Joel 2
2
1Chixut'ij i trompeta tzam taq jyub' Sion;
chixut'ij k'utb'al re pa ch'am laj jyub' re i Ajwal.
Chixsiksat iwonojel yix chi ix jeqel pa tinimit Judá,
man ya naqaj chik o wi u'ij i Ajwal:
2Ij re equmal xaq re i cha'ab',
ij re i sutz' xaq re i muj.
I k'ax chi kki'an i sak'
Jutzob'aj achiyab' chi lik o kicho'ab' chi je yij che i ch'oj
xaq lik je k'i kikichersam b'i kib' chwi taq jyub'
pacha i saq re usaqirb'al.
Chi lik mijulaj x-il uwach xaq lik k-iltaj ti uwach,
lik nti ilom wi pacha kmajaw taq ile.
3Je keje pacha i a' chi ronojel lik kuk'at b'ik;
lik kk'atan chik are k'amaja kik'awik,
xaq k'a kk'atanik are ik'awnaq chik.
I ulew, are k'amaja kik'aw i a' chwach lik chom ktzunik,
are ke'ek k-on pacha jun tz'inilik jyub' chaqij.
¡Lik mijun ktotaj chwach!
4I kitzunb'al keje pacha taq re kaway, kkich'ij anem pacha taq achiyab' je ajrij taq kaway
5i uch'awb'al i kaqan are kesak'lin chwi taq jyub'
lik keje pacha uch'awb'al i ch'ich' re ch'oj,
keje pacha upach'ach'ik uxaq es chaqij are ktijin uk'atik pa a'.
Je keje pacha jutzob'aj achiyab' chi je yij che i ch'oj chi lik o kicho'ab' i lik je o pa cholaj re kkijeq ch'oj.
6I winaq kesiksatik are kekilo,
xaq ronojel i kipalaj ku'an saqt'ur.
7Pacha achiyab' chi lik ko kipalaj che i ch'oj,
ke'anik, keik'aw chwi taq tapial
lik suk'ulik ke'ek, mijun kukotb'a b'i ub'e.
8Kkitakpuj ti kib' chkiwach;
chkijujunal kkisuk'b'a b'i kib'e,
kkimin kib' xol taq ch'ab',
xwiri lik kjech'ab' ti kicholajil.
9Ke'ik'aw chuxol i tinimit,
kki'an i anem chwi taq tapial,
ke'ok pa taq ja,
je keje pacha taq ili'omab' ke'ok b'i pa taq wantana.
10I ulew ksiksat chkiwach ike,
i kaj kb'arb'atik,
i ij xaq i ik' keu'on equm
i ch'umil ksach kiwalch'inik.
11I Ajwal, nab'e chkiwach uwinaq chi je yij che i ch'oj,
ku'ano chi ktataj uch'awb'al chi pacha uch'awb'al jab'.
Lik je k'i uwinaq chi je yij che i ch'oj;
lik nti kisuk' i jub'an chi kki'an utaqanik.
¡Lik nim xaq lik b'isb'al i ij re i Ajwal!
Lik mijun kch'ijawik.
I rutzil uk'ux i Ajwal
12Xwiri wo'or —kub'ij i Ajwal—,
chixtzalij chali wu' Yin ru' ronojel ik'ux.
¡Chimayij i wa'im chu'anik i tz'onb'enik chwe, chixsik'inoq xaq chixo'oq!
13¡Chixtzalij chik yix ru' i Ajwal chi i-Dios,
chiraqch'ij iwanima
puk'exel uraqch'ixik i'u'!
Man i Ajwal lik rutzil k'uxij xaq lik tob'al wachij,
al uk'ux xaq lik o k'axnab'al k'uxij ru',
chi xaq lik arewi kuresaj i tojb'alil pqawi.
14Moqxa kuch'ob'o chi kuya ti utojb'alil imak chiwe,
xa kutaq li utzil chomal piwi:
Sipon ch'irajil xaq i uwa'al uva muqb'am
re i sipon chwach i Ajwal i-Dios.
15¡Chich'awsaj i trompeta pa jyub' Sion!
Chimolo kichi' i tinimit xaq chimayij i wa'im chutz'onoxik che i Ajwal;
16chimolo uchi' i tinimit re i Dios, chi'ana ch'am chke;
chimolo kichi' i rijab', i ak'alab'
xaq keje ne i ak'alab' chi k'a ketz'umanik.
¡Xaq keje ne i k'ate je k'ulinaq
che'el li pa kiwarb'al!
17Cheo' i je ajsujul sipon, xaq i nimaq kipatan prachoch i Ajwal,
chkib'ij are je o chuxol i okb'al b'ik ru' i k'ijib'al re i sujb'al sipon:
“Chakuyu, atinimit, Ajwal;
maya'o chi jub'an chik kkiyo'a i je awe yet;
maya'o chi jub'an chik nimaq taq tinimit kkiya kib' puwi
xaq i jub'an chi nti Dios ku' kkib'ij:
¿Ipa o wi u-Dios?” Kecha na.
18Are uri i Ajwal xuk'ut uk'axnab'al uk'ux che utinimit; xaq xril tob'al uwach utinimit, 19xub'ij:
“Kintaq b'i trigo, uwa'al uva muqb'am xaq i aceite,
lik k'a kixnoj na;
i lik kinya ti chik chke i winaq
chi nti Dios ku' kixkiyo'ya.
20Naj kewesaj b'i i sak' chiwe chi je k'unnaq pa moxab',
keink'aq b'i pa tz'inilik jyub' chaqij.
Keinji'saj ni chupam i Mar Kamnaq ni'pa i ajch'oj chi je nab'e,
i jun tzob'aj chik ajch'oj chi je teren b'ik keinji'saj ni pa Mar Mediterráneo,
i kich'akul lik k-ayik xaq lik k-on chu.
¡Lik kin-an ni nimaq taq b'iroxik!”
21Lik chatkikotoq, ulew, lik maxij awib',
man i Ajwal ku'an nimaq taq b'iroxik.
22Lik mixij iwib', chikop aj pa taq es,
man ni'pa taq i k'im keu'on tan chik rax,
i che' kkiya tan chik kiwach,
xaq k'i ni higo xaq i uva o na.
23¡Chixkikot yix, winaq re Sion,
chixkikot che Ajwal i-Dios!
Ire uya'om i jab' chiwe che i ij are kajwax chiwe,
jab' re alaj xaq i jab' are ketuxan taq i tikon,
keje pacha ax ku'an wi.
24Lik o ni jun utz laj molonik re trigo
xaq uk'iyal uwa'al uva muqb'am i aceite.
25Yin kinya ni uk'exel i junab' chiwe yix
chi xisacho
kumal i chikop laj taq sak',
chi je are jutzob'aj sachanel uwach tikon
chi xintaq b'i chiwij yix.
26Yix kixwa na k'a kkub'i ni ik'ux,
xaq kikoj ni u'ij i Ajwal i-Dios,
man iwumal yix yin xin-an chomiq laj taq anik.
Lik mijulaj chik kkanaj intinimit pa k'ix,
27xaq yix ix, aj Israel, rajwaxik chi kiwetamaj
chi Yin in Ajwal, in o iwu' yix,
chi Yin in Ajwal i-Dios, lik nti chik jun chik.
¡Lik mitene julaj chik kkanaj intinimit pa k'ix!
Kk'un utewal i Dios
28Chrijil chik i b'iroxiki
kinya nu b'i Intewal pkiwi konojel i winaq:
Imi'al xaq ik'ojol
kkitzijoj ni pinb'i,
i rijab' kki'an ni achik',
i alab'om i altom kkil ni b'iroxik pkiwach.
29Xaq pkiwi i wajchak chi achiyab' xaq ixoqib'
kinya nu b'i Intewal pkiwi che taq i ij le;
30kink'ut ni chomiq taq anik chila chikaj xaq chwach i jyub' ta'aj,
kik', a', xaq i sutz' re sib' chwach ulew.
31I ij k-on ni equm,
i ik' pacha kik',
chuxe'el uk'unik i ij re i Ajwal,
chi are jun nim laj ij xaq lik xib'in ib'.
32Xwiri konojel ni'pa i kkikoj u'ij i Ajwal
ketotaj ni chwach i kamik,
man chila pa jyub' Sion, xaq pa Jerusalén,
o ni totajik chwach i kamik,
keje pacha ub'im i Ajwal.
Ni'pa i je u'ulum ire kek'asi na.
Currently Selected:
Joel 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
