Joel 3
3
1Are kuriq i ij le —kub'ij i Ajwal—,
kin-an na chi kkijalwachij kik'aslemal i tinimit Judá xaq i Jerusalén.
2Kinmol ni kichi' konojel i nimaq taq tinimit,
keink'am nu b'i chwa ta'aj re i Josafat
xaq chila kin-at ni tzij pkiwi rumal wach xki'an che intinimit Israel.
Man xkikichersaj b'i aj Israel chwach i jyub' ta'aj,
xaq xkijach i wulew chkiwach ike.
3Xkijach intinimit ru' sakinik chkiwach,
xekik'ayij ral taq alab'om xaq i ral taq altom,
te'uri xkik'is b'i pwaq
che i uwa'al uva muqb'am xaq ku' ixoqib' chi chwach i kich'akul kkich'ak wi kimer.
U'atik tzij re i Ajwal chkij i nimaq taq tinimit
4¿Wach kiwaj yix chwe yin, Tiro, Sidón xaq i Filistea? ¿Kiwaj kitzalij uwach chwe wach i xin-an chiwe yix? ¿Kiwaj u'anik uk'exel chwe? ¡Lik juntir na kinya ni utojb'alil chiwe pacha i kmajawik! 5Yix xiwel-aj insaq-o'oj xaq in-an-o'oj, xaq xik'am b'i ub'itaq we chi nim u'ij i xeiya pa taq rachoch i tiox. 6Xeik'am b'i naj i winaq re i tinimit Judá, i winaq re Jerusalén, i xeik'ayij chke aj Grecia re i kimokom chi je o pu'ab' i kajaw. 7Xwiri yin kewesaj li chila che i k'ijib'al ipa xeik'ayij wi, i kin-an na chi yix kitij ni uyej pacha xkitij ike. 8Keink'ayij ni ik'ojol xaq i imi'al chke aj Israel, man keje ile ike kkik'ayij chke aj Sabá, winaq je aj naj. Yin in Ajwal, inb'im.
9Chitzijoj iri chke i nimaq taq tinimit:
¡Chisaqij i lo'laj ch'oj!
¡Cheisik'ij i ko kiwach!
¡Chepetoq xaq chekich'aka i je aj-anol taq ch'oj!
10I kasaron chki'ana ch'ich' chi k'ulala o uware che
xaq che i ki'os chki'ana che' chi ch'ich' utzam che,
i jun chi nti ucho'ab' chub'ij: ¡Yin lik o incho'ab'!
11Iwonojel yix, nimaq taq tinimit ix aj naqaj,
¡Chib'isoj, chixpetoq, chimolo iwib'!
¡Tupu i jun chi kraj ti ku'an ch'oj, wo'or k-on ni ch'oj!
12Chiyijb'a iwib' nimaq taq tinimit
xaq jix chila chwa ta'aj re Josafat,
man chila ku'at ni tzij i Ajwal
chke konojel i je nimaq taq tinimit chi je o naqaj.
13Man ike lik je itzel laj taq winaq,
cheich'upu pacha trigo an chik,
man are chik i ij re i molonik;
chiya'ya kiwi pacha i uva,
man lik yij chik re anb'al re i uwa'al uva muqb'am. Lik k'i chik i kimak atzalal.
14Lik je k'i winaq je o chwa Ta'aj ipa K-at wi Tzij,
man ya knaqajab' i ij re i Ajwal.
15I ij xaq i ik' ke'equmar na xaq i ch'umil ksach ni kiwalch'inik.
16Are i Ajwal ku'ano chi kuya utayik uch'awb'al chi ktinin
k'a chwi jyub' Sion, pa Jerusalén,
i kaj i ulew ke'ok chi siksatik.
Xwiri i Ajwal are jun tob'al ib' xaq chajinel
chke aj Israel, chi je are utinimit.
Uchomalil i Judá k-on panoq
17Yix kiwetamaj na chi Yin in Ajwal i-Dios,
injeqel pa Sion, lo'laj injyub'.
I Jerusalén are ni jun tinimit ch'am:
I aj naj lik ketiki ti chik chkich'akik.
18Che i ij le, i uwa'al uva muqb'am xaq i leche
kelemem na pacha i ya chwi nimaq taq jyub', chwi taq loma
xaq pa taq b'eya re Judá kkik'am nu b'i uk'iyal ya.
Che i wachoch kalax ni jun ya chupam
chi kuja'aj ni uwa ta'aj re i Sitim.
19I tinimit Egipto kkanaj ni puyej,
xaq i tinimit Edom ku'an ni pacha jun tz'inilik jyub' chaqij,
man xech'ojin chkij i winaq aj Judá
xaq pkitinimit xkikamsaj winaq chi nti kimak.
20-21Yin kintzalij ni uwach kikamik; lik kinkuy ti umak i ajmak.
Xwiri i tinimit Judá xaq i tinimit Jerusalén lik arewi je o ni winaq je jeqel chupam,
i Yin in Ajwal, kinjeqi ni pa jyub' Sion.
Currently Selected:
Joel 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
