Am%F3s 1
1
U'atik tzij pkiwi i nimaq taq tinimit aj naqaj
1Iri are i utzijonik ma Amós, ajyu'ul chij aj pa tinimit Tecoa, xya' che rumal i Dios chrij i tinimit Israel, che i keb' junab' chuxe'el kab'raqan, che rajawinik i ma Uzías, ajawinel re Judá, xaq re i ma Jeroboam, chi uk'ojol ma Joás, ajawinel re Israel.
2I Ajwal are ku'ano chi ktataj uch'awb'al chi ktinin li
k'a chwi jyub' Sion chila Jerusalén,
i ulew re i k'im kchaqijik
xaq lik kchaqij i jyub' re i Carmelo.
3Keje iri kub'ij i Ajwal:
“I je aj Damasco ki'anom k'iyal taq mak atzalal
chi lik kinmayij ti uya'ik utojb'alil chke;
man xekiwach'wa i je aj Galaad ru' wach'b'al re ch'ich'.
4Rumali kinnak' ni a' che i nim laj rachoch i Hazael,
xaq i a' le kuk'atsaj nu b'i i nimaq taq ja re Ben-adad.
5Kinjaq ni uchija re Damasco ru' cho'ab';
kinsach ni uwach i krajawin chwach i ta'aj re i Avén
xaq i krajawin pa Bet-edén,
i aj Siria ke'elsax ni chwach i kulew xaq kek'am nu b'i pa Kir.”
Are i Ajwal kb'iwik.
6Keje iri kub'ij i Ajwal:
“I je aj Gaza ki'anom k'iyal taq mak atzalal
chi lik kinmayij ti uya'ik utojb'alil chke;
man xkik'am b'i konojel i winaq re i tinimit
i xkik'ayij chke aj Edom re kitaqon.
7Rumali kinnak' ni a' che i kitapial aj Gaza,
xaq i a' le kuk'atsaj nu b'i i nim laj ja re i ajawinel.
8Kinsach ni uwach i krajawin pa Asdod
xaq i krajawin pa Ascalón.
¡Ru' ronojel incho'ab' kink'aq wib' chrij i Ecrón,
i lik k'a kkam ni k'isb'al aj Filistea!”
Are i Ajwal kb'iwik.
9Keje iri kub'ij i Ajwal:
“I je aj Tiro ki'anom k'iyal taq mak atzalal
chi lik kinmayij ti uya'ik utojb'alil chke;
man xekesaj b'i konojel i winaq re jun tinimit chi lik are te jun tinimit chi k'ax te kkina kib' chkiwach pacha katz kicha' kib', i xkijach pu'ab' i Edom.
10Rumali kinnak' ni a' che kitapial i aj Tiro,
xaq i a' le kuk'atsaj nu b'i i nimaq taq ja ke ajawinelab'.”
11Keje iri kub'ij i Ajwal:
“I je aj Edom ki'anom k'iyal taq mak atzalal
chi lik kinmayij ti uya'ik utojb'alil chke;
man ru' ch'ich' chi k'ulala o uware xaq lik ru' ti k'axnab'al kik'ux,
xekiterb'ej i katz kicha' aj Israel.
Lik xko'taj li koywal
chi lik nim o pkik'ux chi lik kk'is taj.
12Rumal uri ile kinnak' ni a' che i Temán,
xaq i a' le kuk'atsaj nu b'i nimaq taq ja re i Bosra.”
13Keje iri kub'ij i Ajwal:
“I je aj Amón ki'anom uk'iyal mak atzalal
chi lik kinmayij ti uya'ik utojb'alil chke;
man rumal i kirayijb'al chi kkaj kki'an nim che i kulew,
xkiraqij i kalanb'al ixoqib' chi je raxwinaq pa tinimit re i Galaad.
14Rumali kinnak' ni a' che i tapial re i Rabá,
i ru' i a' le kinsachsaj ni uwach i nimaq taq ja ke ajawinelab',
che i ij re i ch'oj le lik kesik'inik,
xaq ru' jun nim laj uch'awb'al jab' tew upam.
15I rajawinel kelsax b'i pa cho'ab' chwach rulew,
junam ku' i achiyab' chi je re ire chi nimaq kipatan.”
Are i Ajwal kb'iwik.
Currently Selected:
Am%F3s 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
