'laj k'ijib'al re i Dios,
lik to' je kichersam b'i xol taq b'e.
2I winaq re Sion, lik k'ax kena'ik,
konojel ile chi o ki'ij pacha i an-o'oj,
wo'or antal chke chi pacha taq je b'oj re ulew chi
xa je anom rumal jun aj-anol b'iroxik re ulew.
3Xwi ta la ile xaq i atitab' tz'i aj pa taq es kkiya kitz'um
i ral taq kak'al,
xwiri i winaq chi je rak'al intinimit lik to' je k'an.
Lik je k'an pacha jun chak'nos pa tz'inilik jyub' chaqij.
4I ak'alab' chi k'a ketz'umanik
lik knak'i kan utzam ka' pkichi' rumal k'atik,
ral taq ak'alab' kkitz'onoj wa re trigo,
xwiri lik mixatjun winaq kyaw chke.
5I winaq ujer chi lik k'i i tijawik re o te'eq ku',
wo'or kekam rumal numik xol taq b'e.
I jub'an chi lik xek'iy chupam chomiq taq ja,
wo'or je jeqel pa taq tz'il.
6I mak atzalal ke i winaq re intinimit
lik mas nim chwach umak i tinimit Sodoma,
chi lik juntir xk'is uwach
tupu lik mijun xu'an ch'oj chrij.
7Lik mas je saq i achiyab' chwach i solot saqb'ach, chi je ucha'om ire,
lik mas je saq chwach i leche;
uch'akul, lik mas lux ktzun chwach uchomal jun ral chikop coral aj pa mar;
i uchomal lik pacha uchomal i wo' ab'aj.
8Xwiri wo'or mas je eq chwach i muj re i equmal,
lik k-etamax ti chik kiwach xol taq b'e,
i kitz'umal lik xuyut rib' chwach i kib'aqil,
¡Lik chaqij pacha jun che' chaqijnaq!
9Lik mas utz xe'el i jub'an chi xekam pa ch'oj
chkiwach i jub'an chi xekam rumal numik,
man ike ri lik kok'il xekamik
rumal nti chik uwach i tikon chi o chwach i jyub' ta'aj re kkitijo.
10Lik ru' ki'ab', ixoqib'
chi lik utz kik'ux xekicha'saj i kak'al;
lik re kkitijo
are xkita chi xsachsax kiwach i rak'al intinimit.
11I Ajwal xro'taj li nim laj roywal,
rumal ucho'ab' i roywal le chi lik kjuluwik;
xunak' a' che i tinimit Sion
xaq lik xusachsaj uwach ukub'ib'al i tinimit.
12Lik xekojon ti i ajawinelab' re uwach i jyub' ta'aj,
konojel i kerajawin te chwach i jyub' ta'aj,
chi ajch'oj chrij
kok nu b'i che uchija re i tinimit Jerusalén.
13¡Ronojel ile xa rumal kimak i profeta,
rumal kimak atzalal ajsujul sipon,
chi chupam i tinimit le,
xekikamsaj i winaq chi nti kimak!
14To' kixim kib' keb'inik pacha taq je potz'
xol taq b'e re i nim laj tinimit;
lik tz'il kij rumal i kik'
chi lik mijun kraj kuchap ki'u'.
15“¡Chixel loq, chijek'a iwib' —xesik'in i jub'an chub'ixkil—;
man lik nixti ch'am laj taq winaq, mojichapo!”
“Yix ix are i winaq chi to' ix enaq b'ik —keje ile xkib'ij i winaq chi kkikoj ti u'ij i Dios—,
jix, lik mixjeqi chi.”
16Are uri xupon i Ajwal i xeukichersaj b'ik,
xaq lik xe'utzu ti chik.
Lik nti chik uya'ik ki'ij ajsujul sipon
xaq lik nti chik ilb'al wachij chke i rijab'.
17I qab'a'wach kosnaq chik, xwiri lik k'a ktzun k'ulala,
lik nti rumal we kqoy-ej taq qato'ik.
Man xa qataqem ruponik
jun tinimit chi ktiki ti chqato'ik.
18Lik kik'ak'alim ipa kojb'in wi;
rumali koj-el ti chik xol taq b'e.
I uk'isik i qak'aslemal lik naj ti chik o wi, lik ya xuriq u'oril chqij;
¡Lik ya xk'is i ij re i qak'aslemal!
19Lik mas kkich'ij b'e chkiwach i kotxik chi kerupup chikaj
are i jub'an chi oj kiterb'em;
kojkiterb'ej pa taq es,
¡kkikoj tzaqsab'al qe pa tz'inilik jyub' chaqij!
20Lik xtzaq prexil i jun chi u'ulum i Ajwal,
chi are kuya te'eq quxlab' re qak'aslemal,
are i ajawinel chi xqab'ij te'eq chiwe:
“Chi lik che umujal kojtotaj wi chkixol i tinimit.”
21¡Chattzenoq, chatkikotoq, nim laj tinimit re Edom;
yet chi kat-ajawin pa nim laj tinimit Us!
Man xaq k'a awu' yet kupon ni uri i k'ax,
rumali kat-ab'ar na xaq katch'ani na.
22I atojb'alil lik ya xk'isik; nim laj tinimit re Sion,
i Ajwal katresaj ti chub'i pa cho'ab' chwach awulew.
Xwiri kuya ni utojb'alil amak atzalal, nim laj tinimit Edom,
xaq lik kresaj na li amak chisaq.
Currently Selected:
Lamentaciones 4: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
