Lamentaciones 3
3
Urox o'ej
1Lik are yin inna'om chik uyej rumal i jalajuj taq k'ax
re i nim laj roywal i Ajwal.
2In uk'amom b'i pa jalajuj taq k'ijib'al equm,
lik u'anom chwe chi kinb'in che i b'e chi nti a' che;
3lik k'iyal taq mul che jalajuj taq or,
kuya i tojb'alil pinwi yin.
4U'anom rij che inti'lal xaq che intz'umalil,
xaq u'anom mutmut che inb'aqil;
5lik usutim wij, man uyakom
jun koral re b'is xaq re uyej chwij;
6u'anom chwe chi in jeqinaq chuxe' i muj,
pacha i jub'an chi je kamnaq ujer.
7Xinutz'apij chupam jun koral chi nti elb'al che;
xinuxim ru' nimaq taq karena chi lik al;
8tupu xinsik'inik re kintz'onoj intob'al;
xukoj ti retalil insik';
9xutz'apij inb'e ru' koral ab'aj,
¡Xujech'b'a b'i usuk' inb'e!
10Ire ke'eloq chwe yin pacha jun koj ruwam rib',
pacha jun yum chi lik ya kinuchapo.
11Xinujech'b'a b'i che inb'e, xaq xutij inchapik,
¡Lik xuya kan nim laj xib'rikil chwe!
12¡Xuyijb'a i k'aqb'al uch'ab'
te'uri x-on chwe chi kinuk'aqo ilb'al re we kinumajo!
13I ch'ab' le chi xuk'aq i Ajwal chwe
lik xok b'i k'a naj chupam inch'akul.
14Konojel inwinaq kinkitze'ej;
lik ronojel taq or kinkilapo xaq kinkitze'ej.
15I Ajwal lik k'i i k'ax uya'om chwe;
i ya chi xuya chwe re kintu'u lik k'a.
16X-on chwe chi xinxa' inware pulew;
xaq x-on chwe chi xinraxij uk'aj ulew.
17I chomb'al ib' lik xujek' rib' wu' yin
xaq lik ya xsach pink'ux wach i kikotemal.
18Lik xinch'ob'o chi
ya xsach ukub'ib'al ink'ux che i Ajwal.
19Kk'un chink'ux inb'is xaq intukelal,
uk'axk'ol xaq i uyej;
20are kinch'ob' ile,
i ukowil ink'ux xa kqajik.
21Xwiri o jun b'iroxik chi lik kwaj kink'iji chuch'ob'ik
che ire kinkub'a wi ink'ux chroy-exik:
22Uk'axnab'al uk'ux i Ajwal lik nti uk'isik,
xaq lik k'isnaq ti rutzil uk'ux.
23Arewi ij ij pa taq usaqirb'al lik k-on k'ak' che;
¡Ire lik nim uk'ux!
24Lik kinb'ij pink'ux: ¡I Ajwal lik are Ire ronojel chwe yin;
rumali che Ire inkub'am wi ink'ux!
25I Ajwal lik utz ku' i kkikub'a kik'ux che,
xaq keje ile ku'an ku' i kkitzukuj kitob'al ru'.
26Mas utz kqoy-ej are nti ch'awik are tz'inil i or
man keje ile i Ajwal kk'un chqato'ik.
27Mas utz chi jun winaq lik prak'alil
kunawsaj rib' chuch'ijik i jalajuj taq k'ax.
28Jun winaq rajwaxik utukel kkanajik xaq kch'aw taj
are ktaq che rumal i Ajwal.
29Rajwaxik chi kuqajsaj u'ij kxuki'ik, kutz'ub'aj ulew,
moqxa k'a o roy-exik;
30Chuya uxukut uchi' che i kch'ayawik,
xaq uch'ijik i nim laj qajsab'al ij.
31I Ajwal kojro'taj ti
ronojel ij saq.
32Tupu lik kuya i uyej, xaq kril ni tob'al wachij,
man i k'axnab'al uk'ux lik nim.
33Lik saq laj tzij Ire kraj ti kuya uyej
mitene k'ax chke i winaq.
34I u'anik i k'ax chi nti tob'al wachij
chke i je o prexil re i tinimit,
35i uqajsaxik u'ij i o re i winaq che,
chwach i nim laj Dios aj chikaj,
36ujech'b'axik i atb'al tzij are kuto rib' chwach i aj-atol tzij,
ile are b'iroxik chi Ajwal kuya utojb'alil.
37Are o kb'ixik, are uri o b'iroxik kk'ulmaxik,
man lik are i Ajwal utaqom loq.
38Lik keje pacha i utz xaq i utz taj chi kpe pqawi,
man lik keje ile uch'ob'om i Ajwal chqe.
39I winaq lik ajmak,
¿Wach taq uri kukoj uch'oj che i k'aslemali?
40Lik chojch'ob'on chrij u'anik i utz pqak'aslemal,
xaq lik chojtzalij chub'i ru' i Ajwal.
41Chqaya i qanojb'al che i Dios aj chikaj
xaq chqaya i qalapanik che Ire.
42Yoj xojmakunik xaq lik oj qelqel,
i Yet lik xakuy ti qamak.
43Xasutij qij ru' awoywal, xojaterb'ej,
¡Xawesaj i qak'aslemal, lik xawil ti tob'al qawach!
44Xapasij awib' chupam jun sutz'
man keje ile kata ti qatz'onb'enik.
45Xa'an chqe pacha taq lik oj tz'il
chkiwach konojel i winaq.
46Konojel i ajch'oj chqij lik
kojkilapo;
47xib'rikil, tzaqsab'al, sachanel wachij xaq i tzaqik puyej,
¡lik are ile qariqom!
48Uwa'al inwach lik pacha i raqana klemem li che inb'a'wach
rumal usachik uwach i chom laj intinimit.
49Lik ke'o' inb'a'wach, lik ke'uxlan ti che o'ej,
man lik nti rik'awik i k'ax,
50lik k'a are kojril na li i Ajwal chila chikaj.
51Lik k'ax inb'a'wach xaq i wanima
rumal i xkik'ulmaj i ixoqib' re i nim laj intinimit.
52Lik nti inmak,
xwiri i je ajch'oj chwij xinkichapo pacha uchapik jun ral tz'ikin;
53Lik in k'aslik xinkimuq chupam jun k'otom,
xaq ru' jun ab'aj xkitz'apij i elb'al.
54I ya lik xinumuq b'ik,
xaq lik xinch'ob'o: “Chi yin lik in sachnaq.”
55Yin, Ajwal, xintz'onoj intob'al chawe
k'a chupam li uchoyil i k'otom:
56Yet lik kata inch'awb'al,
xaq lik mamayij utayik intz'onb'enik.
57Che i ij are katinsik'ij, katk'un wu',
xaq kab'ij chwe: “Maxij awib'.”
58Yet, Ajwal, kinato chwach urayijb'al ink'ux,
Yet lik kato ink'aslemal!
59Yet, Ajwal, kawilo chi utz ti laj atb'al tzij k-an chwe,
¡Cha'ana atb'al tzij Yet chwe!
60Yet kawil i utz ti laj urayijb'al kik'ux chu'anik i uk'exel chwe,
xaq ronojel i ch'ob'onik chi kki'an chwij.
61Chata, Ajwal, i k'ax chi kkib'ij chwe
xaq ronojel i ch'ob'onik chi kki'an chwij
62i ajch'oj chwij, to' keloxlatik,
lik ronojel or kinkilap yin.
63¡Lik chawila man che ronojel i wach kki'ano
lik kki'an chwe pacha jun b'iroxik chi kyo'yaxik!
64Ajwal, chaya utojb'alil chke,
chaya chke pacha kmajaw che i kki'ano.
65Cha'ana ko che kinojb'al,
xaq chaya i k'oqb'al pkiwi.
66Ajwal, lik cheaterb'ej ru' i nim laj awoywal,
¡Cha'ana chke chi ksach ni kiwach chwach i jyub' ta'aj!
Currently Selected:
Lamentaciones 3: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
