Joel 1
1
I sak' kki'an k'ax che i molonik
1Iri are i tzijonik chi Ajwal xub'ij che ma Joel, chi uk'ojol ma Petuel.
2Lik chita ub'e iri, rijab',
xaq iwonojel yix, chi ix jeqel pa tinimit.
¿Iwilom ti yix jun b'iroxik chi lik nti usuk'?
¿X-aljin ti nawi taq i b'iroxik le che taq i ij ke iqajaw ichuch?
3Chilapa chke iwak'al,
keje ile ike kkilap chke i kak'al ike,
ike le kkilap tan chik chke i jub'an chi kealax tan chik k-on panoq.
4Ronojel lik xkitij b'i sak':
I jujun chi xekiya kan i jub'an, xek'un jub'an chik xekitij b'ik.
5¡Yix, ab'arelab', chk'un saq chiwach!
¡Lik chixo'oq, ix ajtu'ul uwa'al uva muqb'am,
man i uwa'al uva kmaj ni chiwe!
6Man i sak', je keje pacha jutzob'aj winaq chi je yij che i ch'oj chi lik o kicho'ab'
xaq je k'i, i kiware keje pacha uware i koj xaq i kiware chi nimaq keje pacha re ati koj,
man xumaj intinimit.
7Usachsam uwach i qatikon re uva,
xaq usachsam uwach i qatikon re higo;
lik upuqsam b'i ronojel uxaq,
lik k'a xu'an ni k'alalaq che taq u'ab'.
8Pacha jun ali ko'ik chi kukoj u'u' re b'is
rumal ukamik ala chi kk'uli te'eq ru',
9keje o'ej ile kki'an i ajsujul sipon
man prachoch i Ajwal nti chik sipon ch'irajil xaq i uwa'al uva muqb'am
re ksujux chwach i Ajwal.
10I pa taq es lik nti o chwach;
i ulew lik je o pa b'is.
I trigo xsachik,
i tikb'al uva xechaqijik
xaq i olivo matz'krijnaq chik uwach.
11Yix, chi kixchakun pa taq es xaq pa tikb'al taq uva,
lik ru' b'is chixo'oq
man xu'on ti utz i tikon
xaq i molonik re i trigo xaq re i cebada.
12Lik je chaqijnaq i tikb'al uva
xaq xsach kiwach i higo.
Xaq xechaqij
i granado, palma, mansan
xaq konojel i che' re pa taq es.
¡Keje usachik i kikotemal le ke konojel i winaq!
13Yix, chi ix ajsujul sipon, ix ajyijb'al k'ijib'al re sujunik chwach i Dios,
chikojo i'u' chi lik as xaq chixo' rumal uk'axk'ol,
man i prachoch i Ajwal chi i-Dios
nti chik sipon ch'irajil xaq i uwa'al uva muqb'am re ksujuxik.
14Chimolo kichi' i winaq re i tinimit xaq chi'ana itz'onb'enik chwach i Ajwal ru' ro'taxik iwa'im;
chimolo kichi' chila prachoch i Ajwal chi i-Dios,
konojel i rijab' xaq konojel i winaq chi je jeqel pa tinimit,
k'iyal mul chitz'onoj utzil che i Ajwal.
15¡Ay, ya knaqajab' u'ij i Ajwal!
¡Ij chi lik xib'in ib', man rok'am li sachsab'al
chi kk'un pub'i i Ajwal chi Ronojel Ktiki Che!
16Lik chqawach xkimaj i qawa chqe,
lik xk'is i kikotemal prachoch i qa-Dios.
17I ija xkam xol taq cholaj pulew,
i trigo xsach uwach
xaq i k'olb'al re i molonik utz ti chik.
18¡I chikop lik ke'o'ik!
Tupu kkitzukuj k'im i b'akib' lik nti chik rumal;
i tzob'ajil taq chij ktijin kikamik.
19¡Chawach yet kintz'onoj wi, Ajwal,
man i a' uk'atom i es
re i tz'inilik jyub' chaqij xaq keje i che' chi je o pa taq es!
20¡Xaq keje ne chikop aj pa taq es ke'o' chutz'onoxik chawach yet,
man je chaqijnaq chik ub'e ya
xaq i a' xuk'at ronojel i k'im!
Currently Selected:
Joel 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
